ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ເດືອນ 6, ເມືອງວັງວຽງ ໄດ້ຈັດພິທີປູກຕົ້ນໄມ້ເພື່ອຄືນສູ່ທຳມະຊາດຂຶ້ນ ໃນວັນທີ 1 ມີຖຸນາ 2017 ຜ່ານມານີ້, ຢູ່ທີ່ ຕາດຫ້ວຍສານ ບ້ານນາຊົມ ເມືອງວັງວຽງ, ແຂວງວຽງຈັນ. ເຂົ້າຮ່ວມມີ ທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ, ມີ ທ່ານ ຊົງໄຊ ລັດຕະນະຄຳເພັດ ກຳມະການພັກເມືອງ ຫົວໜ້າຫ້ອງການກະສິກຳ - ປ່າໄມ້ເມືອງ ວັງວຽງ, ມີບັນດາທ່ານຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງ,ພະນັກງານທີ່ກ່ຽວຂ້ອງ ອຳນາດການປົກຄອງ ພ້ອມດ້ວຍປະຊາຊົນບ້ານນາຊົມແລະນ້ອງນ້ອຍນັກຮຽນເຂົ້າຮ່ວມ.ໃນພິທີ ທ່ານ ຄຳສີ ແກ້ວບຸນປັນ ຮອງຫົວໜ້າຫ້ອງການກະສິກຳ-ປ່າໄມ້ ເມືອງ ວັງວຽງ ໄດ້ຂຶ້ນລາຍງານກ່ຽວກັບການປູກຕົ້ນໄມ້ໃນຄັ້ງນີ້ວ່າ: ວັນປູກຕົ້ນໄມ້ 1 ມິຖຸນາ ຂອງທຸກໆປີ ແມ່ນວັນປູກຕົ້ນໄມ້ແຫ່ງຊາດ ທີ່ໄດ້ກຳນົດໄວ້ໃນແຜນຍຸດທະສາດຂອງກະຊວງ ກະສິກຳ-ປ່າໄມ້ ແຕ່ນີ້ຮອດ 2020 ໃຫ້ມີເນື້ອທີ່ປ່າໄມ້ກວມ 70% ຂອງເນື້ອທີ່ທົ່ວປະເທດ. ເມືອງວັງວຽງ ມາຮອດປະຈຸບັນມີເນື້້ອທີ່ປ່າໄມ້ ປະມານ 1 ແສນກວ່າເຮັກຕາ ເຊິ່ງລວມມີ 3 ປະເພດປ່າໄມ້ ຄື: ປ່າປ້ອງກັນ ມີ 81 ພັນກວ່າເຮັກຕາ, ປ່າສະຫງວນ 14 ພັນກວ່າເຮັກຕາ ແລະ ປ່າຜະລິດ ມີ 18 ພັນກວ່າເຮັກຕາ. ສະເພາະເນື້້ອທີ່ປູກປ່າ ປະຈຸບັນທົ່ວເມືອງ ມີ 1 ພັນກວ່າເຮັກຕາ ໃນນັ້ນ,ໄດ້ສົ່ງເສີມການປູກຢາງພາລາ ແລະ ປູກໄມ້ອຸດສະຫະກຳເພື່ອເປັນສິນຄ້າ. ເພື່ອເປັນການຜັນຂະຫຍາຍແຜນການປູກໄມ້ໃນປີ 2017 ນີ້ ເມືອງວັງວຽງໃຫ້ໄດ້ຕາມແຜນ ທາງຫ້ອງການກະສິກຳ ແລະ ປ່າໄມ້ ໄດ້ເອົາໃຈໃສ່ຊຸກຍູ້ຜະລິດເບ້ຍໄມ້ອຸດສະຫະກຳ ແລະ ໄມ້ໃຫ້ໝາກ ທັງໝົດ 20 ພັນກວ່າເບ້ຍ, ໃນເນື້ອທີ່ 15 ເຮັກຕາ, ໂຄສະນາເຜີຍແຜ່ນະໂຍບາຍຂອງພັກ ແລະ ລະບຽບກົດໝາຍຂອງລັດກ່ຽວກັບການປົກປັກຮັກສາປ່າໄມ້ ແລະ ຟື້ນຟູປ່າໄມ້ ໃຫ້ປະຊາຊົນບັນດາເຜົ່າເຊື່ອມຊຶມ ກ້າວໄປເຖິງຢຸດຕິການທຳລາຍປ່າໄມ້. ເບ້ຍໄມ້ທີ່ນໍາມາປູກໃນຄັ້ງນີ້ມີ: ເບ້ຍໄມ້ແຕ້, ເບ້ຍໄມ້ດູ ແລະ ຕົ້ນໄມ້ປະດັບ ຈຳນວນໜຶ່ງ. ຕອນທ້າຍ ທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ ໄດ້ໃຫ້ກຽດຂຶ້ນໂອ້ລົມ ພ້ອມທັງຮ່ວມຂະບວນການປູກຕົ້ນໄມ້ໃນຄັ້ງນີ້ ຕື່ມອີກ.
