ໃນປີ 2017 ນີ້ ເມືອງຫີນເຫີບ, ແຂວງວຽງຈັນ ໄດ້ມີແຜນການປູກໄມ້ ໃນເນື້ອທີ່ 150 ເຮັກຕາ ແລະ ກ້າເບ້ຍໄມ້ໃຫ້ໄດ້ 10 ພັນເບ້ຍໂດຍ, ຈະໄດ້ປູກໃສ່ເນື້ອທີ່ດິນຂອງລັດ, ດິນຂອງນັກທຸລະກິດ ທີ່ມາລົງທຶນປູກໄມ້ ຢູ່ພາຍໃນເມືອງ ແລະ ເນື້ອທີ່ດິນຂອງພໍ່ແມ່ປະຊາຊົນພາຍໃນເມືອງຫີນເຫີບ. ພິທີປູກຕົ້ນໄມ້ຢູ່ເມືອງຫີນເຫີບ, ແຂວງວຽງຈັນ ປີນີ້ ໄດ້ຈັດຂຶ້ນໃນວັນທີ 01 ມິຖຸນາ ຜ່ານມາ, ໂດຍການສົມທົບຂອງອຳນາດການປົກຄອງເມືອງ ແລະ ນັກທຸລະກິດ ຈາກ ປະເທດຈີນ. ໂດຍການເປັນກຽດເຂົ້າຮ່ວມຂອງ ທ່ານ ວິດົງ ໄຊຍະສອນ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ, ທ່ານ ອຸດົງ ວົງສະຫວາດ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຫີນເຫີບ, ມີຜູ້ຕາງໜ້າ ພະແນກການກ່ຽວຂ້ອງຂອງແຂວງ, ເມືອງ ແລະ ປະຊາຊົນ ບ້ານຫ້ວຍດອກໄມ້ ເຂົ້າຮ່ວມ. ໃນໂອກາດນີ້ ທ່ານ ອຳໄພ ພັນທະວົງ ກຳມະການພັັກເມືອງ,ຫົວໜ້າຫ້ອງການກະສິກຳ-ປ່າໄມ້ເມືອງຫີນເຫີບ ໄດ້ລາຍງານໃຫ້ຮູ້ວ່າ: ໃນໂອກາດວັນປູກຕົ້ນໄມ້ແຫ່ງຊາດທີ 01 ມິຖຸນາ ປີນີ້, ເມືອງຫີນເຫີບ ຈະໄດ້ປູກຕາມເນື້ອທີ່ດິນຂອງລັດ, ດິນຂອງນັກທຸລະກິດທີ່ມາລົງທຶນປູກໄມ້ຢູ່ພາຍໃນເມືອງ ແລະ ເນື້ອທີ່ດິນຂອງພໍ່ແມ່ປະຊາຊົນ ພາຍໃນເມືອງຫີນເຫີບ ໃນຈຳນວນເບ້ຍໄມ້ທີ່ໄດ້ກະກຽມໄວ້ ມີເບ້ຍໄມ້ອຸດສາຫະກຳ ແລະ ເບ້ຍໄມ້ໃຫ້ໝາກ. ສຳລັບພິທີປູກຕົ້ນໄມ້ ຢູ່ເມືອງຫີນເຫີບປີນີ້ ໄດ້ຈັດຂຶ້ນຢູ່ໃນບໍລິເວນດິນສຳປະທານຂອງ ນັກທຸລະກິດ ເຂດບ້ານຫ້ວຍດອກໄມ້ ໃນ 1 ເຮັກຕາ ໃນຈຳນວນ 400 ກວ່າເບ້ຍ. ທ່ານ ອຸດົງ ວົງສະຫວາດ ກຳມະການພັກແຂວງ,ເລຂາພັກເມືອງ,ເຈົ້າເມືອງໆຫີນເຫີບ ໄດ້ກ່າວໃນພິທີບາງຕອນວ່າ: ການປູກຕົ້ນໄມ້ໃນເທື່ອນີ້ແມ່ນເພື່ອປູກທົດແທນປ່າທີ່ຊຸດໂຊມ ຈາກການຕັດໄມ້ທຳລາຍປ່າ ດ້ວຍການຖ່າງປ່າເຮັດໄຮ່ ແລະ ການຂຸດຄົ້ນໄມ້ຊະຊາຍ ໄດ້ຖືກຟື້ນຟູບູລະນະຄືນໃໝ່, ເພຶ່ອສະກັດກັ້ນການທຳລາຍປ່າໄມ້ຊະຊາຍ ແລະ ຕັດໄມ້ບໍ່ຖືກຕ້ອງຕາມລະບຽບກົດໝາຍ, ເພຶ່ອເຮັດໃຫ້ເນື້ອທີ່ດິນເປົ່າຫວ່າງໄດ້ກາຍເປັນສວນປູກໄມ້ ທີ່ມີຄຸນຄ່າທາງເສດຖະກິດ ແລະ ເຮັດໃຫ້ສິ່ງແວດລ້ອມນັບມື້ນັບມີຄວາມສົດຊື່ນຂຶ້ນ.
