ກອງປະຊຸມບັນລຸເປົ້າໝາຍພັດທະນາແບບຍືນຍົງ ພາຍໃຕ້ການຈັດຕັ້ງປະຕິບັດສົນທິສັນຍາສາກົນ ວ່າດ້ວຍການຄວບຄຸມຢາສູບ ຈັດຂຶ້ນວັນທີ 26 ພຶດສະພາ 2017 ທີ່ໂຮງແຮມລາວພລາຊາ ເປັນປະທານຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານ ດາແປງ ລູໂອ Dapeng LUO ຮັກສາການຜູ້ຕາງໜ້າອົງການອະນາໄມໂລກປະຈຳລາວ, ມີຫົວໜ້າ ຮອງຫົວໜ້າຫ້ອງການ ຫົວໜ້າກົມ ຮອງກົມ ບັນດາຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ບຸນກອງ ສີຫາວົງ ກ່າວວ່າ: ວັນທີ 31 ພຶດສະພາຂອງແຕ່ລະປີ ເປັນວັນງົດຢາສູບໂລກ ເຊິ່ງປີນີ້ ຄົບຮອບ 29 ປີ ແລະ ວັນງົດຢາສູບແຫ່ງຊາດລາວ ຄົບຮອບ 8 ປີ ໃນແຕ່ລະປີ ຂະແໜງການກ່ຽວຂ້ອງໄດ້ພ້ອມກັນສະເຫຼີມສະຫຼອງວັນດັ່ງກ່າວ ສຳລັບປີນີ້ ແມ່ນສະເຫຼີມສະຫຼອງພາຍໃຕ້ຄຳຂວັນທີ່ວ່າ “ຢາສູບເປັນໄພຂົມຂູ່ຕໍ່ການພັດທະນາ” ຄຳຂວັນດັ່ງກ່າວ ມັນສະທ້ອນໃຫ້ເຫັນອັນຕະລາຍຂອງຢາສູບ ການສູດດົມເອົາຄວັນຢາສູບ ພ້ອມນີ້ຍັງເປັນການປຸກລະດົມໃຫ້ສັງຄົມຮັບຮູ້ວ່າ ການຄວບຄຸມຢາສູບເປັນພາລະ ແລະ ໜ້າທີ່ຂອງໝົດທຸກຄົນໃນທົ່ວສັງຄົມ ໃນແຕ່ລະປີ ຈະເຮັດໃຫ້ມີຜູ້ເສຍຊີວິດຈາກຢາສູບເຖິງ 6 ລ້ານຄົນໃນທົ່ວໂລກ ແລະ ຈະເພີ່ມຂຶ້ນ 10 ລ້ານຄົນຕໍ່ປີ ພາຍໃນປີ 2030 ໃນນີ້ ຢູ່ລາວກໍ່ມີອັດຕາການສູບຢາ ເຖິງ 8 ແສນກວ່າຄົນ ຫຼື ປະມານ 27,9% ຂອງຜູ້ທີ່ມີອາຍຸ 15 ປີຂຶ້ນໄປ ເມື່ອທຽບໃສ່ປະຊາກອນແລ້ວ ແມ່ນເປັນອັນດັບ 2 ຂອງອາຊຽນ ແລະ ມີຜູ້ເສຍຊີວິດປະມານ 4.387 ຄົນຕໍ່ປີ ຫຼື ປະມານ 13 ຄົນຕໍ່ມື້. ເຖິງແມ່ນວ່າ ສປປ ລາວ ຈະໄດ້ເຂົ້າເປັນພາຄີສົນທິສັນຍາສາກົນ ວ່າດ້ວຍການຄວບຄຸມຢາສູບມາໄດ້ 11 ປີ ແລະ ກົດໝາຍວ່າດ້ວຍການຄວບຄຸມຢາສູບ ປະກາດໃຊ້ຢ່າງເປັນທາງການມາແລ້ວ 8 ປີ ແຕ່ການຈັດຕັ້ງປະຕິບັດ ແລະ ການບັງຄັບໃຊ້ກົດໝາຍດັ່ງກ່າວ ຍັງບໍ່ທັນເຮັດໄດ້ດີ ໂດຍສະເພາະແມ່ນການປະຕິບັດເຂດປອດຄວັນຢາສູບ ການຈັດເກັບເງິນເຂົ້າກອງທຶນຄວບຄຸມຢາສູບ ມາດຕະການ ແລະ ອື່ນໆ.
Editor: ຕະວັນ ແສງສະຫວັນ
