ຄະນະບໍລິຫານງານຊາວໜຸ່ມແຂວງສາລະວັນ ຈັດງານສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ (1 ມິຖຸນາ) ຢ່າງເປັນຂະບວນຟົດຟື້ນໃນວັນທີ 30 ພຶດສະພາ ທີ່ຜ່ານມາ ທີ່ຄະນະບໍລິຫານງານຊາວໜຸ່ມແຂວງສາລະວັນ ໂດຍໃຫ້ກຽດເຂົ້າຮ່ວມຂອງທ່ານ ນາງ ບຸນທະວີ ດວງລາສີ ຄະນະປະຈໍາພັກແຂວງ, ປະທານສະຫະພັນແມ່ຍິງແຂວງ, ຜູ້ຊີ້ນຳອົງການຈັດຕັ້ງມະຫາຊົນ, ທ່ານ ຈັນສີລອນ ສີສົມບູນ ກໍາມະການພັກແຂວງ, ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ, ມີຄະນະປະຈໍາພັກເມືອງ, ພະແນກການອ້ອມຂ້າງແຂວງ, ພະນັກງານ-ລັດຖະ ກອນ, ຄູ-ອາຈານ, ແຂກຖືກເຊີນ ແລະ ນ້ອງນັກຮຽນອະນຸບານ-ປະຖົມ ພາຍໃນແຂວງ ເຂົ້າຮ່ວມ. ໂອກາດດັ່ງກ່າວ ທ່ານ ຈັນສີລອນ ສີສົມບູນ ກໍາມະການພັກແຂວງ, ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ, ໄດ້ຜ່ານປະຫວັດຄວາມເປັນມາຂອງເດັກນ້ອຍໃຫ້ຮູ້ວ່າ: ວັນເດັກນ້ອຍສາກົນ (1 ມິຖຸນາ) ຕິດພັນກັບການໃຫ້ສັດຕະຍາບັນຕໍ່ສົນທິສັນຍາ ວ່າດ້ວຍສິດທິເດັກ ຄົບຮອບ 25 ປີ (ວັນທີ 7 ມິຖຸນາ) ແລະ ວັນຕ້ານການໃຊ້ແຮງງານເດັກ (12 ມິຖຸນາ) ເຊິ່ງວັນເດັກແມ່ນເຫດການພິເສດທີ່ມີຄວາມໝາຍແນໃສ່ບັນລຸໃຫ້ໄດ້ຈຸດປະສົງທັງປົກປ້ອງ ແລະ ທັງສັນລະເສີນເດັກໃນທົ່ວໂລກ. ເດັກນ້ອຍເປັນໜໍ່ແໜງແຫ່ງຊີວິດໃນມື້ນີ້ ເພື່ອກ້າວໄປເປັນອະນາຄົດທີ່ແຈ່ມໃສຂອງປະເທດຊາດໃນມື້ໜ້າ, ບັນດາປະເທດຊາດໃນທົ່ວໂລກຈຶ່ງມີການສະເຫຼີມສະຫຼອງວັນເດັກ, ເຊິ່ງ ສາທາ ລະນະລັດ ປະຊາທິປະໄຕ ປະຊາ ຊົນລາວ ກໍ່ໄດ້ຈັດຕັ້ງການສະເຫຼີມສະຫຼອງວັນເດັກນ້ອຍສາກົນ, ພ້ອມທັງເປັນວັນປູກຕົ້ນໄມ້ແຫ່ງຊາດ ແລະ ວັນຕ້ານການໃຊ້ແຮງງານເດັກ ແລະ ໃນໂອກາດທີ່ມີຄວາມໝາຍຄວາມສຳຄັນດັ່ງກ່າວ, ທາງການນຳແຂວງສາລະວັນ ກໍ່ໄດ້ອວຍ ພອນໃຫ້ເດັກນ້ອຍທີ່ເປັນລູກ, ເປັນຫຼານຂອງພວກເຮົາ ຈົ່ງມີສຸຂະພາບເຂັ້ມແຂງ ແລະ ຕັ້ງໜ້າໃນການເຝິກຝົນຫຼໍ່ຫຼອມຕົນເອງໃຫ້ກາຍເປັນຜູ້ໃຫຍ່ທີ່ມີຄວາມຮູ້ຄວາມສາມາດ, ມີຄວາມຮັບຜິດຊອບ, ມີຄຸນສົມບັດສິນທຳປະຕິວັດ ປະກອບ ສ່ວນເຂົ້າໃນການສ້າງສາ ແລະ ພັດທະນາປະເທດຊາດໃນອະນາຄົດ. ນອກຈາກນັ້ນການນຳທຸກພາກສ່ວນທີ່ເຂົ້າຮ່ວມໃນງານ ກໍ່ໄດ້ຮ່ວມກັນ ນຳພາຫຼານນ້ອຍປູກຕົ້ນໄມ້ ແລະ ຊົມການ ສະແດງສິລະປະວັນນະຄະດີ ໂດຍການຟ້ອນ ແລະ ຮ້ອງເພງຂອງຫຼານນ້ອຍ. ນອກຈາກນັ້ນຍັງມີກິດຈະກຳຕ່າງໆ.

Editor: ຕະວັນ ແສງສະຫວັນ