ອີງຕາມເອກະສານ ພາກທີໜຶ່ງຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຮອດປີ 2020 ເມື່ອບໍ່ດົນມານີ້ໃຫ້ຮູ້ວ່າ: ເພື່ອເປັນການເສີມຂະຫຍາຍໝາກຜົນທີ່ບັນລຸໄດ້ໃນ 5 ປີຜ່ານມາ ໂດຍເຫັນໄດ້ຈາກພຶດຕິກໍາຕົວຈິງ ຂອງຂະບວນການພັດທະນາເສດຖະກິດ-ສັງຄົມຂອງລາວ ໄດ້ມີການເຕີບໂຕຢ່າງຕໍ່ເນື່ອງ ດ້ວຍອັດຕາສະເລ່ຍ 7,94% ຕໍ່ປີ ໂດຍການເພີ່ມຂຶ້ນຂອງເສດຖະກິດ ແມ່ນ ຍ້ອນລັດຖະບານໄດ້ມີກົນໄກ ແລະ ມາດຖານການຄຸ້ມຄອງເສດຖະກິດມະຫາພາກທີ່ຖືກຕ້ອງ, ສັງຄົມມີຄວາມສະຫງົບ ສະແດງອອກປະຊາຊົນມີວຽກເຮັດງານທໍາ, ມີລາຍໄດ້ເພີ່ມຂຶ້ນ ແລະ ເຮັດໃຫ້ຊີວິດການເປັນຢູ່ດີຂຶ້ນ, ອັດຕາເງິນເຟີ້ຢູ່ໃນລະດັບຕໍ່າ, ການຜະລິດຂອງຂະແໜງກະສິກໍາ, ອຸດສາຫະກໍາ ແລະ ການບໍລິການໄດ້ເພີ່ມຂຶ້ນ, ການສົ່ງອອກ-ນໍາເຂົ້າ, ການລົງທຶນທັງພາກ ລັດ-ເອກະຊົນ ກໍ່ເພີ່ມຂຶ້ນ ໃນນີ້ການເກັບລາຍຮັບເຂົ້າງົບປະມານປະຕິບັດໄດ້ບັນລຸຄາດໝາຍແຜນໃນແຕ່ລະປີ.ແຜ່ນພັດທະນາຂອງປະເທດຮອດປີ 2020 ຮູ້ວ່າ: ສປປ ລາວ ສ້າງບາດລ້ຽວໃໝ່ ໃຫ້ເປັນປະເທດກໍາລັງພັດທະນາ ທີ່ມີລາຍຮັບປານກາງ - ສູງ ຕາມທິດເສດຖະກິດ-ສັງຄົມ, ພູມປັນຍາ, ສີຂຽວ-ຍືນຍົງ ແລະ ລາຍໄດ້ແຫ່ງຊາດສະເລ່ຍຕໍ່ຫົວຄົນ ເພີ່ມຂຶ້ນຫຼາຍກວ່າ 4 ເທົ່າ ທຽບໃສ່ຊຸມປີຜ່ານມາ ຊຶ່ງໃນນັ້ນ ອຸດສາຫະກໍາ ເປັນເສົາຄໍ້າ ໂດຍສະເພາະປີ 2020 ສປປ ລາວ ຈະສູ້ຊົນໃຫ້ລວມຍອດຜະລິດຕະພັນພາຍໃນຕໍ່ຫົວຄົນ ຫລື (GDP) ໃຫ້ໄດ້ 3.100 ໂດລາ ແລະ ລາຍຮັບແຫ່ງຊາດຕໍ່ຫົວຄົນ (GNI) ຈະໄດ້ປະມານ 2.450 ໂດລາ ຄຽງຄູ່ກັນນັ້ນ ການຂະຫຍາຍຕົວຂອງ GDP ສະເລ່ຍໃຫ້ໄດ້ຢ່າງໜ້ອຍ 7,5% ຕໍ່ປີຂຶ້ນໄປ, ໃນນັ້ນ ກະສິກໍາ ສະເລ່ຍ 3,2% ກວມເອົາ 19% ຂອງ GDP, ອຸດສາຫະກໍາ ສະເລ່ຍ 9,3% ກວມເອົາ 32% ຂອງ GDP, ບໍລິການສະເລ່ຍ 8,9% ກວມເອົາ 41% ຂອງ GDP (ບໍ່ລວມພາສີຂາເຂົ້າ).
Editor: ຕະວັນ ແສງສະຫວັນ
