ທ່ານ ແສງເພັດ ເພັດດວງຈັນ ຫົວຫນ້າຫ້ອງການຖະແຫລງຂ່າວ, ວັດທະນະທຳ ແລະທ່ອງທ່ຽວ ເມືອງນານ ແຂວງຫລວງພະບາງ ແຈ້ງໃຫ້ຊາບວ່າ: ເຊົ້າວັນທີ 31 ກໍລະກົດ 2019 ສະພາບນໍ້າຖ້ວມຢູ່ 9 ບ້ານ ທີ່ຢູ່ລຽບຕາມແມ່ນໍ້ານານ, ໄດ້ລົດລົງແລ້ວ, ຍ້ອນບໍ່ມີຝົນຕົກລົງມາອີກ. ສຳລັບມື້ນີ້, ອຳນາດການປົກຄອງເມືອງ ແລະ ທຸກພາກສ່ວນ ທີ່ກ່ຽວຂ້ອງສືບຕໍ່ດໍາເນີນການເກັບກຳຂໍ້ມູນຄວາມເສຍຫາຍ ແລະ ຊ່ວຍເຫລືອຜູ້ໄດ້ຮັບຜົນກະທົບຈາກນໍ້າຖ້ວມເທື່ອນີ້.
ສະພາບນໍ້າຖ້ວມກະທັນຫັນ ຢູ່ 9 ບ້ານ, ຢູ່ລຽບຕາມແມ່ນໍ້ານານ, ເມືອງນານ ແຂວງຫລວງພະບາງ ຈາກຝົນຕົກໜັກແຕ່ຄືນວັນທີ 29 ກໍລະກົດ ຜ່ານມາ, ຕໍ່ໃສ່ຮຸ່ງເຊົ້າວັນທີ 30 ກໍລະກົດ 2019 ອີງຕາມລາຍງານຂອງເມືອງນານ ມີປະຊາຊົນ 500 ກວ່າຄອບຄົວ, ໄດ້ຮັບຜົນກະທົບ ເຊິ່ງອາໄສໃນ 9 ບ້ານ, ໜັກໜ່ວງກວ່າໝູ່ແມ່ນ 8 ບ້ານ ຄື: ບ້ານສີບຸນເຮືອງ, ສີມຸງຄຸນ, ໂພນຫີນ, ປ່າໄຜ່, ນາເລົາ, ນາຝາຍ, ນາເຄີນ ແລະ ບ້ານທາດ.
