ໃນວັນທີ 5 ກັນຍາ 2017 ກົມອະນາໄມ-ສົ່ງເສີມສຸຂະພາບ ກະຊວງສາທາລະນະສຸກ ພ້ອມດ້ວຍກົມຕຳຫຼວດສິ່ງແວດລ້ອມ ແລະ ຂະແໜງອຸດສາຫະກຳ ແລະ ການຄ້າ ໄດ້ລົງຕິດຕາມກວດກາການຈັດຕັ້ງປະຕິບັດກົດ ໝາຍ ແລະ ຂໍ້ຕົກລົງວ່າດ້ວຍການຄວບຄຸມຢາສູບ ຢູ່ຕາມບັນດາຮ້ານຄ້າທົ່ວໄປໃນນະຄອນຫຼວງວຽງຈັນ. ຜ່ານການລົງຕິດຕາມກວດກາຕົວຈິງ ຍັງພົບເຫັນຜະລິດຕະພັນຢາສູບບາງປະເພດ ທີ່ຜະລິດຢູ່ພາຍໃນ ແລະ ນຳເຂົ້າຈາກຕ່າງປະເທດ ຍັງບໍ່ທັນປະຕິບັດຕາມກົດໝາຍ ວ່າດ້ວຍການຄວບຄຸມຢາສູບຂອງ ສປປ ລາວ ທີ່ໄດ້ຄວບຄຸມກາຕິດສະຫຼາກພື້ນທີ່ໜ້າຊອງຢາສູບທີ່ມີຮູບພາບ ແລະ ຄຳເຕືອນຜົນຮ້າຍຂອງການສູບຢາ ບໍ່ໃຫ້ຫຼຸດ 75% ແຕ່ກໍ່ຍັງມີບາງບໍລິສັດທີ່ເປັນຕົວແທນຈຳໜ່າຍຜະລິດຕະພັນຢາສູບ ລະເມີດ ແລະ ຝ່າຝືນກົດລະບຽບລັກລອບນຳເຂົ້າມາຂາຍຢູ່ຕາມຮ້ານຄ້າທົ່ວໄປ ເຊິ່ງຂໍ້ຕົກລົງກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການຄວບຄຸມຢາສູບນີ້ ແມ່ນໄດ້ເລີ່ມປະຕິບັດມາແຕ່ເດືອນພະຈິກ 2016.
ທ່າງດ້ານທ່ານນາງ ພອນສະຖຽນ ໄຊຍະລາດ ກົມອະນາໄມ-ສົ່ງເສີມສຸຂະພາບ ກ່າວວ່າ: ຜະລິດຕະພັນຢາສູບທີ່ຜະລິດຢູ່ພາຍໃນປະເທດ ແລະ ນຳເຂົ້າມາຈາກຕ່າງປະເທດ ເພື່ອຈຳໜ່າຍໃນລາວ ລວມທັງຮ້ານຄ້າປອດພາສີ ຕ້ອງໄດ້ພິມຄຳເຕືອນສຸຂະພາບໃຫ້ຖືກຕ້ອງຕາມຫຼັກການ ທີ່ກົມອະນາໄມ-ສົ່ງເສີມສຸຂະພາບ ກະຊວງສາທາລະນະສຸກ ເປັນຜູ້ກຳນົດຄຳເຕືອນສຸຂະພາບທີ່ເປັນຮູບພາບ ແລະ ຂໍ້ຄວາມຕົວໜັງສືເປັນພາສາລາວ ເພື່ອສະໜອງໃຫ້ແກ່ຜູ້ດຳເນີນທຸລະກິດຜະລິດ ແລະ ນຳເຂົ້າຜະລິດຕະພັນຢາສູບ ໃນການຈັດພິມຕາມຕົ້ນສະບັບ ແລະ ຕ້ອງມີການກຳນົດຄຳເຕືອນສຸຂະພາບໃໝ່ໃນທຸກ 2 ປີ ຫຼື ແຕ່ລະໄລຍະ ໂດຍອີງຕາມຜົນການຄົ້ນຄວ້າທາງດ້ານວິຊາການ ທັງພາຍໃນ ແລະ ສາກົນ ສຳລັບຄຳເຕືອນສຸຂະພາບ ແລະ ຂໍ້ຄວາມປະກອບດ້ວຍ 6 ແບບຄື: ແບບທີ 1 ຮູບ ແລະ ຂໍ້ຄວາມຄຳເຕືອນຄວັນຢາສູບພາໃຫ້ເປັນມະເຮັງປອດ ແບບທີ 2 (ຕາມລໍາດັບ) ພາໃຫ້ເປັນມະເຮັງປາກ ພາໃຫ້ເສັ້ນເລືອດສະໝອງແຕກ ຫົວໃຈວາຍ ແຂ້ວດໍາ-ປາກເໝັນ ແລະ ແບບທີ 6 ຂ້າຄົນທາງຂ້າງ.
ສຳລັບ ມາດຕະການຕໍ່ຜູ້ລະເມີດ ບຸກຄົນ ນິຕິບຸກຄົນໃດ ຫຼື ອຸດສາຫະກຳຢາສູບໃດ ຫາກໄດ້ລະເມີດຕໍ່ຂໍ້ຫ້າມຕາມທີ່ໄດ້ກຳນົດໄວ້ໃນມາດຕາທີ 12 ຂອງດຳລັດ ການພິມຄຳເຕືອນສຸຂະພາບ ແລະ ສະຫຼາກໃສ່ວັດຖຸຫຸ້ມຫໍ່ຜະລິດຕະພັນຢາສູບ ຈະຖືກປະຕິບັດຕາມມາດຕະການ ຄື: ຄັ້ງທີ 1 ກ່າວເຕືອນສຶກສາອົບຮົມໃຫ້ຂຽນໃບປະຕິຍານ ຄັ້ງທີ 2 ອາຍັດ ແລະ ປັບໃໝ 1 ເທົ່າຕົວຂອງມູນຄ່າຜະລິດຕະພັນຢາສູບທີ່ຂາຍຕາມຕະຫຼາດ ໂດຍຄິດໄລ່ຕາມຈຳນວນຜະລິດຕະພັນທີ່ກວດພົບຕົວຈິງ ຫຼື ຕາມໃບນຳສົ່ງສິນຄ້າທີ່ທາງການຮັບຮູ້ ຄັ້ງທີ 3 ອາຍັດ ແລະ ປັບໃໝ 3 ເທົ່າຕົວຂອງມູນຄ່າສິນຄ້າຕາມທີ່ກ່າວໄວ້ ໃນຄັ້ງທີ 2 ຄັ້ງທີ 4 ອາຍັດ ແລະ ປັບໃໝ 5 ເທົ່າຕົວຂອງມູນຄ່າສິນຄ້າຕາມທີ່ກ່າວໄວ້ໃນຄັ້ງທີ 2 ພ້ອມທັງສະເໜີການຈັດຕັ້ງທີ່ມີສິດຖອນໃບອະນຸຍາດດຳເນີນທຸລະກິດແບບຊົ່ວຄາວ ຫຼື ຖາວອນ ຕາມກໍລະນີເບົາ ຫຼື ໜັກ.
Editor: ຕະວັນ ແສງສະຫວັນ
