ຊຶ່ງຕາມການໃຫ້ສຳພາດຂອງທ່ານ ສີທະເຮັງ ທອງສະຫວັນ, ຮອງຫົວຫນ້າພະແນກ ກະສິກຳ-ປ່າໄມ້ ແຂວງວຽງຈັນ ໃຫ້ຮູ້ວ່າ: ໃນທຸກໆປີແຂວງວຽງຈັນ ກໍ່ໄດ້ມີການປຸກລະດົມໃຫ້ ພະນັກງານ ທະຫານ ຕຳຫລວດ ພໍ່ແມ່ປະຊາຊົນ ພາຍໃນແຂວງວຽງຈັນ ຫລື ບໍລິສັດ ຮ່ວມກັນ ປູກໄມ້ ບໍ່ສະເພາະແຕ່ວັນທີ 1 ມີຖຸນາເທົ່ານັ້ນ ແຕ່ທ່ານສາມາດປູກໄດ້ຈົນຫມົດລະດູການ, ບໍ່ວ່າຈະຢູ່ທົ່ງພຽງກໍ່ຄືພູດອຍ ໂດຍສະເພາະ ໄມ້ພື້ນ, ໄມ້ອຸດສາຫະກຳ, ໄມ້ກິນຫມາກ ແລະ ອື່ນໆ ທີ່ຜ່ານມາແຂວງວຽງຈັນ ກໍ່ເປັນອີກແຂວງຫນຶ່ງທີ່ມີການຕັດໄມ້ທຳລາຍປ່າຫລາຍ ຈົນເຖິງປີ 2004 ເປັນຕົ້ນມາ ຈຶ່ງໄດ້ມີການປິດປ່າ ແລະ ປຸກລະດົມໃຫ້ປະຊາຊົນປູກໄມ້ໃຫ້ຫລາຍເທົ່າທີ່ຈະເຮັດໄດ້, ຊຶ່ງໃນວັນປູກຕົ້ນໄມ້ແຫ່ງຊາດ ໃນປີ 2017 ນີ້ ແຂວງວຽງຈັນ ມີແຜ່ນປູກໄມ້ໃຫ້ໄດ້ບໍ່ຫລຸດ 10 ພັນກວ່າເບ້ຍ ໃນນີ້, ທັງພາກລັດ ແລະ ເອກະຊົນ ແລະ ພໍ່ແມ່ປະຊາຊົນພາຍໃນແຂວງ ແລະ ການປູກໄມ້ອຸດສາຫະກຳ ໄມ້ວິກ ແບບປະຊາຊົນມີສ່ວນຮ່ວມ ທີ່ທາງບໍລິສັດ ບົວລະພາ ກະສິກຳ-ປ່າໄມ້ ຈຳກັດ ພວມຈັດຕັ້ງປະຕິບັດຢູ່ພາຍໃນເມືອງຫີນເຫີບ, ແຂວງວຽງຈັນ ທ່ານ ສີທະເຮັງ ບອກວ່າ: ພວກເຮົາໄດ້ມີການຊຸກຍູ້ສົ່ງເສີມຢ່າງຊັດເຈນ ຊຶ່ງຜ່ານມາສູນກາງໄດ້ຊີ້ນຳ ແລະ ແຂວງຈັດຕັ້ງປະຕິບັດ ໂດຍການຕົກລົງລະຫວ່າງ ບໍລິສັດ ກັບ ບ້ານ ເຊິ່ງການປູກແມ່ນຈະປູກໃສ່ດິນລວມຂອງບ້ານທີ່ເປົ່າວາ່ງ ຫລື ດິນຂອງປະຊາຊົນ ໂດຍດິນກໍ່ຍັງແມ່ນຂອງບ້ານ ຫລື ຂອງປະຊາຊົນຄືເກົ່າ ໂດຍບໍລິສັດຈະບໍ່ໄດ້ເອົາເປັນຂອງບໍລິສັດແຕ່ຢ່າງໃດເລີຍ. ຊຶ່ງການປູກແບບມີສ່ວນຮ່ວມນີ້ ອາດຈະເປັນ ຫນຶ່ງບວກສີ່ ຫລື ສອງບວກສາມ ຂື້ນກັບການຕົກລົງກັນລະຫວ່າງ ບ້ານ ແລະ ບໍລິສັດ. ຂໍ້ດີປະຊາຊົນຍັງສາມາດມານຳໃຊ້ດິນທີ່ເປັນວ່າງຂອງການປູກໄມ້ວິກ ເພື່ອປູກເຂົ້າ, ສາລີ, ມັນຕົ້ນ ແລະ ພືດອື່ນໆ ຫລື ລ້ຽງສັດໃສ່ໄດ້ອີກ. ຜ່ານການຈັດຕັ້ງປະຕິບັດການປູກໄມ້ວິກ ແບບມີສ່ວນຮ່ວມກັບປະຊາຊົນ ຂອງບໍລິສັດ ບົວລະພາ ກະສິກຳ-ປ່າໄມ້ ຈຳກັດ ເຫັນວ່າສິ່ງທີ່ໄດ້ຮັບຄື: ປະຊາຊົນມີຊີວິດການເປັນຢູ່ທີ່ດີຂື້ນຈາກແຕ່ເກົ່າຫລາຍ. ນອກຈາກນີ້ ທາງບໍລິສັດ ຍັງໄດ້ຊ່ວຍເຫລືອໃນການສ້າງສາພື້ນຖານໂຄງລ່າງ ສິ່ງອຳນວຍຄວາມສະດວກຕ່າງໆຂອງບ້ານ ຕາມທີ່ບ້ານທີ່ຮ່ວມໂຄງການຂາດເຂີນ ແລະ ໄດ້ສະຫນີມາທາງບໍລິສັດ. ຊຶ່ງຫລ້າສຸດທາງບໍລິສັດ ບົວລະພາ ກໍ່ໄດ້ໃຫ້ທຶນຊ່ວຍເຫລືອແກ່ບ້ານໂພນເງິນ, ເມືອງຫີນເຫີບ, ແຂວງວຽງຈັນ ເປັນເງິນສົດ ມູນຄ່າ 73 ລ້ານກີບ, ເພື່ອປະກອບສ່ວນເປັນກອງທຶນບ້ານ ໃນການສ້າງສາພັດທະນາບ້ານດັ່ງກ່າວ ຕາມທີ່ທາງບ້ານໄດ້ສະເຫນີຂໍການຊ່ວຍເຫລືອມາຍັງບໍລິສັດ ໂດຍການໃຫ້ກຽດມອບ-ຮັບ ຂອງທ່ານນາງ ສຸໄພວັນ ທ່ຽງຈັນໄຊ, ຮອງອຳນວຍການ ບໍລິສັດ ບົວລະພາ ກະສິກຳ-ປ່າໄມ້ ພ້ອມຄະນະ ແລະ ຮັບໂດຍທ່ານນາງ ພູວັນ ໄຊຍະວົງ, ນາຍບ້ານ ບ້ານໂພນເງິນ, ເມືອງຫີນເຫີບ, ແຂວງວຽງຈັນ ພ້ອມຄະນະ ໂດຍມີສື່ມວນຊົນເຂົ້າຮ່ວມຢ່າງພ້ອມພຽງ.
Editor: ຕະວັນ ແສງສະຫວັນ
