ເຖິງ: ບັນດາບໍລິສັດ ລັດວິສາຫະກິດ ຫ້າງຮ້ານ ພະນັກງານ ທະຫານ ຕໍາຫຼວດ ຕະຫລອດຮອດພໍ່ແມ່ປະຊາຊົນບັນດາເຜົ່າ ຜູ້ນຳໃຊ້ລົດໃຊ້ຖະໜົນ ໃນທົ່ວນະຄອນຫຼວງວຽງຈັນ.ເລື່ອງ: ການຫ້າມດັດແປງ ຕໍ່ເຕີມສະພາບເຕັກນິກລົດຈັກ ມາເປັນລົດສາມລໍ້ ແລະ ການນໍາເອົາລົດສາມລໍ້ ທີ່ບໍ່ໄດ້ຕິດປ້າຍທະບຽນມາແລ່ນຢູ່ຕາມເສັ້ນທາງສາຍຫຼັກ ຢູ່ນະຄອນຫຼວງວຽງຈັນ. ອີງຕາມກົດໜາຍວ່າດ້ວຍຈະລາຈອນທາງບົກ ສະບັບເລກທີ 029/ປປຫ ລົງວັນທີ 17/2013. ໃນພາກທີ III ມາດຕະຖານເຕັກນິກ ແລະ ການຄຸ້ມຄອງຍານພາຫະນະ.
- ອີງຕາມແຈ້ງການ ການຢຸດຕິບໍ່ໃຫ້ຍົກຍ້າຍລົດ 3 ລໍ້ເຄື່ອງຕຸກໆ, ຈຳໂບ ເຂົ້າມາຂື້ນທະທຽນ ປ້າຍ ຢູ່ກຳແພງນະຄອນ ສະບັບເລກທີ 1317/ຄຂປກ ລົງວັນທີ 6/4/2001.
- ອີງຕາມດຳລັດວ່າດ້ວຍການປັບໃໜ ແລະ ມາດຕະການຕ່າງໆ ຕໍ່ຜູ້ລະເມີດລະບຽບກົດໜາຍກ່ຽວກັບການຈະລາຈອນທາງບົກ ແລະ ການປົກປັກຮັກສາເສັ້ນທາງຫຼວງ ສະບັບເລກທີ 188/ນຍ ລົງວັນທີ 3/7/2007.
ໃນໄລຍະຜ່ານມາສັງເກດເຫັນວ່າຍັງມີບັນດາ ອູ່ສ້ອມແປງລົດ ແລະ ບຸກຄົນຈໍານວນໜຶ່ງ ໄດ້ດັດແປງສະພາບເຕັກນິກພາຫະນະ ໂດຍສະເພາະ ລັດຈັກ ດັດແປງມາເປັນລົດສາມລໍ້ຕິດດ້ານຂ້າງ ແລະ ຕິດດ້ານຫຼັງ ເປົ້າໜາຍແມ່ນເພື່ອບັນທຸກຄົນ ຫຼື ສິ່ງຂອງຕ່າງໆ ຕໍ່ການກະທຳດັ່ງກ່າວ ເຫັນວ່າຜິດຕໍ່ລະບຽບກົດໜາຍ ທັງບໍ່ຮັບປະກັນທາງດ້ານເຕັກນິກ ແລະ ຄວາມປອດໄພໃນການສັນຈອນຕາມເສັ້ນນທາງຫຼວງ. ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຂໍແຈ້ງມາຍັງບັນດາທ່ານຮັບຊາບວ່າ ແລະ ປະຕິບັດດັ່ງນີ້:
1. ການດັດແປງ ຫຼື ຕໍ່ເຕີມລົດຈັກເປັນລົດສາມລໍ້ ນັ້ນຕ້ອງໄດ້ຢຸດຕິ ແລະ ຫ້າມນໍາມາແລ່ນຢູ່ຕາມເສັ້ນທາງສາຍຫຼັກຢ່າງເດັດຂາດ ລວມທັງລົດຈັກແກ່ລໍ້ຂົນເຫຼັກເສດ ແລະ ວັດສະດຸອື່ນໆ ເຊິ່ງເຮັດໃຫ້ບໍ່ຮັບປະກັນໃນການຈະລາຈອນ ແລະ ບໍ່ຈົບງານໃຫ້ແກ່ຕົວເມືອງ.
2. ຫ້າມເອົາລົດສາມລໍ້ ທີ່ບໍ່ຕິດແຜ່ນທະບຽບ ມາແລ່ນຢູ່ຕາມເສັ້ນທາງສາຍຫຼັກ ຢູ່ໃນນະຄອນຫຼວງວຽງຈັນ ເປັນຕົ້ນແມ່ນ: 1 ຖະໜົນໄກສອນ, 2. ຖະໜົນທ່າເດື່ອ (ແຕ່ 3 ແຍກທາດຂາວ-ສີແຍກໄຟອຳນາດໜອງໄຮ), 3. ຖະໜົນສຸພານຸວົງ, 4.ຖະໜົນລ້ານຊ້າງ, 5. ຖະໜົນສາມແສນໄທ, 6. ຖະໜົນເສດຖາທິລາດ, 7. ຖະໜົນມິດຕະພາບ ລາວ-ໄທ, 8. ຖະໜົນ 23 ສິງຫາ, 9. ຖະໜົນດົງປາຍນາ, 10. ຖະໜອງບອນ, 11. ຖະໜົນອາຊຽນ 12. ຖະໜົນໂພນສີນວນ 13. ຖະໜົນກຳແພງເມືອງ 14. ຖະໜົນດອນຈັນ 15. ຖະໜົນຂຸນບູລົມ 16. ຖະໜົນເຈົ້າຟ້າງຸ່ມ 17. ຖະໜົນເຈົ້າອານຸວົງ 18. ຖະໜົນເຈົ້າລາດນຸວົງ 19. ຖະໜົນຄູວຽງ 20. ຖະໜົນດົງປາລານ.
3. ມອບໃຫ້ຫ້ອງການໂຍທາທິການ 9 ຕົວເມືອງ ຈັດຕັ້ງເຜີຍແຜ່ ແຈ້ງການດັ່ງກ່າວນີ້ ໃຫ້ບັນດາມວນຊົນໄດ້ຮັບຮູ້ຢ່າງທົ່ວເຖິງ ແລະ ປະຕິບັດຢ່າງເຂັ້ມງວດ.
4. ມອບໃຫ້ຂະແໜງຄຸ້ມຄອງການຂົນສົ່ງ ສົມທົບກັບພະແນກຕໍາຫຼວດຈະລາຈອນ ນະຄອນຫຼວງ, ຕຳຫຼວດຈະລາຈອນ 9 ຕົວເມືອງ ເພື່ອຈັດຕັ້ງກວດກາຕົວຈິງ ຕາມເສັ້ນທາງເພື່ອແນະນຳ ຕັກເຕືອນ ຖ້າຍັງມີການລະເມີດແມ່ນຕ້ອງໄດ້ປະຕິບັດຕາມລະບຽບກົດໜາຍຢ່າງເຂັ້ນງວດ.
ຂ່າວ: ທອມ
Editor: ຕະວັນ ແສງສະຫວັນ
