ໃນວັນທີ 1 ມິຖຸນາ ຜ່ານມານີ້ ຢູ່ທີ່ ສະໂມສອນເມືອງ ລະຄອນເພັງ ໄດ້ມີພິທີສະເຫຼີມສະຫຼອງ ວັນເດັກນ້ອຍສາກົນ ໂດຍມີ ທ່ານ ແກ້ວຜາ ສີລາດວງໃຈ, ຮອງເລຂາພັກເມືອງຜູ້ປະຈໍາການ ພ້ອມດ້ວຍການນໍາພັກ-ລັດຂອງເມືອງ,ພະນັກງານລັດຖະກອນ, ກໍາລັງປະກອບອາວຸດ, ຜູ້ປົກຄອງເດັກ ແລະ ເດັກນ້ອຍເຂົ້າຮ່ວມຢ່າງພ້ອມພຽງ. ໃນພິທີໄດ້ຮັບຟັງປະຫວັດຄວາມເປັນມາຂອງວັນທີ 1 ມິຖຸນາ ວັນເດັກນ້ອຍສາກົນ, ຮັບຟັງການຜ່ານເອກະສານ ວັນຕ້ານການໃຊ້ແຮງງານເດັກສາກົນ ວັນທີ 12 ມິຖຸນາ. ຈາກນັ້ນ ທ່ານ ໜູໄຊ ຈັນດາວົງ ຄະນະປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາຂົງເຂດວັດທະນະທໍາສັງຄົມ ກໍ່ໄດ້ໃຫ້ກຽດຂຶ້ນຜ່ານສານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກ່ຽວກັບກັບການຢຸດຕິການໃຊ້ຄວາມຮຸນແຮງຕໍ່ເດັກ ໃນໂອກາດວັນທີ 1 ມິຖຸນາ ວັນເດັກນ້ອຍສາກົນ ເຊິ່ງມີເນື້ອໃນບາງຕອນວ່າ: ເດັກໝາຍເຖິງບຸກຄົນທີ່ມີອາຍຸຕໍ່າກວາ 18 ປີ, ເຊິງຈະເປັນຜູ້ໃຫຍ່ໃນມື້ໜ້າ ແລະ ທັງແມ່ນກໍາລັງກໍາລັງແຮງງານ ທີ່ສໍາຄັນໃນການພັດທະນາ ເສດ ຖະກິດ-ສັງຄົມຂອງຊາດ, ສະນັ້ນ ພັກ-ລັດຖະບານ ໄດ້ເອົາໃຈໃສ່ໃນການຄຸ້ມຄອງ, ພັດທະນາ ແລະ ສົ່ງເສີມວຽກງານແມ່ ແລະ ເດັກໃນຂອບເຂດທົ່ວປະເທດ ດ້ວຍການສົ່ງເສີມສຸຂະພາບ, ປົກປ້ອງສິດ ແລະ ຜົນປະໂຫຍດຂອງແມ່ ແລະເດັກ ຕິດພັນກັບການສຶກສາອົມຮົມ, ພັດທະນາເດັກຢ່າງຮອບດ້ານຕາມແນວທາງນະໂຍບາຍຂອງພັກ-ລັດ ຕໍ່ສົນທິ ສັນຍາ ວ່າດ້ວສິດທິເດັກ. ໃນພິທີສະເຫຼີມສະຫຼອງວັນເດັກນ້ອຍສາກົນ ຢູ່ເມືອງ ລະຄອນເພັງ ປິີນີ້ ຍັງໄດ້ມີກິດຈະກໍາສົ່ງເສີມ ຄວາມສາມາດ, ທັກສະ, ການສະແດງອອກ ຂອງເດັກ ໂດຍມີ ກິດຈະກໍາສະແດງສີລະປະຂອງຫຼານນ້ອຍອະນຸບານ, ການແຂ່ງຂັນກິລາດຶງເຊຶອກຂອງເດັກ, ແຂ່ງຂັນກິນກ້ວຍ, ແຂ່ງຂັນເປົ່າໝາກປຸ່ມເປົ້າ ແລະ ນອກຈາກນີ້, ຫ້ອງການສາທາລະນະສຸກເມືອງຕັ້ງເຕັ໋ນ ໃຫ້ຄວາມຮູ້ກ່ຽວກັບການລ້ຽງລູກດ້ວຍນົມແມ່, ການເຮັດອາຫານເສີມ, ການປ້ອງກັນ ແລະ ສະກັດກັ້ນໄຂ້ ເລືອດອອກ ໂດຍມີແມ່ ແລະ ເດັກໃຫ້ຄວາມສົນໃຈເຂົ້າຮ່ວມກິດຈະກໍາເປັນຈໍາຫຼວງຫຼາຍ.ຂອບໃຈນັກຂ່າວ ເມືອງລະຄອນເພັງ.

Editor: ດາວໄຊ ສີວິໄລ