ເມື່ອວັນທີ 25 ພຶດສະພາ 2017 ທີ່ຜ່ານມາ, ທີ່ໂຮງແຮມລາວພາຊາ, ກະຊວງສາທາລະນະສຸກ ໄດ້ຈັດກອງປະຊຸມ ປືກສາຫາລືກ່ຽວກັບຜົນການຄົ້ນຄວ້າ ຊ່ອງຫວ່າງໃນການເຂົ້າເຖິງອາຫານໂພຊະນາການ ຂື້ນ, ໂດຍການເປັນປະທານ ຂອງ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ພ້ອມນັ້ນຍັງມີ ຜູ້ຕ່າງຫນ້າຈາກອົງການສາກົນ ທີ່ກ່ຽວຂ້ອງ, ພະນັກງານ-ວິຊາການ ຈາກກົມ, ສູນ ແລະ ຫນ່ວຍງານຕ່າງໆອ້ອມຂ້າງກະຊວງສາທາລະນະສຸກ ເຂົ້າຮ່ວມ. ກອງປະຊຸມຄັ້ງນີ້, ໄດ້ຮັບຟັງການນຳສະເຫນີຜົນການວິເຄາະ ຊ່ອງຫວ່າງການເຂົ້າເຖິງອາຫານໂພຊະນະການ ໃຫ້ແກ່ບັນດາຄູ່ຮ່ວມພັດທະນາ ຂັ້ນສູນກາງ ແລະ ຂັ້ນທ້ອງຖິ່ນ ຈາກຂະແຫນງການທີ່ພົວພັນກັບການສົ່ງເສີມໂພຊະນາການ, ພ້ອມກັນນັ້ນ ຍັງໄດ້ມີການປຶກສາຫາລື ສົນທະນາຄົ້ນຄວ້າ ຊ່ອງຫວ່າງໂພຊະນາການ ໃນລາວ, ລະບົບມາດຕະການຫລາຍຂະແຫນງການທີ່ກ່ຽວຂ້ອງ ແລະ ມີສ່ວນຮ່ວມ. ການວິເຄາະໃຫ້ຄຳເຫັນໃນລະດັບຊາດ ກ່ຽວກັບການຕັດສິນໃຈໃນການຈັດຕັ້ງແຜນງານທີ່ເຫມາະສົມໃນອະນາຄົດ ລວມທັງການຈັດບູລິມະສິດຂອງບັນດາມາດຕະການ ແລະ ຄຳສະເຫນີດ້ານນະໂຍບາຍ ເພື່ອຊ່ວຍຕື່ມຊ່ອງຫວ່າງການຂາດໂພຊະນາການ ໃຫ້ແກ່ກຸ່ມເປົ້າຫມາຍ. ການວິເຄາະຊ່ອງຫວ່າງ ການເຂົ້າເຖິງອາຫານໂພຊະນາການ ເປັນການທົບທວນຢ່າງເລີກເຊີ່ງ ໂດຍອິງໃສ່ຂໍ້ມູນ ໃນ 2 ແບບ ຄືປະລິມານ ແລະ ຄຸນນະພາບ, ປະກອບກອບມີ: ຂໍ້ມູນກ່ຽວກັບການໄດ້ຮັບອາຫານໂພຊະນາການ, ການຄ້ຳປະກັນດ້ານສະບຽງອາຫານ, ລາຍຈ່າຍຂອງຄົວເຮືອນ ແລະ ສະພາບເສດຖະກິດ-ສັງຄົມ. ລວມເຖິງຮູບແບບມາດຕະການຕ່າງໆ, ໂດຍການນຳໃຊ້ ເຄື່ອງມືປະເມີນລາຄາອາຫານໂພຊະນາການຕ່ຳສຸດ. ການຄົ້ນຄວ້າຊ່ອງຫວ່າງການເຂົ້າເຖິງໂພຊະນາການ ຈະຊ່ວຍໃຫ້ສາມາດສ້າງຄວາມເຂັ້ມແຂງໃນການວິເຄາະສະພາບໂພຊະນາການ ແລະ ນຳໄປສູ່ການຕັດສິນໃຈໃນລະດັບນະໂຍບາຍກ່ຽວກັບມາດຕະການທີ່ສາມາດຊ່ວຍຕອບໂຕ້ ຫລື ແກ້ໄຂຊ່ອງຫວ່າງ ແລະ ການປັບປຸງການໄດ້ຮັບອາຫານ ໃນກຸ່ມເປົ້າຫມາຍ ທີ່ເປັນບູລິມະສິດ. ຂະບວນການແມ່ນເນັ້ນຫນັກໃສ່ປັບປຸງຄຸນນະພາບ ແລະ ການເຂົ້າເຖິງອາຫານທີ່ມີໂພຊະນະການ ໂດຍສະເພາະ ໃນໄລຍະ 1,000 ມື້ ທຳອິດຂອງຊີວິດ.
