ເພື່ອເຮັດໃຫ້ບັນດາຂະແຫນງການສື່ສານມວນຊົນ ທັງພາກລັດ ແລະ ເອກະຊົນ ຢູ່ ສປປ ລາວ ໄດ້ຮັບຮູ້ເຖິງແນວທາງປ່ຽນແປງວຽກງານສື່ ໃນຍຸກທັນສະໄຫມ ໃຫ້ຫລາຍຂື້ນ, ສະມາຄົມນັກຂ່າວ ແຫ່ງ ສປປ ລາວ ຮ່ວມກັບສະຖາບັນສື່ມວນຊົນ ແລະ ໂຄສະນາ ສສ ຫວຽດນາມ, ຈັດພິທີ ປາຖະກາຖາ ພາຍໃຕ້ຫົວຂໍ້: ການປ່ຽນແປງໃນຍຸກໃຫມ່ຂອງສື່ ແລະ ສິ່ງທ້າທາຍຕໍ່ສື່ມວນຊົນ, ໂດຍການເປັນປະທານຂອງ ທ່ານ ສະຫວັນຄຶນ ຣາຊມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ , ທັງເປັນປະທານສະມາຕົມນັກຂ່າວ ແຫ່ງ ສປປ ລາວ. ມີ ທ່ານ ຮອງສາດສະດາຈານ ດຣ. ເຈືອງ ຫງອກ ນາມ ຫົວຫນ້າອຳນວຍການສະຖາບັນສື່ມວນຊົນ ແລະ ໂຄສະນາ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ພ້ອມດ້ວຍຄະນະ, ເຂົ້າຮ່ວມມີຫົວຫນ້າກົມ, ຮອງກົມ, ຫົວຫນ້າສະຖານີ,. ບັນນາທິການ ແລະ ສື່ມວນຊົນລາວ ທູກຂະແຫນງການ ເຂົ້າຮ່ວມ. ພິທີປາຖະກາຖາ ດັ່ງກ່າວ ໄດ້ຈັດຈື້ນທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ ໃນວັນທີ 21 ສິງຫາ 2017 ທີ່ຜ່ານມາ.
ທ່ານ ຮອງສາດສະດາຈານ ດຣ. ເຈື່ອງ ຫງອກ ນາມ ຫົວໜ້າອຳນວຍການສະຖາບັນສື່ມວນຊົນ ແລະ ໂຄສະນາ ສສ. ຫວຽດນາມ ໄດ້ກ່າວບາງຕອນກ່າວວ່າ: ປັດຈຸບັນແມ່ນເກີດມີສື່ໃໝ່ຂຶ້ນມາ ຄື: ສື່ສັງຄົມອອນລາຍ, ສະເພາະໃນປະເທດ ສສ ຫວຽດນາມ ປັດຈຸບັນມີອົງການສື່ສານມວນຊົນທັງໝົດ 1,000 ກວ່າແຫ່ງ, ໃນນັ້ນ; ສື່ສິ່ງພິມ ມີ 859 ສະບັບ (ສື່ສິ່ງພິມ ທີ່ໃຫຍ່ກວ່າໝູ່ແມ່ນໜັງ ສືພິມປະຊາຊົນ, ໜັງສືພິມກອງທັບ ແລະ ບັນດາໜັງສືພິມທີ່ເປັນກະບອກສຽງຂອງພັກ ແລະ ເລຂາຄະນະພັກແຂວງຕ່າງໆ); ສຳລັບສື່ເອເລັກໂຕຼນິກ ມີທັງໝົດ 135 ເວັບໄຊ; ສື່ວິທະຍຸ ແລະ ໂທລະພາບ ທັງໝົດ 67 ແຫ່ງ.
ນອກນັ້ນ, ຍັງມີເວັບໄຊຂອງສຳນັກງານອົງການຈັດຕັ້ງຕ່າງໆ ລ້ວນແຕ່ມີເວັບໄຊຂອງຕົນເອງ, ປັດຈຸບັນຢູ່ຫວຽດນາມ ມີ 18,000 ຄົນ, ທີ່ໄດ້ຮັບອະນຸຍາດມີບັດສື່ມວນຊົນ, ມີ 5,000 ຄົນ ພວມກຳລັງເຮັດວຽກຢູ່ອົງການສື່ສານມວນຊົນຂະແໜງການຕ່າງໆ ແຕ່ຍັງບໍ່ທັນໄດ້ຮັບອະນຸຍາດ ໃຫ້ມີບັດສື່ມວນຊົນ. ທ່ານກ່າວຕື່ມວ່າ: ແຕ່ຄຽງຄູ່ກັບການຂະຫຍາຍຕົວຂະແໜງການສື່ສານມວນຊົນ ຄືແນວນັ້ນ, ກໍ່ພາໃຫ້ເກີດມີການຄຸ້ມຄອງພົບຄວາມຫຍຸ້ງຍາກ, ບາງສື່ ຫຼື ນັກຂ່າວ ກໍ່ມີການນຳສະ ເໜີຂ່າວທີ່ບິດເບືອນຄວາມຈີງ ຫຼື ຂໍ້ມູນບໍ່ຊັດເຈນ ໂດຍສະເພາະແມ່ນສື່ສັງຄົມອອນລາຍ (ສື່ທີ່ມີການລາຍງານແບບລັກສະນະນ້ຳຖ້ວມທົ່ງ ຫຼື ບໍ່ມີມູນຄວາມຈິງ), ທີ່ເປັນສື່ສາທາລະນະກວ້າງສາມາດເຜີຍແຜ່ອອກໄປໄດ້ທົ່ວໂລກໄດ້ຢ່າງວ່ອງໄວ ສະນັ້ນ, ເຮັດໃຫ້ມີຄວາມທ້າທາຍຫຼາຍ.
ສຳລັບການມີສື່ສານມວນຊົນຫຼາຍກໍ່ມີທັງແງ່ດີ ຄື: ເຮັດໃຫ້ວຽກສື່ສານມວນຊົນ ຫຼື ການນຳ ເໜີຂ່າວມັນກວ້າງຂວາງ ແລະ ວ່ອງໄວ ແຕ່ອັນບໍ່ດີ ຄື: ເຮັດໃຫ້ມີການຂັດແຍ່ງເຊິ່ງກັນ ແລະ ກັນ ລະຫວ່າງນັກຂ່າວນຳກັນ, ອົງການສື່ນຳກັນ ເຮັດໃຫ້ການລາຍງານຂ່າວບາງອົງການເກີດມີການໂຄສະນາ ຫຼື ນຳສະເໜີຂ່າວ ໄປທາງລົບຫຼາຍຂຶ້ນ ຫຼື ບາງສື່ ກໍ່ສະເໜີຂໍ້ມູນທີ່ບໍ່ມີຄວາມຈິງ ເພື່ອດຶງດູດຄົນອ່ານສົນໃຈຂ່າວ, ບາງເທື່ອກໍ່ເກີດມີການຕໍ່ຕ້ານອົງການ ຫຼື ຈັດຕັ້ງຕົນເອງອີກດ້ວຍ.
Editor: ກຳປານາດ ລັດຖະເຮົ້າ
