"ສະຫະພັນແມ່ຍິງ ແຂວງ ຈຳປາສັກ ປາຖະກາຖາ ເລົ່າມູນເຊື້ອປະຫວັດຄວາມເປັນມາ ວັນທີ 20 ກໍລະກົດ ຄົບຮອບ 61 ປີ"
ພິທີປາຖະກະຖາເລົ່າມູນເຊື້ອປະຫວັດຄວາມເປັນມາ ຂອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ (ວັນທີ 20 ກໍລະກົດ 1955-20 ກໍລະກົດ 2016) ຄົບຮອບ 61 ປີ. ເຊິ່ງໄດ້ມີຂຶ້ນໃນວັນທີ 18 ກໍລະກົດ 2016 ຢູ່ທີ່ໂຮງແຮມຈຳປາສັກແກຣນ.
ໃຫ້ກຽດເຂົ້າຮ່ວມເປັນປະທານໂດຍ "ທ່ານ ສົມສະໜິດ ບຸດຕິວົງ" ຄະນະປະຈໍາພັກແຂວງ ຮອງເຈົ້າແຂວງ ແຂວງ ຈໍາປາສັກ. ເຊິ່ງເຂົ້າຮ່ວມໃນພິທີຄັ້ງນີ້ ມີຄະນະປະທານ, ຄະນະບໍລິຫານງານສະຫະພັນແມ່ຍິງແຂວງ, ອະດີດການນຳ, ແມ່ປ້າອາວຸດໂສບຳນານ, ພັນລະຍາການນຳ, ສະມາຄົມນັກທຸລະກິດຍິງ, ປະທານ-ຮອງປະທານ ພ້ອມດ້ວຍສະມາຊິກສະຫະພັນແມ່ຍິງ ອ້ອມຂ້າງແຂວງ,ຫ້ອງການສະຫະພັນແມ່ຍິງແຂວງ, ສະຫະພັນແມ່ຍິງຈາກ 10 ຕົວເມືອງ ແລະ ແຂກຖືກເຊີນຈາກອົງການຈັດຕັ້ງມະຫະຊົນຂັ້ນແຂວງເຂົ້າຮ່ວມທັງໝົດ 2,610 ທ່ານ.
ໂດຍການໃຫ້ກຽດຂຶ້ນເລົ່າມູນເຊື້ອ ປະຫວັດຄວາມເປັນມາຂອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ (ວັນທີ 20 ກໍລະກົດ 1955-20 ກໍລະກົດ 2016) ຄົບຮອບ 61 ປີ ຂອງ ທ່ານ ນາງ ວາດສະໜາ ສີລິມາ ກຳມະການພັກແຂວງ ປະທານສະຫະພັນແມ່ຍິງແຂວງຈຳປສັກ ບັນລະຍາຍໃນຄັ້ງນີ້ ເພື່ອຢາກໃຫ້ພະນັງງານ ລັດຖະກອນ ໃນພະແນກໄດ້ຮັບຮູ້ ແລະ ລະນຶກເຖິງ ເຫດການສຳຄັນຕ່າງໆ ທາງປະຫວັດສາດ, ມູນເຊື້ອຕໍ່ສູ້ ອັນພິລະອາດຫານ, ເດັດດ່ຽວໜຽວແໜ້ນ ຂອງແມ່ຍິງລາວ ທີ່ໄດ້ຄຽງບ່າຄຽງໄຫຼ່ກັບເພດຊາຍໃນການຕໍ່ສູ້ ຕ້ານພວກສັກດີນາ ແລະ ພວກລ່າເມືອງຂຶ້ນແບບເກົ່າ ແລະ ໃໝ່, ຮູ້ວິທີການນຳພາອັນສະຫຼຽວສະຫຼາດຍາດໄດ້ໄຊຊະນະແຕ່ລະບັ້ນຮົບ ພາຍໃຕ້ການນຳພາຂອງພັກ, ຄວາມສະເໝີພາບບົດບາດຍິງ-ຊາຍ, ທາງດ້ານການເມືອງ-ເສດຖະກິດ, ວັດທະນະທຳ-ສັງຄົມ ເທື່ອລະກ້າວ. ຈາກນັ້ນ, ກໍ່ໄດ້ມີການມອບໃບຍ້ອງຍໍ ແລະ ຂອງຂວັນ (ເງິນສົດລວມມູນຄ່າ 4 ລ້ານກວ່າກີບ) ໃຫ້ແກ່ບັນດາແມ່ປ້າບຳນານ ຈຳນວນ 38 ທ່ານ. ກ່າວມອບໂດຍ ທ່ານ ສົມສະໜິດ ບຸດຕິວົງ ຄະນະປະຈຳພັກແຂວງ, ຮອງເຈົ້າ ແຂວງຈຳປາສັກ ແລະ ໄດ້ມອບໃບກຽດຕິຄຸນໃຫ້ບັນດາທ່ານ ທີ່ອຸປະຖຳໃນງານກິດຈະກຳ ວັນທີ 20 ກໍລະກົດ 2016 ໃນນັ້ນປະກອບມີພາກສ່ວນຫ້ອງວ່າການປົກຄອງແຂວງຈຳປາສັກ, ວິທະຍາໄລເຕັກນິກວິຊາຊີບ, ໂຮງງານເບຍລາວ ແລະ ກຸ່ມບໍລິສັດ ຫົງຄຳພາກໃຕ້, ບໍລິສັດ CSC, ບໍລິສັດດາວເຮືອງ, ກົງສູນໃຫຍ່ຫວຽດນາມປະຈຳພາກໃຕ້ ກ່າວມອບໂດຍ ທ່ານນາງ ວາດສະໜາ ສີລິມາ ກຳມະການພັກແຂວງ, ປະທານສະຫະພັນແມ່ຍິງແຂວງຈຳປາສັກ.
ຕອນທ້າຍຍັງໄດ້ຮັບຟັງການໃຫ້ຄຳໂອ້ລົມ ການໃຫ້ທິດເຍືອງທາງໃນການຈັດຕັງປະຕິບັດວຽກງານຈາກ ທ່ານ ສົມສະໜິດ ບຸດຕິວົງ ຄະນະປະຈຳພັກແຂວງ ຮອງເຈົ້າແຂວງໆຈຳປາສັກ ທ່ານໄດ້ຍ້ອງຍໍຊົມເຊີຍຕໍ່ຜົນງານໃນຫຼາຍດ້ານທີ່ເອື້ອຍນ້ອງແມ່ຍິງສາມາດຍາດມາໄດ້ໃນຜ່ານມາ ໃນການຮັກສາມູນເຊື້ອ ອັນພິລະອາດຫານຂອງແມ່ຍິງລາວ ຍາມໃດກໍ່ຄຽງບ່າຄຽງໄຫຼ່ ກັບເພດຊາຍໃນການຕໍ່ສູ້ອັນສະຫຼຽວສະຫຼາດ ອົງອາດກ້າຫານໃຫ້ສູງເດັ່ນຂຶ້ນຢ່າງບໍ່ຢຸດຢັ້ງ ແລະ ທ່ານຍັງໄດ້ຮຽກຮ້ອງມາຍັງແມ່ຍິງລາວບັນດາເຜົ່າ ໃນທົ່ວແຂວງຈົ່ງເພີ່ມທະວີຄວາມສາມັກຄີ ເປັນປຶກແຜ່ນແໜ້າໜາ, ຕັ້ງໜ້າເສີມຂະຫຍາຍມູນເຊື້ອຮັກຊາດ, ຮັກລະບອບປະຊາທິປະໄຕ ປະຊາຊົນ, ມູນເຊື້ອສາມັກຄີປອງດອງຊາດ ພ້ອມກັນນັ້ນຍັງໄດ້ຮັກສາຮີດຄອງປະເພນີວັດທະນະທຳອັນດີງາມຂອງແມ່ຍິງລາວ ໄວ້ເຊິ່ງເປັນມູນເຊື້ອ ໃຫ້ຄົງຢູ່ຄູ່ກັບແມ່ຍິງລາວຕະຫຼອດໄປ.
ຂອບໃຈ ຂ່າວ: ຈາກສະຫະພັນແມ່ຍິງແຂວງຈຳປາສັກ
