ກິດຈະກຳຍ່າງ ສະເຫລີມສະຫລອງວັນງົດສູບຢາໂລກ 31 ພຶດສະພາ ໄດ້ຈັດຂື້ນໃນເຊົ້າວັນທີ 27 ພຶດສະພາ 2017 ນີ້, ທີ່ບໍລິເວນສວນປະຕູໄຊ. ດັ່ງທີ່ຮູ້ນຳກັນແລ້ວວ່າ: 31 ພຶດສະພາ ຂອງແຕ່ລະປີ ທົ່ວໂລກໄດ້ພ້ອມການຈັດກິດຈະກຳສະເຫລີມສະຫລອງ ວັນງົດສູບຢາໂລກ ເຊີ່ງປີ 2017 ນີ້ ເປັນປີທີ 29 ແລະ ສຳລັບ ສປປ ລາວ ເປັນວັນງົດສູບຢາແຫ່ງຊາດ ຄົບຮອບ 8 ປີ. ໃນແຕ່ລະປີ ອົງການອະນາໄມໂລກ ໄດ້ຮ່ວມກັບບັນດາປະເທດພາຄີສົນທິສັນຍາສາກົນ ວ່າດ້ວຍການຄວບຄຸມຢາສູບ ໄດ້ວາງຄຳຂວັນອອກ ຕາມສະພາບການຂອງໂລກ ແລະ ສຳລັບປີນີ້ ມີເນື້ອໃນວ່າ: ຢາສູບ ເປັນໄພຂົ່ມຂູ່ຕໍ່ການພັດທະນາ  ຄຳຂວັນທີ່ວາງອອກນັ້ນ ໄດ້ສະທ້ອນເຖິງຄວາມອັນຕະລາຍຂອງການສູບຢາ ແລະ ການສູດດົມຄວັນຢາສູບ ຕໍ່ເສດຖະກິດ-ສັງຄົມ ແລະ ສຸຂະພາບມວນມະນຸດ. ພ້ອມກັນນັ້ນ ຍັງເປັນການປຸກລະດົມໃຫ້ທົ່ວສັງຄົມຮັບຮູ້ວ່າ ການຄວບຄຸມຢາສູບ ເປັນພາລະ ແລະ ຫນ້າທີ່ຂອງໝົດທຸກຄົນ ທີ່ຈະຕ້ອງໄດ້ເອົາໃຈໃສ່ຮ່ວມກັນ.   ງານຄັ້ງນີ້, ໃຫ້ກຽດເຂົ້າຮ່ວມ ມີ ທ່ານ ສົມດີ ດວງດີ ຮອງນາຍົກ ລັດຖະມົນຕີ, ລັດຖະມົນຕີ ກະຊວງການເງິນ, ທ່ານ ຮອງສາດສະດາຈານ ດຣ. ບຸນກອງ ສີຫາວົງ  ລັດຖະມົນຕີກະຊວງສາທາລະນະສຸກ, ປະທານຄະນະກຳມະການແຫ່ງຊາດເພື່ອການຄວບຄຸມຢາສູບ. ພ້ອມນີ້ ຍັງມີທ່ານລັດຖະມົນຕີ, ຮອງລັດຖະມົນຕີ ຈາກກະຊວງຕ່າງໆ, ມີທ່ານຜູ້ຕາງຫນ້າອົງການອະນາໄມໂລກ, ທຸຕານຸທູດ ແລະ ພາກສ່ວນຕ່າງໆ, ນັກຮຽນ-ນັກສຶກສາ, ທີມງານອາສາສະຫມັກຫນ່ວຍງານ ແລະ ສູນທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.    ການສູດດົມ ຄວັນຢາສູບ ເປັນອັນຕະລາຍແກ່ສຸຂະພາບ, ທັງຜູ້ສູບເອງ ແລະ ຜູ້ຢູ່ອ້ອມຂ່້າງ ແຕ່ອັນຕະຫລາຍດັ່ງກ່າວນັ້ນ ພັດຍັງບໍ່ທັນເປັນທີ່ຮູ້ຈັກກັນ-ກວ້າງຂວາງ, ດັ່ງນັ້ນຜູ້ເຄີຍສູບຊຳພັດສູບໄປເລື້ອຍໆ ແລະ ຜູ້ບໍ່ເຄີຍຊຳພັດເລີ່ມສູບ. ໂດຍສະເພາະຊາວຫນຸ່ມ ເຍົາວະຊົນ, ການຮຽນແບບນຳຜູ້ໃຫຍ່ທີ່ສູບຢາ, ຫລົງໄຫລໄປຕາມໂຄສະນາອຸດສະຫະກຳຂອງຢາສູບ ໂດຍບໍ່ຮູ້ເຖິງພິດໄພອັນຕະລາຍຂອງການສູບຢາ ແລະ ການສູບດົມເອົາຄວັນຢາສູບ ອັນຕະລາຍຕໍ່ສຸຂະພາບຕົນເອງ ແລະ ຜູ້ຢູ້ໃກ້ຄຽງ ເຮັດໃຫ້ຄົນເສຍຊີວິດຍ້ອນພະຍາດ ທີ່ເກີດມາຈາກຢາສູບ 6 ລ້ານຄົນຕໍ່ປີ ໃນທົ່ວໂລກ. ຜົນການປະເມີນວິເຄາະ ຈະເພີ່ມຂື້ນ 10 ລ້ານຄົນ ຕໍ່ປີ ໃນປີ 2030.   ຢູ່ ສປປ ລາວ ອັດຕາການສູບຢາ ມີເຖິງ 27,9 ສ່ວນຮ້ອຍ, ຫລື 8 ແສນກວ່າຄົນຂອງຜູ້ອາຍຸ 15 ປີຂື້ນໄປ ແຕ່ຖ້າຄິດໄລ່ທຽບໃສ່ປະຊ່າກອນແລ້ວ ເຫັນວ່າເປັນອັນດັບ 2 ຂອງປະເທດອາຊຽນ ແລະ ມີຜູ້ຕາຍຍ້ອນພະຍາດ ທີ່ເກີດມາຈາກ ຢາສູບ 4.807 ຄົນ.  ເຖິງແມ່ນວ່າ ກົດຫມາຍວ່າດ້ວຍການຄວບຄຸມຢາສູບ ໄດ້ປະກາດໃຊ້ຢ່າງເປັນທາງການ ມາແລ້ວ ເປັນເວລາ 8 ປີ, ແຕ່ການຈັດຕັ້ງປະຕິບັດ ແລະ ການບັງຄັບໃຊ້ກົດຫມາຍດັ່ງກ່າວ ຍັງເຮັດບໍ່ທັນໄດ້ດີ ແລະ ຕໍ່ເນື່ອງ.   ການຈັດກິດຈະກຳຍ່າງ ຄັ້ງນີ້ ເປັນກິດຈະກຳທີ່ຈັດຂື້ນເພື່ອເປັນການເຊີນຊວນຜູ້ທີ່ສູບຢາ ໃຫ້ພະຍາຍາມອອກຈາກຢາສູບໃຫ້ໄດ້ ລວມທັງຜູ້ທີ່ບໍ່ທັນເຄີຍສູບ ໂດຍສະເພາະບັນດາລູກຫລາຍ ທີ່ເປັນຊາວຫນຸ່ມ-ເຍົາວະຊົນ ທີ່ເປັນຫນໍ່ແຫນງອານາຄົດຂອງຊາດ ຈົ່ງຫລີກລ້ຽງສິ່ງເສບຕິດຢາສູບ ແລະ ໃຊ້ເວລາຫັນມາອອກກຳລັງກາຍໃຫ້ຫລາຍຂື້ນ ເພື່ອສ້າງສຸຂະພາບຂອງຕົນໃຫ້ແຂງແຮງ, ປະຫຍັດເສດຖະກິດຂອງຕົນເອງ,ຄອບຄົວ -ສັງຄົມ ແລະ ປະເທດຊາດ. ຢາສູບເຮັດໃຫ້ເກີດພະຍາດຫລາຍຢ່າງ ເປັນແລ້ວມີຄ່າໃຊ້ຈ່າຍປິ່ນປົວສູງ ເປັນພາລະໃຫ້ກັບຄອບຄົວ ເຖິງ 77 ສ່ວນຮ້ອຍ ຂອງຄ່າໃຊ້ຈ່າຍທັງໝົດ.ກິດຈະກຳຄັ້ງນີ້ຮ່ວມຈັດຂື້ນໂດຍ ກະຊວງສາທາລະນະສຸກ, ຄະນະກຳມະການເພື່ອຄວບຄຸມຢາສູບ ແລະ ອົງການອະນາໄມໂລກ ປະຈຳ ສປປ ລາວ ມີມວນຊົນເຂົ້າຮ່ວມປະມານ 2 ພັນຄົນ.