ກອງປະຊຸມດັ່ງກ່າວໄດ້ຈັດຂື້ນເມື່ອທ້າຍເດືອນພຶດສະພາ 2017 ນີ້, ຢູ່ທີ່ສຳນັກງານຫ້ອງວ່າການປົກຄອງນະຄອນຫລວງວຽງຈັນ. ໂດຍການຮ່ວມເປັນປະທານ ມີ ທ່ານ ບຸນຕາ ເທບພະວົງ ຄະນະພັກນະຄອນຫລວງ, ເລຂາທິການສູນກາງຊາວຫນຸ່ມ, ເລຂາຄະນະບໍລິຫານງານຊາວຫນຸ່ມນະຄອນຫລວງວຽງຈັນ, ທ່ານ ຄຳປະສົງ ຈັນທະຈະເລີນ ປະທານສະມາຄົມ ນັກທຸລະກິດຫນຸ່ມ ນະຄອນຫລວງວຽງຈັນ ພ້ອມດ້ວຍຄະນະບໍລິຫານງານ, ຮອງປະທານ ແລະ ບັນດາສະມາຊິກນັກທຸລະກິດຫນຸ່ມ ນະຄອນຫລວງ ເຂົ້າຮ່ວມຢ່າງພ້ອມພຽງ. ກອງປະຊຸມຄັ້ງນີ້ ທ່ານ ຄຳປະສົງ ຈັນທະຈະເລີນ ປະທານສະມາຄົມນັກທຸລະກິດຫນຸ່ມນະຄອນຫລວງວຽງຈັນ ກ່າວວ່າ: ກອງປະຊຸມຄັ້ງນີ້ນັບວ່າເປັນຄັ້ງທຳອິດ ແລະ ເປັນສະໄຫມທີ 2 ຍ້ອນເຫັນໄດ້ເຖິງຄວາມສຳຄັນຂອງສະມາຄົມ ແລະ ການກ້າວໄປສູ່ການພັດທະນາ ໄປຕາມແນວທາງໃຫ້ດີຂື້ນເທື່ອລະກ້າວ. ສະມາຄົມນັກທຸລະກິດຫນຸ່ມ ຖືກສ້າງຕັ້ງຂື້ນ ພາຍໃຕ້ການຊີ້ນຳ-ນຳພາ ຢ່າງຮອບ ດ້ານ ຈາກຄະນະບໍລິຫານງານຊາວຫນຸ່ມ ນະຄອນຫລວງວຽງຈັນ, ການສ້າງຕັ້ງສະມາຄົມ ເພື່ອເຕົ້າໂຮມເອົານັກທຸລະກິດຊາວຄ້າຂາຍຕ່າງໆ ເຂົ້າມາເຄື່ອນໄຫວພາຍໃຕ້ກົດລະບຽບ, ຄຽງຄູ່ກັນນັ້ນ ສະມາຄົມຍັງປົກປ້ອງສະມາຊິກ ໃຫ້ມີຄວາມເຂັ້ມແຂງ. ກອງປະຊຸມຄັ້ງນີ້, ບັນດາສະມາຊິກ ຍັງໄດ້ຮັບຟັງເອກະສານທີ່ສຳຄັນຫລາຍຢ່າງ ກ່ຽວກັບການເຄື່ອນໄຫວ ແລະ ລະບຽບການຕ່າງໆ, ຢ່າງຖືກຕ້ອງ, ໂອກາດດັ່ງກ່າວ ທ່ານ ປະທານ ຍັງໄດ້ຮຽກຮ້ອງເຖິງສະມາຊິກທຸກຄົນ ຈົ່ງເຊີດຊູນ້ຳໃຈ ຄວາມສາມັກຄີ ຢ່າງກົງໄປ-ກົງມາ ບົນພື້ນຖານປະໂຫຍດລວມ ແລະ ເພື່ອຄວາມເຕີບໃຫຍ່ຂອງສະມາຄົມອີກດ້ວຍ. ນອກຈາກນີ້ ບັນດາສະມາຊິກ ຍັງໄດ້ປະກອບຄຳຄິດເຫັນໃສ່ຮ່າງລະບຽບຂອງສະມາຄົມ, ຂໍ້ກຳນົດໃນການສ້າງຕັ້ງກອງທຶນ ແລະ ທິດທາງແຜນການພັດທະນາໃນຕໍ່ຫນ້າ. ໂດຍສະເພາະການຍາດແຍ່ງແຫລ່ງທຶນ ເພື່ອສ້າງຄວາມເຂັ້ມແຂງໃຫ້ກັບສະມາຄົມໃນອະນາຄົດ. ກອງປະຊຸມໄດ້ດຳເນີນ ເປັນເວລາ 1 ຄາບ ຈິ່ງໄດ້ປິດລົງດ້ວຍຜົນສຳເລັດຫລາຍຢ່າງ.
