ພິທີສະເຫລີມສະຫລອງ ວັນສື່ມວນຊົນ ແລະ ການພີມຈຳຫນ່າຍ ຄົບຮອບ 67 ປີ ( 13 ສິງຫາ 1950-13 ສິງຫາ 2017 ) ໄດ້ຈັດຂື້ນທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ ໃນວັນທີ 11 ສິງຫາ 2017 ທີ່ີຜ່ານມາ. ໃນພິທີ ເຂົ້າຮ່ວມ ມີລັດຖະມົນຕີ, ຮອງລັດຖະມົນຕີ, ຫົວຫນ້າຫ້ອງການ, ຫົວຫນ້າກົມ-ຮອງກົມ, ຫົວຫນ້າບັນນາທິການ, ຜູ້ອຳນວຍການ ແລະ ພະນັກງານວິຊາການ, ນັກບັນນາທິການ, ນັກຂ່າວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ 200 ກວ່າທ່ານ. ໃນພິທີສະເຫລີມສະຫລອງ ວັນສື່ມວນຊົນ ແລະ ການພີມຈຳຫນ່າຍ ຄົບຮອບ 67 ໃນປີ 2017 ນີ້, ທ່ານ ສະຫວັນຄອນ ຣາຊະມຸນຕຣີ ຮອງລັດຖະມົນຕີ ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ ໄດ້ລາຍງານໃຫ້ເຫັນເຖິງການເຕີບໃຫຍ່ ແລະ ຂະຫຍາຍຕົວ ຂອງສື່ມວນຊົນ ແລະ ບາດກ້າວການຂະຫຍາຍຕົວຂອງວຽກງານການພີມຈຳຫນ່າຍ ໃນ ສປປ ລາວ ທາງດ້ານປະລິມານ ແລະ ຄຸນນະພາບ ຕະຫລອດໄລຍະ 67 ປີ.
ປະຈຸບັນ ສື່ສິ່ງພີມ ຄື: ຫນັງສືພີມ ແລະ ວາລະສານທຸກຊະນິດ ໄດ້ເພີ່ມຂື້ນເປັນ 144 ສະບັບ, ໃນນີ້ມີຫນັງສືພີມ 29 ສະບັບ ( ເປັນລາຍວັນ 11 ສະບັບ) ວາລະສານ 111 ສະບັບ ແລະ ໃບຂ່າວ 4 ສະບັບ ທີ່ຈຳຫນ່າຍເຖິງທຸກກະຊວງ-ທະບວງ, ກົມ, ນະຄອນຫລວງ ແລະ ຕ່າງແຂວງ ດ້ວຍຮູບແບບການຂາຍ ແລະ ໃຫ້ອ່ານລ້າ ຈຳນວນຫນຶ່ງ. ສື່ວິທະຍຸກະຈາຍສຽງ ລວມມີ 63 ສະຖານີ, ສູນກາງ 11 ສະຖານນີ ແລະ ທ້ອງຖິ່ນ 52 ສະຖານີ. ສາມາດກະຈາຍສຽງ ກວມ 95 ສ່ວນຮ້ອຍ ຈອງພາກພື້ນທົ່ວປະເທດ. ສ່ວນສື່ໂທລະພາບ ລວມມີ 37 ສະຖານີ, ສູນກາງ 9 ສະຖານີ ແລະ ທ່ອງຖີ່ນ 28 ສະຖານນີ ທີ່ສາມາດອອກອາກາດ ພາບ-ສຽງ ທາງພາກພື້ນດິນ ກວມ 80 ສ່ວນຮ້ອຍ ແລະ ຜ່ານດາວທຽມ ກວມ 100 ສ່ວນຮ້ອຍ ຂອງພາກພື້ນທົ່ວປະເທດ. ເຊັ່ນດຽວກັນ ກັບຫນັງສືພີມ, ວິທະຍຸ ແລະ ໂທລະພາບ ແມ່ນໄດ້ນຳໃຊ້ອິນເຕີເນັດ ກໍ່ຄືລະບົບຢູທູບ ໃນການກະຈາຍເນື້ອໃນຂອງຕົນອອກສູ່ສັງຄົມ. ສຳລັບລະບົບໂທລະໂຄງສາມາດຕິດຕັ້ງຢູ່ 4,835 ບ້ານ, ໃນຈຳນວນ 8,662 ບ້ານໃນທົ່ວປະເທດ ໃນນັ້ນລວມມີບ້ານ ແລະ ເມືອງ ສາມສ້າງ ອັນໄດ້ປະກອບສ່ວນຖ່າຍທອດຂ່າວວິທະຍຸກະຈາຍສຽງ ໄປສູ່ປະຊາຊົນ ແລະ ແຈ້ງຂ່າວ ເຕືອນກ່ຽວກັບພະຍາດ ຫລື ໄພພິບັດທາງທຳມະຊາດ ໃນທ້ອງຖິ່ນ.
ວຽກງານຮູບເງົາ ໄດ້ມີບົດບາດສຳຄັນຄຽງຄູ່ກັບວຽກງານສື່ມວນຊົນ ປະເພດຕ່າງໆ, ປີ 1 ຜ່ານມາ ກົມຮູບເງົາ ກົມຮູບເງົາໄດ້ຜະລິດ ແລະ ສະຫນອງຮູບເງົາປະເພດຮູບເງົາເລື່ອງ ແລະ ສາລະຄະດີຕ່າງໆ ອອກໂຄສະນາຜ່ານສື່ໂທລະພາບ ແລະ ທາງອິນເຕີເນັດ ໄດ້ຫລາຍຂື້ນ, ໃນໂອກາດ ວັນສື່ມວນຊົນ ແລະ ການພີມຈຳຫນ່າຍ ຄົບຮອບ 67 ປີ,
ທ່ານ ສາດສະດາຈານ ດຣ. ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ,ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດໂອລົມ ເຊິ່ງທ່ານໄດ້ເນັ້ນກ່ຽວກັບການຮັກສາ ແລະ ພັດທະນາອົງການສື່ມວນຊົນ, ລວມທັງການພີມຈຳຫນ່າຍ ໃຫ້ໄດ້ຮັບການພັດທະນາ ຢ່າງມີຄຸນນະພາບ, ມີຄວາມທັນສະໄຫມ, ວ່ອງໄວທັນເຫດການ, ເປັນກະບອກສຽງອັນແຫລມຄົມ ຂອງພັກ-ລັດ, ເປັນເວທີຂອງມະຫາຊົນ ແລະ ເຂື່ອມໂຍງກັບສາກົນ. ນອກຈາກນັ້ນ ບຸກຄະລາກອນສື່ມວນຊົນ ແລະ ການພີມຈຳຫນ່າຍ ແມ່ນຕ້ອງໄດ້ພັດທະນາຕົນເອງ ໃຫ້ມີຄວາມຮູ້ ແລະ ການເຊື່ອມຊືມແນວທາງ-ອຸດົມການສັງຄົມນິຍົມ ຂອງພັກ, ມີແນວຄິດ ແລະ ທັດສະນະການເມືອງທີ່ຖືກຕ້ອງ, ມີຈັນຍາບັນວິຊາຊີບ ທີ່ເຄັ່ງຄັດ ແລະ ປະຕິບັດຫນ້າທີ່ ຢ່າງຖືກຕ້ອງຕາມກົດຫມາຍວ່າດ້ວຍສື່ມວນຊົນ ແລະ ກົດຫມາຍວ່າດ້ວຍການພີມຈຳຫນ່າຍ, ທັງມີຄວາມຮູ້ວິຊາການໃນລະດັບທີ່ແນ່ນອນ ທັນສະໄຫມ.
Editor: ກຳປານາດ ລັດຖະເຮົ້າ
