ອີງຕາມການສະຫຼຸບສະຖິຕິອຸບັດຕິເຫດທົ່ວປະເທດປະຈໍາເດືອນມັງກອນ 2018 ຂອງກົມຕໍາຫຼວດຈະລາຈອນ ກົມ ໃຫຍ່ຕໍາຫຼວດ ກະຊວງ ປກສ ເຊິ່ງຍົກໃຫ້ເຫັນວ່າ: ໃນເດືອນມັງກອນ 2018 ທົ່ວປະເທດມີອຸບັດຕິເຫດເກີດຂຶ້ນ ທັງໝົດ 595 ຄັ້ງ, ພາຫະນະເປ່ເພທັງໝົດ 1.004 ຄັນ, ເປ່ເພ ເລັກ ໜ້ອຍ 407 ຄັນ, ສົມຄວນ 575 ຄັນ, ໃຊ້ການບໍ່ໄດ້ 22 ຄັນ; ຄົນໄດ້ຮັບບາດເຈັບທັງໝົດ 889 ຄົນ, ບາດເຈັບ ເລັກໜ້ອຍ 399 ຄົນ, ສົມຄວນ 358 ຄົນ, ສາຫັດ 132 ຄົນ ແລະ ເສຍຊີວິດ 105 ຄົນ; ຈາກອຸບັດຕິເຫດດັ່ງກ່າວທີ່ເກີດ ຂຶ້ນເປັນພະນັກງານ 130 ຄົນ, ທະຫານ 44 ຄົນ, ຕໍາຫຼວດ 35 ຄົນ, ປະຊາຊົນ 437 ຄົນ, ກໍາມະກອນ 259 ຄົນ, ນັກຮຽນ 245 ຄົນ ແລະ ຕ່າງ ປະເທດ 55 ຄົນ; ໃນນັ້ນ, ລະເມີດກົດລະບຽບຈະລາຈອນ ໂດຍການດື່ມສິ່ງມຶນເມົາທັງໝົດ 111 ຄົນ, ອາຍຸບໍ່ເຖິງກະສຽນ 50 ຄົນ, ບໍ່ມີໃບຂັບຂີ່ 263 ຄົນ ແລະ ອື່ນໆ 64 ຄົນ; ຈາກອຸບັດຕິເຫດດັ່ງກ່າວ ທີ່ເກີດຂຶ້ນສ້າງຄວາມເສຍຫາຍ ເປັນເງິນ 10 ຕື້ 475 ລ້ານກວ່າກີບ.
ສະເພາະແຂວງທີ່ມີອຸບັດຕິເຫດເກີດຂຶ້ນ ແລະ ເສຍຊີວິດຫຼາຍກວ່າໝູ່ມີ ຄື: ນະຄອນຫຼວງວຽງຈັນ ມີອຸບັດຕິເຫດ ເກີດຂຶ້ນ 113 ຄັ້ງ, ມີຜູ້ເສຍຊີວິດທັງໝົດ 20 ຄົນ, ແຂວງຈໍາປາສັກ ມີອຸບັດຕິເຫດເກີດຂຶ້ນ 80 ຄັ້ງ, ມີຜູ້ເສຍຊີວິດ 11 ຄົນ, ແຂວງສະຫວັນນະເຂດ ມີອຸບັດຕິເຫດເກີດຂຶ້ນ 85 ຄັ້ງ, ມີຜູ້ເສຍຊີວິດ 10 ຄົນ, ແຂວງໄຊຍະບູລີ ມີອຸບັດຕິເຫດເກີດ ຂຶ້ນ 22 ຄັ້ງ, ມີຜູ້ເສຍຊີວິດ 9 ຄົນ ແລະ ແຂວງອື່ນໆ ອີກຈໍານວນໜຶ່ງ; ສ່ວນແຂວງທີ່ບໍ່ມີຜູ້ເສຍຊີວິດແມ່ນແຂວງໄຊສົມບູນ ແລະ ແຂວງອັດຕະປື.
ເພື່ອຮັບປະກັນໃຫ້ບັນຫາອຸບັດຕິເຫດຫຼຸດໜ້ອຍຖອຍລົງເທື່ອລະກ້າວ; ໃນນາມ, ຄະນະກົມຕໍາຫຼວດຈະລາຈອນ ກົມ ໃຫຍ່ຕໍາຫຼວດ ກະຊວງ ປກສ ຈະສືບຕໍ່ຊີ້ນໍາ-ນໍາພາ ກໍາລັງ ຕໍາຫຼວດຈະລາຈອນທີ່ຂຶ້ນກັບຄວາມຮັບຜິດຊອບໃນທົ່ວ ປະເທດ ເອົາໃຈໃສ່ປະຕິບັດໜ້າທີ່ວິຊາສະເພາະຢ່າງເຂັ້ມງວດ ສືບຕໍ່ລົງໂຄສະນາເຜີຍແຜ່ກົດລະບຽບການສັນຈອນຢູ່ ຕາມ ສະຖານທີ່ຕ່າງໆໃນຂອບເຂດທົ່ວປະເທດ ເພື່ອເຮັດໃຫ້ປະຊາຊົນທຸກຊັ້ນຄົນຮັບຮູ້, ເຂົ້າໃຈຕໍ່ກົດລະບຽບການ ສັນຈອນ ສາມາດນໍາໄປໝູນໃຊ້ເຂົ້າໃນການຂັບຂີ່ລົດໃນຊີວິດປະຈໍາວັນ ເພື່ອຫຼີກລ່ຽງບັນຫາເກີດອຸບັດຕິເຫດຕາມ ທ້ອງຖະໜົນ.
Editor: ກຳປານາດ ລັດຖະເຮົ້າ
