ຕາມການໃຫ້ສໍາພາດຂອງ ທ່ານ ບຸນເມືອງ ໄຊປັນຍາ ຮອງຫົວໜ້າຫ້ອງການສົ່ງເສີມກະສີກໍາ-ປ່າໄມ້ ເມືອງເຊໂປນ ໄດ້ລາຍງານຕໍ່ຜູ້ສື່ຂ່າວທ້ອງຖິ່ນ ໃນວັນທີ 1 ມີຖຸນາ ທີ່ຜ່ານມາວ່າ: ຫ້ອງການສົ່ງເສີມກະສີກໍາ-ປ່າໄມ້ເມືອງເຊໂປນ ໄດ້ຫ້າງຫາກະກຽມເບັ້ຍໄມ້ ທີ່ຈະປູກເກັບກ້າແກ່ນໄດ້ 79 ກິໂລ ເທົ່າ 5 ແສນເບັ້ຍ ມີເບັ້ຍໄມ້ໃຫ້ໝາກ, ເບັ້ຍໄມ້ປະດັບ, ເບັ້ຍໄມ້ອຸດສາຫະກໍາ, ເນື່ອງໃນໂອກາດວັນທີ 1 ມີຖຸນາ ເປັນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ, ຫ້ອງການສົ່ງເສີມກະສີກໍາ-ປ່າໄມ້ເມືອງເຊໂປນ ສົມທົບກັບເມືອງ, ບ້ານຈັດພີທີປູກຕົ້ນໄມ້ຂື້ນຢ່າງເປັນທາງການ, ຢູ່ປ່າມະເຫສັກດົງສະຫວັນ ຂອງບ້ານແກ້ງ, ສໍາລັບເບັ້ຍໄມ້ທີ່ນໍາມາປູກໃນຄັ້ງນີ້ ມີເບັ້ຍໄມ້ແຕ້ຂ່າ,ໄມ້ຂະຍຸງ ປະມານ1,500ເບັ້ຍ ໃນເນື້ອທີ່ 1,5 ເຮັກຕາ,ສ່ວນການບົວລະບັດຮັກສາແມ່ນມອບໃຫ້ບ້ານເປັນຜູ້ຄຸ້ມຄອງປົກປັກຮັກສາ,ໂດຍເປັນກຽດເຂົ້າຮ່ວມໃນພີທີປູກຄັ້ງນີ້ ທ່ານ ວົງໄຊ ໄຊຍະຈັກ ຮອງເຈົ້າເມືອງເຊໂປນ ພ້ອມຄະນະ, ທ່ານ ສີຄູນ ບານມະນີວົງ ຫົວໜ້າຫ້ອງການສົ່ງເສີມກະສີກໍາ-ປ່າໄມ້ເມືອງ ພ້ອມຄະນະ,ເຂົ້າຮ່ວມມີບັນດາຄະນະປະຈໍາພັກເມືອງ, ກໍາມະການພັກເມືອງ, ຄະນະພັກ, ຄະນະຈຸດສຸມ,ກຸ່ມບ້ານ,ຫົວໜ້າ,ຄະນະຫ້ອງການ ທີ່ກ່ຽວຂ້ອງ ພ້ອມດ້ວຍພະນັກງານ ແລະພໍ່ແມ່ປະຊາຊົນບ້ານແກ້ງ. ຜ່ານການຈັດຕັ້ງປະຕິບັດ ໃນການປູກໄມ້ໃນແຕ່ລະປີແມ່ນເປັນຂະບວນກວ້າງຂວາງພໍສົມຄວນ ຊື່ງມັນສະແດງໃຫ້ເຫັນວ່າເນື້ອທີ່ຂອງປ່າໄມ້ ໄດ້ເພີ່ມຂື້ນໃນຂະນະດຽວກັນນີ້ສັງເກດເຫັນວ່າ: ຍັງມີຂໍ້ຄົງຄ້າງຈໍານວນໜຶ່ງຈະຕ້ອງໄດ້ແກ້ໄຂ ແລະ ປັບປຸງໃຫ້ສອດຄ່ອງກັບລະບຽບກົດໝາຍ ໂດຍສະເພາະການປູກໄມ້ເພື່ອເປົ້າໝາຍເສດຖະກິດ ແລະ ປົກປັກຮັກສາສີ່ງແວດລ້ອມ ບໍ່ທັນໄດ້ເອົາໃຈໃສ່ເທົ່າທີ່ຄວນຕໍ່ວຽກງານປູກໄມ້,ຟື້ນຟູປ່າ ແລະ ການບົວລະບັດຮັກສາຕົ້ນໄມ້ ທີ່ປູກແລ້ວນັ້ນອັນເປັນສາເຫດທີ່ເຮັດໃຫ້ການປູກໄມ້ແມ່ນຍັງຂາດປະສິດທິພາບ.
