ເນື່ອງໃນໂອກາດສະເຫຼີມສະຫຼອງວັນທີ 1 ມີຖຸນາ 2017 ນີ້. ຢູ່ເດີນອະນຸສອນສະຖານ ອົງແກ້ວ ບັນດາການນໍາທຸກຂັ້ນຂອງແຂວງສາລະວັນ ໄດ້ຮ່ວມຈິດຮ່ວມໃຈກັນ ປູກຕົ້ນໄມ້ຄືນຄວາມສົມດູນໃຫ້ກັບທຳມະຊາດ. ເຊີ່ງນຳໂດຍ ທ່ານ ສີສຸວັນ ວົງຈອມສີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ ພ້ອມດ້ວຍຄະນະນຳຂັ້ນແຂວງ, ຂັ້ນເມືອງໃນທົ່ວແຂວງ, ຄະນະນໍາພະແນກການອ້ອມຂ້າງແຂວງ, ອົງການທຽບເທົ່າ, ອົງການຈັດຕັ້ງມະຫາຊົນທຸກຂັ້ນ, ນັກທຸລະກິດ, ຜູ້ປະກອບການ, ນັກຮຽນນັກສຶກສາ ແລະ ພໍ່ແມ່ປະຊາຊົນອ້ອມຂ້າງເທດສະບານເມືອງ-ແຂວງສາລະວັນເຂົ້າຮ່ວມ 1 ພັນກວ່າຄົນ. ທ່ານ ພູທົງ ຄໍາມະນິວົງ ຄະນະປະຈໍາພັກແຂວງ ຮອງເຈົ້າແຂວງໆສາລະວັນ ຜູ້ຊີ້ນໍາວຽກງານວັດທະນະທໍາ-ສັງຄົມຂັ້ນແຂວງ ກໍ່ໄດ້ກ່າວຄືນປະຫວັດຄວາມເປັນມາ ແລະ ຄວາມສຳຄັນຂອງວັນດັ່ງກ່າວ ໂດຍສະເພາະວັນເດັກນ້ອຍສາກົນ ເພື່ອເຮັດໃຫ້ເດັກທຸກຄົນໄດ້ຮັບການປົກປ້ອງ ແລະ ດູແລເບິ່ງແຍງສຸຂະພາບ ກ່ອນເກີດ ແລະ ຫຼັງເກີດ ເນື່ອງຈາກເດັກຍັງບໍ່ມີວຸດທິພາວະຄົບຖ້ວນທາງດ້ານຮ່າງກາຍ ແລະ ຈິດໃຈ, ໃຫ້ໂອກາດກຸ່ມເດັກທີ່ດ້ອຍໂອກາດ, ເດັກພິການ, ເດັກຂໍທານ, ເດັກທີ່ຢູ່ໃນກຸ່ມສ່ຽງຢູ່ເຂດທຸກຍາກ ແລະ ຫ່າງໄກສອກຫຼີກ, ຮັບປະກັນໃຫ້ເດັກໄດ້ຮັບຜົນປະໂຫຍດ ແລະ ມີສ່ວນຮ່ວມຢ່າງເຕັມສ່ວນໃນທຸກຂະບວນການເຄື່ອນໄຫວຂອງເດັກໃນຂອບເຂດທົ່ວປະເທດ ຮັບປະກັນການພັດທະນາ ແລະ ການເຕີບໂຕຢ່າງແຂງແຮງຂອງເສດຖະກິດຊາດໃຫ້ທົ່ວເຖີງເດັກທຸກຄົນໃນສັງຄົມ ແລະ ໃຫ້ເດັກເຂົ້າເຖີງ 4 ສິດຄື: ການຢູ່ລອດ, ການໄດ້ຮັບການປົກປ້ອງ, ການພັດທະນາ ແລະ ການມີສ່ວນຮ່ວມ ນອກຈາກນີ້ ການນໍາທຸກຂັ້ນກໍ່ໄດ້ຮ່ວມກັນປູກຕົ້ນໄມ້ ຈໍານວນ 250 ໃນຂອບເຂດບໍລິເວນເດີນອະນຸສອນສະຖານ ອົງແກ້ວ ແລະ ໄດ້ຢອດຢາໃຫ້ກັບເດັກອີກດ້ວຍ ພ້ອມນັ້ນ ມີອີກຫລາຍກິດຈະກຳທີ່ທາງແຂວງໄດ້ຮ່ວມກັນຈັດຂຶ້ນເພື່ອເຮັດໃຫ້ທຸກຄົນໃນສັງຄົມ ໂດຍສະເພາະເດັກ ໄດ້ມີສ່ວນຮ່ວມໃນທຸກຂະບວນການເຄື່ອນໄຫວພັດທະນາເສດຖະກິດ-ສັງຄົມ ຂອງແຂວງ ກໍ່ຄື ຂອງຊາດ.

Editor: ຕະວັນ ແສງສະຫວັນ