ກອງປະຊຸມເຜີຍແຜ່ ຍຸດທະສາດໃນການຈັດຕັ້ງປະຕິບັດການເພີ່ມ ວິຕະມິນແຮ່ທາດໃສ່ອາຫານຢູ່ ສ ປ ປ ລາວ ໄດ້ຈັດຂຶ້ນເມື່ອບໍ່ດົນ ມານີ້ ທີ່ໂຮງແຮມດອນ ຈັນພາເລດ ນະຄອນຫລວງວຽງຈັນ. ແຜນປະຕິບັດງານດັ່ງກ່າວແມ່ນໄດ້ຮັບການພັດທະນາຂື້ນ ໂດຍພາຍໃຕ້ການຊີ້ນຳຂອງກອງເລຂາຄະນະກຳມະການດ້ານໂພຊະນາການແຫ່ງຊາດ, ກະຊວງສາທາລະນະສຸກ ຊື່ງໄດ້ຮັບການຊ່ວຍເຫຼືອດ້ານວິຊາການຈາກອົງການອາຫານໂລກ ແລະ ໂດຍຜ່ານການປຶກສາ ຫາລືກັບພາກສ່ວນທີ່ກ່ຽວຂ້ອງ, ວິຊາການຈາກກະຊວງຕ່າງໆ, ຄູ່ຮ່ວມພັດທະນາ ແລະ ພາກສ່ວນເອກກະຊົນ. ແຜນປະຕິ ບັດງານສະບັບນີ້ແມ່ນເອກກະສານ ເພີ່ມເຕີມຕໍ່ກັບຍຸດທະສາດແຫ່ງຊາດດ້ານໂພຊະນາການ ຮອດປີ 2025 ແລະ ແຜນປະຕິບັດງານ 2016 -2020.
ທ່ານ ຄຳພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກ ໄດ້ກ່າວວ່າ “ການເພີ່ມວິຕະມິນແຮ່ທາດໃສ່ອາຫານ ເປັນນື່ງໃນມາດຕະການບູລິມະສິດຂອງຍຸດທະສາດແຫ່ງຊາດ ດ້ານໂພຊະນາການ ຮອດ 2025 ແລະ ແຜນປະຕິບັດງານ 2016-2020. ການເພີ່ມຈຸລະສານອາຫານໃສ່ອາຫານແມ່ນເພື່ອໃຫ້ມີອາຫານບໍລິໂພກທີ່ອຸດົມສົມບູນດ້ວຍໂພຊະນາການ ແລະ ຈະຊ່ວຍປ້ອງກັນພະຍາດ, ສ້າງພູມຄຸ້ມກັນ ແລະ ປັບປຸງໃຫ້ມີການຈະເລີນເຕີບໂຕທາງຮ່າງກາຍ ແລະ ສະໝອງມີການພັດທະນາ”.
ທ່ານນາງ ຊາຣາ ກໍຣດອນ-ກິບຊັນ, ຫົວໜ້າ ແລະ ຜູ້ຕາງໜ້າອົງການອາຫານໂລກ ໄດ້ກ່າວວ່າ: ແຜນປະຕິບັດງານດັ່ງກ່າວ ຈະຊ່ວຍໃຫ້ບັນດາຜູ້ຕັດສິນບັນຫາ ແລະ ວາງແຜນໂຍບາຍຂອງລັດຖະບານ ສາມາດເຮັດ ວຽກ ແລະ ຮັບຮອງເອົາບັນດານະໂຍບາຍ ແລະ ລະບຽບຫຼັກການກ່ຽວກັບວຽກງານການເພີ່ມວິຕະມິນແຮ່ທາດ ໃສ່ອາຫານ. ໃນໄລຍະ ຍາວ ກໍ່ສາມາດປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ, ໂດຍສະເພາະເປົ້າໝາຍທີ 02.
ແຜນຍຸດທະສາດໃນການຈັດຕັ້ງປະຕິບັດການເພີ່ມວິຕະມິນແຮ່ທາດໃສ່ອາຫານ ເປັນບາດກ້າວທີ່ສຳຄັນໃນການສ້າງສະພາບແວດລ້ອມ ທີ່ເອື້ອອຳນວຍຕໍ່ການເພີ່ມວິຕະມິນແຮ່ທາດໃສ່ອາຫານ ຊື່ງຮັບປະກັນໃຫ້ພາກລັດຖະບານ ແລະ ພາກເອກະຊົນ ສາມາດນຳໄປຈັດຕັ້ງປະຕິບັດໃຫ້ແທດເໝາະກັບເປົ້າໝາຍຂອງຕົນ. ອີງຕາມຄຳແນະນຳຈາກບົດວິເຄາະຊ່ອງຫວ່າງການເຂົ້າເຖິງອາຫານທີ່ມີໂພຊະນາການໃນປີ 2017 ແລະ ໜື່ງໃນບູລິມະສິດທີ່ໄດ້ກຳນົດໄວ້ໃນຍຸດທະສາດແຫ່ງຊາດດ້ານໂພຊະນາການ ຮອດປີ 2025 ແລະ ແຜນປະຕິບັດງານ 2016–2020 ແມ່ນການພັດທະນາແຜນຍຸດທະສາດເພື່ອປະຕິບັດການເພີ່ມວິຕະມິນແຮ່ທາດໃສ່ອາຫານ ແລະ ຕ້ອງມີການຈັດຕັ້ງປະຕິບັດລັກສະນະລວມສູນ ໂດຍການມີສ່ວນຮ່ວມຂອງຫຼາຍຂະແໜງການ
Editor: ກຳປານາດ ລັດຖະເຮົ້າ
