ຕາມການລາຍງານແຫລ່ງຂ່າວທ້ອງຖິ່ນ ທີ່ແຂວງເຊກອງ ວັນທີ 26/07/2017 ວານນີ້, ເກີດເຫດຝົນຕົກຕິດຕໍ່ກັນຫຼາຍວັນ ຊຶ່ງເຮັດໃຫ້ລະດັບນ້ຳຕາມສາຍຫ້ວຍຕ່າງໆ ເພີ່ມສູງຂຶ້ນເລື້ອຍໆ ຈົນເກີດນ້ຳຖ້ວມຫຼາຍພື້ນທີ່ຂອງເທສະບານແຂວງເຊກອງ ສົ່ງຜົນໃຫ້ປະຊາຊົນຈຳນວນໜຶ່ງຕ້ອງຂົນເຄື່ອງໃຊ້ສອຍທີ່ຈຳເປັນຈາກທີ່ຢູ່ອາໄສໄປຍັງສະຖານທີ່ສູງ ແລະ ປອດໄພ.
ອິງຕາມການລາຍງານ ຂອງປະຊາຊົນບ້ານໂພນຄຳ ເມືອງລະມາມ, ແຂວງເຊກອງ ໃຫ້ຮູ້ວ່າ: ໃນລະຫວ່າງ ວັນທີ 24-26 ກໍລະກົດ 2017 ນີ້ ເກີດມີຝົນຕົກໃນລະດັບຄ່ອຍຫາແຮງຈົນເຮັດໃຫ້ນ້ຳໃນສາຍຫ້ວຍຕ່າງໆ ທີ່ໄຫຼຜ່ານເທສະບານແຂວງເຊກອງ ໂດຍສະເພາະ ສາຍຫ້ວຍປາດຸກ ເພີ່ມສູງຂຶ້ນເລື້ອຍໆ ຊຶ່ງມາຮອດເວລາປະມານ 21.00 ໂມງຂອງວັນທີ 25 ກໍລະກົດ ນ້ຳຈາກຫ້ວຍດັ່ງກ່າວໄດ້ໄຫຼເຂົ້າຖ້ວມເຮືອນ ແລະ ເນື້ອທີ່ການຜະລິດຂອງປະຊາຊົນ ຈຳນວນໜຶ່ງ ໄດ້ຮັບຜົນເສຍຫາຍ.
ແນວໃດກໍຕາມ ຕໍ່ກັບເຫດການດັ່ງກ່າວ ທາງການນຳເມືອງລະມາມ ກໍຄື ແຂວງເຊກອງ ໄດ້ສັ່ງໃຫ້ເຈົ້າໜ້າທີ່ກ່ຽວຂ້ອງ ໄດ້ນຳເອົາລົດຈົກໄປນຳເອົາກິ່ງໄມ້ ແລະ ສິ່ງເສດເຫຼືອຕ່າງໆ ອອກຈາກຮູທໍ່ເພື່ອລະບາຍນໍ້າຕາມເສັ້ນທາງຊອຍ ເພື່ອເປັນການລະບາຍນ້ຳລົງສູ່ແມ່ນ້ຳເຊກອງ ຊຶ່ງປັດຈຸບັນເຫັນວ່າ ລະດັບນ້ຳມີການລົດລົງຕາມລຳດັບແລ້ວ.
Editor: ກຳປານາດ ລັດຖະເຮົ້າ
