ກອງປະຊຸມສ່ອງແສງສັນຈອນ ເຈົ້າໜ້າທີ່ ອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໃນ 9 ຕົວເມືອງໄດ້ຈັດຂຶ້ນໃນວັນທີ 5 ມິຖຸນາຜ່ານມາ ທີ່ປົກຄອງເມືອງນາຊາຍທອງ ໂດຍການເຂົ້າຮ່ວມເປັນປະທານຂອງທ່ານ ພັນທອງ ພິດທຸມມາ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ວິລະສັກ ນາມມຸນຕີ ເຈົ້າເມືອງນາຊາຍທອງ, ທ່ານ ເບີລິນ ເພັດຈັນທະລາດ ຫົວນ້າພະແນກອຸດສາຫະກໍາ ແລະ ການຄ້າ ມີຫົວນ້າກົມ, ບັນດາຫົວຫນ້າຫ້ອງການອຸດສາຫະກຳ ແລະ ການຄ້າ 9 ຕົວເມືອງ ແລະ ຕ່າງໜ້າຂະແໜງການກ່ຽວຂ້ອງເຂົ້າຮ່ວມ.  ທີ່ປະຊຸມ ຕ່າງຫນ້າ ຫ້ອງການອຸດສາຫະກຳ ແລະ ການຄ້າທັງ 9 ຕົວເມືອງ, ບັນດາຂະແໜງການກ່ຽວຂ້ອງ ໄດ້ມີການຜັດປ່ຽນກັນຂຶ້ນລາຍງານສະພາບລວມໃນການຈັດຕັ້ງວຽກງານອຸດສາຫະກຳ ແລະ ການຄ້າ ຂອງເມືອງໃຜລາວ ໃນນະຄອນຫຼວງວຽງຈັນ ເຊິ່ງມີທັງດ້ານດີ, ສິ່ງທ້າທາຍ ແລະ ຂໍ້ສະເໜີ. ທ່ານ ພອນທິບ ຍົກໄຊຍະຄໍາ, ຫົວຫນ້າຫ້ອງການອຸດສາຫະກໍາ ແລະ ການຄ້າ ເມືອງນາຊາຍທອງ ໄດ້ກ່າວວ່າ: ເມືອງນາຊາຍທອງ ມີພົນລະເມືອງທັງໝົດ 73,503 ຄົນ, ຍິງມີ 36,878 ທ່າແຮງດ້ານເສດຖະກິດຂອງເມືອງ ແມ່ນການຜະລິດກະສິກໍາ ກວມ 75%, ທົ່ວເມືອງມີໂຮງຈັກໂຮງງານ 218 ແຫ່ງ ໃນນີ້ ແບ່ງເປັນຂັ້ນພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ອອກອະນຸຍາດມີ 87 ແຫ່ງ ເຊິ່ງປະກອບມີ: ໂຮງງານງານເຟີນີເຈີ ແລະ ໂຮງງານປຸງແຕ່ງໄມ້ 23 ແຫ່ງ, ໂຮງງານນ້ຳດື່ມ 22 ແຫ່ງ, ໂຮງງານຜະລິດນ້ຳກ້ອນອະນາໄມ 1 ແຫ່ງ, ໂຮງສີເຂົ້າ 2 ແຫ່ງ ແລະ ໂຮງຈັກ ໂຮງງານຕ່າງໆ 39 ແຫ່ງ. ຂັ້ນຫ້ອງການອຸດສາຫະກຳ ແລະ ການຄ້າ ອະນຸຍາດ ມີ 131 ແຫ່ງ ມີໂຮງສີເຂົ້າ 54 ແຫ່ງ, ໂຮງງານນ້ຳດື່ມ 10 ແຫ່ງ, ໂຮງງານຜະລິດນ້ຳກ້ອນອະນາໄມ 10 ແຫ່ງ ໂຮງຊ່າງຫັດຖະກໍາຜະລິດແບບຄອບຄົວ 57 ແຫ່ງ ຮອດປັດຈຸບັນ ຕໍ່ອະນຸຍາດດຳເນີນກິດຈະການ ໄດ້ 30 ແຫ່ງ. ນອກນີ້,  ຍັງໄດ້ເອົາໃຈໃສ່ ແລະ ຖືສໍາຄັນ ເປັນຕົ້ນ: ການຄຸ້ມຄອງຕະຫລາດ, ການຄຸ້ມຄອງລາຄາສິນຄ້າ, ການກວດກາການຄ້າ ແລະ ປົກປ້ອງຜູ້ຊົມໃຊ້  ຊຶ່ງທົ່ວເມືອງມີຕະຫລາດ ທັງຫມົດ 10 ແຫ່ງ ແລະ ມີຄະນະຄຸ້ມຄອງຕະຫລາດຂັ້ນເມືອງ 1 ຄະນະ ທີ່ຖືກແຕ່ງຕັ້ງໂດຍເຈົ້າເມືອງ, ຊຶ່ງທຸກທິດແມ່ນໄດ້ມີການລົງຕິດຕາມ ລາຄາສິນຄ້າເປັນປົກກະຕິ ເປັນຕົ້ນ: ລາຄາຊີ້ນຫມູ, ປານິນກະຊັງ ແລະ ລາຄາສິນຄ້າອື່ນໆ ພ້ອມທັງລາຍງານສົ່ງໃຫ້ພະແນກເປັນປົກກະຕິ.

Editor: ຕະວັນ ແສງສະຫວັນ