"ກອງປະຊຸມ ວິຊາການຂະແຫນງວັດທະນະທຳ ທົ່ວປະເທດ ຄັ້ງທີ 1 ໃນວັນທີ 12/07/2016"
ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ ໄດ້ເປີດກອງປະຊຸມວິຊາການຂະແຫນງການວັດທະນະທຳ ທົ່ວປະເທດ ຄັ້ງທີ 1 ຂື້ນຢູ່ທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ ໂດຍພາຍໃຕ້ການເປັນປະທານຂອງ "ທ່ານ ບົວເງິນ ຊາພູວົງ" ຮອງລັດຖະມົນຕີ ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ, ພ້ອມດ້ວຍພາກສ່ວນທີ່ກ່ຽວຂ້ອງ ຂະແໜງວັດທະນະທຳ ໃນຂອບເຂດທົ່ວປະເທດ ເຂົ້າຮ່ວມ.
ໃນກອງປະຊຸມ, ຄັ້ງນີ້ "ທ່ານ ບົວເງິນ ຊາພູວົງ" ຮອງລັດຖະມົນຕີ ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ ໄດ້ກ່າວວ່າ: ກອງປະຊຸມວິຊາການ ຂະແຫນງວັດທະນະທຳ ທົ່ວປະເທດຄັ້ງທີ 1 ນີ້, ເພື່ອສະຫລຸບ ແລະ ຕິລາຄາຄືນ ກ່ຽວກັບວຽກງານ ຖວທ ໃນໄລຍະ 5 ປີ ຜ່ານມາ, ແລະ ເຜີຍແຜ່ວີໄສທັດ-ແຜນຍຸດທະສາດທິດທາງ, ແຜນການເຄື່ອນໄຫວ ແລະ ພັດທະນາວຽກງານ ຖວທ ໃນໄລຍະ 5 ປີ ຕໍ່ຫນ້າ (2016-2020) ໂດຍສະເພາະຜົນການຈັດຕັ້ງປະຕິບັດແຜນພັດທະນາວຽກງານສີລະປະການສະແດງ ໄລຍະ 5 ປີ ຜ່ານມາ (2011-2015) ເຫັນວ່າ: ຂົງເຂດສີລະປະການສະແດງ ຍັງສຶບຕໍ່ເປັນແບບຢ່າງໃນການເຄື່ອນໄຫວ ນຳເອົາແນວທາງນະໂຍບາຍຂອງພັກ-ລັດ, ປະກອບສ່ວນເຂົ້າໃນພາລະກິດປ້ອງກັນຊາດ, ປ້ອງກັນຄວາມສະຫງົບ ແລະ ແຜນພັດທະນາເສດຖະກິດ-ສັງຄົມ ຂອງຊາດ. ເຜີຍແຜ່ປຸກລະດົມ, ສຶກສາສັງຄົມ ທັງພາຍໃນ ແລະ ຕ່າງປະເທດ. ເປັນແບບຢ່າງໃນການອະນຸຮັກ, ປົກປັກຮັກສາ ແລະ ພັດທະນາວຽກງານສີລະປະການສະແດງ ດ້ວຍບາດກ້າວທີ່ເຕີບໃຫຍ່ ເຂັ້ມແຂງຂື້ນຢ່າງບໍ່ຢຸດຢັ້ງ ແລະ ເຮັດໃຫ້ສັງຄົມ ມີຊີວິດ-ຊີວາດີຂື້ນ ນອກນັ້ນ, ຍັງເຮັດໃຫ້ຮິດຄອງປະເພນີອັນດີງາມຂອງປະຊາຊົນບັນດາເຜົ່າ ໄດ້ຮັບການພັດທະນາ ໃຫ້ມີຄວາມຢຶນຍົງ ແລະ ກາຍເປັນພື້ນຖານວັດທະນະທຳ ແຫ່ງຊາດ ຢ່າງແທ້ຈິງ.
ສຳລັບທິດທາງແຜນການຕໍ່ຫນ້າ 2016-2020 ເພີ່ມທະວີການຄຸ້ມຄອງວຽກງານສີລະປະການສະແດງ ຕາມດຳລັດວ່າດ້ວຍ ສີລະປະການສະແດງ ສະບັບເລກທີ 09/ລບ, ລົງວັນທີ 14 ມັງກອນ 2015 ໃຫ້ເປັນເອກະພາບກຫັນທົ່ວປະເທດ ແລະ ສຶບຕໍ່ເອົາໃຈໃສ່ ຮັກສາວັດທະນະທຳ ເປັນຮາກເຫງົ້າແກ່ນສານ ແຫ່ງເອກະລັກ ແລະ ຄວາມຢຶນຢົງຄົງຕົວຂອງຊາດ, ສຶບຕໍ່ປັບປຸງຍົກລະດັບວິຊາການ, ວິຊາສະເພາະຂອງບັນດາກອງສະແດງ ໃຫ້ມີຄວາມເຕີບໃຫຍ່ເຂັ້ມແຂງ, ຊຸກຍູ້ຂະບວນການປະດິດຄິດແຕ່ງດົນຕຣີ, ເພງຮ້ອງ, ຂັບ-ລຳ, ບົດຟ້ອນ, ລະຄອນເວທີ ແລະ ລາຍການກາຍະສິນ ໃຫ້ເປັນຜະລິດຕະພັນວັດທະນະທຳ ດ້ານສີລະປະການສະແດງ ທີ່ມີຄຸນຄ່າ ຫລາຍຮູບ-ຫລາຍສີ, ເປັນແບບຢ່າງໃນຂະບວນການເຄື່ອນໄຫວ ສີລະປະວັນນະຄະດີ ຂອງຊາດ.
