"ມູນນິທິ Fred Hollows(ອົດສະຕາລີ) ມອບລົດ 2 ຄັນໃຫ້ສູນປິ່ນປົວ ແລະ ຮັກສາສຸຂະພາບຕາ(ທົ່ງປົ່ງ)"
ໃນຕອນບ່າຍວັນທີ 19 ສິງຫາ 2016 ທີ່ຜ່ານມາ ຢູ່ທີ່ສູນປິ່ນປົວ ແລະ ຮັກສາສຸຂະພາບຕາ (ທົ່ງປົ່ງ) ກະຊວງສາທາລະນະສຸກ ໄດ້ຈັດພິທີ ມອບ-ຮັບ ພາຫານະ ຈຳນວນ 2 ຄັນ ໂດຍການຊ່ວຍເຫລືອລ້າ ຈາກມູນນິທິ ເຟຣດໂຮໂລ Fred Hollows (ປະເທດອົດສະຕາລີ) ເພື່ອນຳໃຊ້ເຂົ້າໃນວຽກງານການປິ່ນປົວ ແລະ ຮັກສາສຸຂະພາບຕາ ສຳລັບບັນດາແຂວງພາກເຫນືອ ຂອງ ສປປ ລາວ. ເຊິ່ງໃນພິທີມອບ-ຮັບ ຄັ້ງນີ້ ໄດ້ຮັບກຽດເຂົ້າຮ່ວມເປັນປະທານ ມີ ທ່ານ ຮອງສາດສະດານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ຈອນວິນລຽນ ເອກອັກຄະລັດຖະທູດ ອົດສະຕາລີ ປະຈຳ ສປປ ລາວ, ເຂົ້າຮ່ວມ ມີທ່ານຜູ້ອຳນວຍການສູນ, ຫົວຫນ້າກົມ-ຮອງກົມ ແລະ ຊ່ຽວຊານປະຈຳສູນປິ່ນປົວ ແລະ ຮັກສາສຸຂະພາບຕາ, ລວມເຖິງສື່ມວນຊົນເຂົ້າຮ່ວມ.
ໃນພິທີ ຄັ້ງນີ້, ທ່ານ ຈອນວິນລຽນ ເອກອັກຄະລັດຖະທູດ ແຫ່ງປະເທດອົດສະຕາລີ ປະຈຳ ສປປ ລາວ ໄດ້ກ່າວວ່າ: ການສະຫນັບສະຫນູນຂອງອົດສະຕາລີຕໍ່ການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາແມ່ນກວ້າງໃຫຍ່ ໃນຂອບການຊ່ວຍເຫລືອຂອງລັດຖະບານ ແລະ ບັນດາໂຄງການຕ່າງໆທີ່ມີມາ, ລວມທັງ ກອງທຶນຂອງ Fred Hollows ຫລື ມູນນິທິ ເຟຣດໂຮໂລ. ກອງທຶນດັ່ງກ່າວ ແມ່ນສາມາດທ້ອນໂຮມການບໍລິຈາກອັນໃຫຍ່ຫລວງຈາກ ປະຊາຊົນອົດສະຕາລີ ໃນການນຳມາຊ່ວຍເຫລືອປະເທດລາວ, ການເພີ່ມຄວາມຮູ້, ການສ້າງນັກຊ່ຽວຊານ ແລະ ການແກ້ໄຂບັນຫາຕົວຈິງຕ່າງໆ.
ທ່ານ ເອກອັກຄະລັດຖະທູດ ອົດສະຕາລີ ຍັງກ່າວຕື່ມວ່າ: ການຮ່ວມມື ລະຫວ່າງ ກອງທຶນ Fred Hollows ຈາກປະເທດອົດສະຕາລີ ກັບ ສູນປິ່ນປົວ ແລະ ຮັກສາສຸຂະພາບຕາ, ກະຊວງສາທາລະນະສຸກ ແມ່ນໄດ້ມີການຮ່ວມມືກັນມາແຕ່ປີ 2008 ເປັນຕົ້ນມາ. ເຊິ່ງເປັນການຮ່ວມມືທີ່ມີເປົ້າຫມາຍ ໃນການສ້າງຄວາມເຂັ້ມແຂງແກ່ການປິ່ນປົວ ແລະ ປ້ອງກັນ ເພື່ອບໍ່ໃຫ້ມີພະຍາດຕາບອດ ເຊິ່ງເປັນອຸປະສັກ ຕໍ່ການພັດທະນາເສດຖະກິດ-ສັງຄົມ ໂດຍສະເພາະຢູ່ເຂດຊົນນະບົດ ທີ່ຫ່າງໄກ. ການມອບ-ຮັບ ພາຫານະ ຄັ້ງນີ້ ແມ່ນເປັນລົດກະບະ ຈຳນວນ 2 ຄັນ ເພື່ອນຳໃຊ້ເຂົ້າໃນການປະຕິບັດຫນ້າທີ່ວຽກງານການປິ່ນປົວ ແລະ ຮັກສາສຸຂະພາບຕາ ໃນບັນດາແຂວງພາກເຫນືອຂອງລາວ, ໂດຍມອບໃຫ້ກັບພະແນກ ສາທາລະນະສຸກແຂວງຫລວງພະບາງ ແລະ ແຂວງອຸດົມໄຊ.
ສຳລັບພາຫານະ ທີ່ມອບໃຫ້ພະແນກສາທາລະນະສຸກ ແຂວງ ຫລວງພະບາງ ແມ່ນຈະໄດ້ເຄື່ອນໄຫວວຽກງານໂຄງການເປີດກວ້າງຮັກສາສຸຂະພາບຕາ ແບບຍຶນຍົງ ໃນ 3 ແຂວງ ຄື: ແຂວງຫລວງພະບາງ, ໄຊຍະບູລີ ແລະ ແຂວງວຽງຈັນ. ສ່ວນພາຫານະ ທີ່ມອບໃຫ້ສາທາລະນະສຸກແຂວງອຸດົມໄຊ ແມ່ນຈະໄດ້ໃຊ້ເຄື່ອນໄຫວ ໂຄງການ ເປີດກວ້າງ ຮັກສາສຸຂະພາບຕາ ແບບຍືນຍົງ ໃນ ຈຳນວນ 4 ແຂວງ ເຊັ່ນ: ແຂວງອຸດົມໄຊ, ຫລວງນ້ຳທາ, ບໍ່ແກ້ວ ແລະ ແຂວງຜົ້ງສາລີ.
