ເພື່ອເຮັດໃຫ້ລາວເຮົາ ເປັນປະເທດ ທີ່ປອດພະຍາດວໍ້ ໃນປີ 2030 ປ້ອງກັນສຸຂະພາບຂອງຄົນ ແລະ ລຶບລ້າງພະຍາດ ທັງໃນສັດ - ໃນຄົນ ດັ່ງນັ້ນ, ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຈີ່ງໄດ້ຈັດກອງປະຊຸມວັນຕ້ານພະຍາດວໍ້ໂລກ 28 ກັນຍາ ໃຫ້ແກ່ພາກສ່ວນທີ່ກ່ຽວຂ້ອງ ແລະ ສື່ມວນຊົນລາວ ເຊີ່ງກອງປະຊຸມດັ່ງກ່າວໄດ້ຈັດຂື້ນ ທີ່ຣິສອດ ນາປ່າກວາງ, ທ່າລາດ ເມືອງແກ້ວອຸດົມ, ແຂວງວຽງຈັນ. ໂດຍການເປັນປະທານ ຂອງທ່ານ ຣັດຕະນະໄຊ ເພັດສຸວັນ ຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ພ້ອມນີ້ຍັງມີຜູ້ຕາງຫນ້າຈາກກົມ, ສູນ, ພະແນກສາທາລະນະສຸກແຂວງ ແລະ ສື່ມວນຊົນລາວ ເຂົ້າຮ່ວມ.
ທ່ານ ຣັດຕະນະໄຊ ເພັດສຸວັນ ຫົວຫນ້າກົມຄວບຄຸມພະຍາດຕິດຕໍ່ ໄດ້ກ່າວວ່າ: ການຈັດກອງປະຊຸມຄັ້ງນີ້ ເພື່ອເປັນການເຜີຍແຜ່ຄວາມຮູ້ພື້ນຖານກ່ຽວກັບພະຍາດຕິດຕໍ່ ຈາກສັດ ສູ່ຄົນ ໂດຍສະເພາະ ພະຍາດວໍ້, ທັງນີ້ເພື່ອໃຫ້ທຸກຄົນໃນສັງຄົມໄດ້ຮັບຮູ້ ແລະ ເຂົ້າໃຈກ່ຽວກັບພະຍາດວໍ້ ທີ່ເປັນອັນຕະລາຍ, ໃນແຕ່ລະປີມີຄົນຕາຍຍ້ອນພະຍາດວໍ້ ເປັນຈໍານວນບໍ່ຫນ້ອຍ, ພະຍາດວໍ້ ແມ່ນເປັນພະຍາດທີ່ເກົ່າແກ່ ພະຍາດນີ້ແມ່ນເຊື້ອໄວຣັດຊະນິດຫນຶ່ງ ທີ່ເຂົ້າໄປທໍາລາຍເສັ້ນປະສາດ ແຕ່ຖ້າຫາກຄົນ ຫລື ສັດ ຫາກຕິດເຊື້ອພະຍາດວໍ້ ນີ້ແລ້ວ ມີຄວາມສ່ຽງຕໍ່ການເສຍຊີວິດ ເພາະຍັງບໍ່ມີຢາຊະນິດໃດ ທີ່ຈະປີ່ນປົວຄົນ ຫລື ສັດ ທີ່ຕິດເຊື້ອພະຍາດນີ້ໃຫ້ຫາຍດີໄດ້. ສະນັ້ນ ຈີ່ງມີຄວາມຈໍາເປັນຕ້ອງໄດ້ປ້ອງກັນ ແລະ ສິ່ງສໍາຄັນຫລັກໆ ຄືບໍ່ໃຫ້ ຫມາ, ແມວ, ເຈຍ ກັດ ຫລື ຂູ້ດ ສໍາລັບສັດລ້ຽງແມ່ນຕ້ອງໄດ້ເອົາໄປສັກຢາກັນວໍ້ ໃຫ້ຄົບ 5 ເຂັມ, ຖ້າຫາກຖືກໝາ, ແມວກັດ ຫລື ຂູດ ຕ້ອງໄດ້ໄປຫາແພດຫມໍ ທັນທີ. ເຖິງແມ່ນວ່າ ຫນາ ຫລື ແມວ ນັ້ນ ຈະສັກຢາກັນວໍ້ ແລ້ວກໍ່ຕາມ, ຖ້າຫາກຖຶກກັດ-ຂູດ ຫາກບໍ່ໄດ້ສັກຢາ ອາການຈະສາມາດເລີ່ມສະແດງອອກ ແຕ່ 4 ວັນ ເຖິງ 6 ປີ, ເຊີ່ງເຊື້ອໄວຣັດຊະນິດນີ້ຈະເຂົ້າໄປໃນເສັ້ນປະສາດ ແລ້ວຄ່ອຍໆເສື່ອມເຂົ້າໄປຫາສະໝອງ ອາການເລີມຕົ້ນແມ່ນຈະມີລັກສະນະຕື່ນເຕັ້ນ, ບໍ່ຍາກສໍາຜັດກັບນໍ້າ, ຄວາມຈື່ຈໍາເລີ່ມບໍ່ດີ ແລ້ວກ້າວໄປສູ່ການເສຍສະຕີ ແລະ ເສຍຊີວິດ ໃນໄລຍະຕໍ່ມາ.
ກອງປະຊຸມຄັ້ງນີ້ ຜູ້ເຂົ້າຮ່ວມ ໄດ້ຮັບຟັງຄວາມສໍາຄັນ ກ່ຽວກັບວັນຕ້ານພະຍາດວໍ້ໂລກ ນໍາສະເຫນີໂດຍວິຊາການ ຈາກກົມຄວບຄວາມພະຍາດຕິດຕໍ່ ເຊີ່ງຍົກໃຫ້ເຫັນດ້ານສຸຂະພາບທົ່ວໄປ ກ່ຽວກັບພະຍາດວໍ້ ໃນ ສປປ ລາວ, ຄວາມເປັນມາ ແລະ ກິດຈະກໍາທີ່ໄດ້ປະຕິບັດ ສະຫລອງວັນຕ້ານພະຍາດວໍ້ໂລກ 28 ກັນຍາ, ສະພາບການເກີດພະຍາດວໍ້ ໃນຄົນ, ສັດ, ພະຍາດວໍ່ ຈາກສັດ ສູ່ຄົນ, ສາເຫດຂອງການແຜ່ເຊື້ອ, ກົນໄກການຕິດເຊື້ອ, ການສັງເກດກໍລະນີ ເມື່ອພົບສັດທີ່ຫນ້າສົງໄສ, ການປ້ອງກັນ, ການບົ່ງມະຕີ, ການປີ່ນປົວ, ການຄວບຄຸມ ແລະ ສິ່ງທ້າທາຍອື່ນໆ.
Editor: ກຳປານາດ ລັດຖະເຮົ້າ
