ພິທີລົງນາມບົດບັນທຶກຄວາມເຂົ້າໃຈ ດ້ານການຮ່ວມມື ລະຫວ່າງ ກຸ່ມບໍລິສັດ ພົງສະຫວັນ ແລະ ບໍລິສັດ ວິສາວະກຳກົນຈັກ ແຫ່ງ ສປ ຈີນ ເພື່ອສ້າງໂຄງການໄຟຟ້າຖ່ານຫີນ ທີ່ແຂວງຄຳມ່ວນ ທີ່ໃຫ້ກຳລັງການຜະລິດ 2,000 ເມກາວັດ ຄາດຈະໃຊ້ຖ່ານຫີນທີ່ນໍາເຂົ້າປີລະ 6 ລ້ານໂຕນ. ທ່ານ ຈັນທອນ ສິດທິໄຊ ຜູ້ອໍານວຍການບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ໄດ້ກ່າວວ່າ: ຈຸດປະສົງຫຼັກ ແມ່ນເພື່ອປະຕິບັດຕາມແນວທາງພັດທະນາເສດຖະກິດ-ສັງຄົມ ໃນການຫັນປະເທດລາວໃຫ້ສາມາດເຊື່ອມຈອດໃນບັນດາປະເທດພາກພື້ນອາຊຽນ ເຊິ່ງ ກຸ່ມບໍລິສັດ ພົງສະຫວັນ ກໍ່ພະຍາຍາມດືງເອົາກຸ່ມກ້ອນ ບັນດາທຸລະກິດຂະໜາດໃຫຍ່ຈາກຕ່າງປະເທດເຂົ້າມາຮ່ວມມືກັບບໍລິສັດ. ບໍລິສັດ ວິສາວະກຳກົນຈັກ ຈາກ ສປ ຈີນ ແມ່ນມີປະສົບການທາງດ້້ານການກໍ່ສ້າງ ເພາະການລົງທຶນ ເກືອບ 30 ປະເທດໃນທົ່ວໂລກ ເຊິ່ງເຂົາເຈົ້າຈະໃຫ້ບົດຮຽນໃຫ້ບໍລິສັດພວກເຮົາ ເຊິ່ງການເຊັນສັນຍາເທື່ອນີ້ ຄາດວ່າຈະໃຫ້ສາມາດຈັດຕັ້ງປະຕິບັດການກໍ່ສ້າງໃນປີ 2018 ເຊິ່ງເວລາໃນການກໍ່ສ້າງ 48 ເດືອນໃຫ້ສຳເລັດ, ອາຍຸການໃຊ້ງານ 30 ປີຕາມອາຍຸຂອງເຄື່ອງຈັກ, ສ່ວນຖ່ານຫີນທີ່ຈະມາໃຊ້ແມ່ນຈະນຳເຂົ້າຈາກຕ່າງປະເທດ ປີລະ 6 ລ້ານໂຕນສຳລັບ ໄຟຟ້າທີ່ຜະລິດໄດ້ 2,000 ເມກາວັດ ຈະຂາຍພາຍໃນປະເທດ ແລະ ສົ່ງຂາຍໄປຕ່າງປະເທດ. ມູນຄ່າໃນການລົງທຶນປະມານ 3 ຕື້ໂດລາສະຫະລັດ ແລະ ຄາດວ່າຈະໃຊ້ແຮງງານທັງໝົດ 3 ພັນຄົນ. ສ່ວນທາງດ້ານຜົນກະທົບຕໍ່ສິ່ງແວດລ້ອມບັນຫາດັ່ງກ່າວ ທ່ານຍອມຮັບຈະໃຫ້ກະທົບໜ້ອຍທີ່ສຸດ ເຊິ່ງໃນການລົງທຶນຄັ້ງນີ້ ຈະໃຫ້ຄວາມສຳຄັນຫຼາຍ ເພາະທຸລະກິດນີ້ໃຊ້ເວລາຍືນຍາວ ສືບຕໍ່ຮອດເຊັ່ນລູກຫຼານ. ທ່ານ ຈາງຊູນ ປະທານ ແລະ ຜູ້ອຳນວຍການບໍລິສັດ ວິສາວະກຳກົນຈັກ ຈາກ ສປ ຈີນ ໄດ້ກ່າວວ່າ: ບໍລິສັດ ວິສາວະກຳກົນຈັກ ຈາກ ສປ ຈີນ ມີປະສົບການໃນການລົງທຶນຢູ່ ສປ ຈີນ ແລະ ຕ່າງປະເທດເປັນເວລາດົນນານ, ເປັນບໍລິສັດທີ່ມີຄວາມເຂັ້ມແຂງຮອບດ້ານ ພ້ອມດຽວກັນນັ້ນກໍ່ມີທຸລະກິດຢູ່ຫຼາຍກວ່າ 30 ປະເທດໃນທົ່່ວໂລກ. ສຳລັບການເຊັນສັນຍາກັບກຸ່ມບໍລິສັດ ພົງສະຫວັນ ໃນຄັ້ງນີ້ ກໍ່ເປັນການຮ່ວມມືກັນ ເພື່ອພັດທະນາໂຄງການໄຟຟ້າຖ່ານຫີນ. ພ້ອມນັ້ນ ກໍ່ຈະສາມາດຕອບສະໜອງໄດ້ຕາມແນວທາງຂອງ ລັດຖະບານ 2 ປະເທດ ຕາມວິໄສທັດ ໜຶ່ງແລວທາງ ໜຶ່ງເສັ້ນທາງ. ເຊິ່ງໂຄງການດັ່ງກ່າວຈະເປັນທາແຮງໜຶ່ງ ທີ່ຈະຊ່ວຍໃນການພັດທະນາ ສປປ ລາວ ໃຫ້ມີຄວາມຈະເລີນຮຸ່ງເຮືອງຂຶ້ນເລື້ອຍໆ. ພິທີເຊັນສັນຍາມີຂຶ້ນວັນທີ 14 ມິຖຸນາຜ່ານມາ ທີ່ໂຮງແຮມ ຄາວພາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ປະລິນຍາເອກ ອ໋ອດ ພົງສະຫວັນ, ປະທານ ກຸ່ມບໍລິສັດ ພົງສະຫັວນ, ທ່ານ ຈາງຊູນ ປະທານ ແລະ ຜູ້ອຳນວຍການ ບໍລິສັດ ວິສາວະກຳກົນຈັກ ຈາກ ສປ ຈີນ ພ້ອມດ້ວຍແຂກຈາກ 2 ພາກສ່ວນເຂົ້າຮ່ວມ.
Editor: ຕະວັນ ແສງສະຫວັນ
