ເມື່ອບໍ່ດົນມານີ້ ທີ່ໂຮງຮຽນມັດທະຍົມຕອນປາຍ ສີສັດຕະນາກ ນະຄອນຫຼວງວຽງຈັນ ໄດ້ຈັດພິທີມອບ-ຮັບອາຄານຮຽນຫຼັງໃໝ່ ໂດຍການເຂົ້າຮ່ວມພິທີຂອງ ທ່ານ ຊົມພູ ແກ້ວປັນຍາ, ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ມີຮອງຫົວໜ້າພະແນກ, ຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ, ພ້ອມດ້ວຍພະສົງສຳມະເນນ, ອໍານາດການປົກຄອງເມືອງ, ຄູ-ອາຈານ, ຜູ້ປົກຄອງ ແລະ ນ້ອງນັກຮຽນເຂົ້າຮ່ວມ. ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ໄດ້ກ່າວວ່າ: ການປະກອບສ່ວນສ້າງອາຄານຮຽນໃຫ້ມັດທະຍົມຕອນປາຍ ສີສັດຕະນາກ ນະຄອນຫຼວງວຽງຈັນ ຂອງຍາປ້າ ກຸຫຼາບ ສຸທຳມະວົງ ພ້ອມດ້ວຍລູກຫຼານໃນຄັ້ງນີ້ ຖືວ່າເປັນການປະກອບສ່ວນທີ່ສຳຄັນໃນການສົ່ງເສີມວຽກງານການສຶກສາ. ເພື່ອເຮັດໃຫ້ໂຮງຮຽນມັດທະຍົມຕອນປາຍ ສີສັດຕະນາກ ນະຄອນຫຼວງວຽງຈັນ ມີອາຄານຮຽນຫຼັງໃໝ່ ເພື່ອຮັບໃຊ້ເຂົ້າໃນວຽກງານການສິດສອນນ້ອງໆນັກຮຽນໃຫ້ເປັນຄົນດີ, ຮຽນເກັ່ງຂອງປະເທດຊາດ. ອາຄານຮຽນຫຼັງໃໝ່ ທີ່ມອບ-ຮັບໃນຄັ້ງນີ້ ເປັນອາຄານ 2 ຊັ້ນ, ກ້ວາງ 10 ແມັດ, ຍາວ 94 ແມັດ, ມີ 10 ຫ້ອງຮຽນ, ມີອຸປະກອນການຮຽນຄົບຊຸດ ໂດຍການຊ່ວຍເຫຼືອຂອງທ່ານຍາປ້າ ກຸຫຼາບ ສຸທຳມະວົງ ໃນມູນຄ່າ 350.000 ໂດລາສະຫະລັດ ຫຼື ປະມານ 2 ຕີື້ 800 ລ້ານກີບ. ນອກຈາກອາຄານຮຽນຄົບຊຸດແລ້ວ ຜູ້ປົກຄອງນັກຮຽນເກົ່າ ທີ່ເຄີຍຮຽນຢູ່ໂຮງຮຽນແຫ່ງນີ້ ຍັງໄດ້ໃຫ້ການຊ່ວຍເຫຼືອໂຕະຄູ 10 ຊຸດຕື່ມອີກ. ອາຄານຫຼັງນີ້ ເລີ່ມລົງມືກໍ່ສ້າງມາແຕ່ເດືອນ ກໍລະກົດ ປີ 2016 ພາຍຫຼັງການກໍ່ສ້າງສໍາເລັດ ທາງພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ມອບຕໍ່ອໍານວຍການ, ຄູ-ອາຈານ ແລະ ນອ້ງນັກຮຽນມັດທະຍົມຕອນປາຍ ສີສັດຕະນາກ ນະຄອນຫຼວງວຽງຈັນ ນຳໃຊ້ເຂົ້າໃນການຮຽນ-ການສອນ ເຊິ່ງປັດຈຸບັນໂຮງຮຽນແຫ່ງນີ້ ມີ 18 ຫ້ອງຮຽນ, ມີຄູ-ອາຈານ 38 ຄົນ, ນ້ອງນັກຮຽນ 800 ຄົນ, ຊຶ່ງອາຄານຮຽນຫຼັງໃໝ່ຖືເປັນຊື່ ສຸທໍາມະວົງ ໄດ້ກາຍເປັນສັນຍາລັກໜຶ່ງ ໃນການປະກອບສ່ວນຂອງພາກສ່ວນບຸກຄົນ ເຂົ້າໃນການພັດທະນາໂຄງລ່າງດ້ານການສຶກສາໃຫ້ມີຄວາມກ້າວໜ້າຂຶ້ນໄປເລື້ອຍໆ.
Editor: ດາວໄຊ ສີວິໄລ
