ເພື່ອເປັນການສົ່ງເສີມການອ່ານ ແລະ ທັກສະທີ່ດີໃນການອ່ານເພື່ອຄວາມຮູ້, ປະໂຫຍດ ແລະ ຄວາມສະຫນຸກສະຫນານ ແກ່ນັກຮຽນ-ນັກສຶກສາ ພາຍໃນ ມະຫາວິທະຍາໄລແຫ່ງຊາດ ກໍ່ຄື ບຸກຄົນທົ່ວໄປ. ສະນັ້ນໃນລະຫວ່າງວັນທີ 2-3 ມີຖຸນາ 2017 ນີ້ ຄະນະອັກສອນສາດ, ມະຫາວິທະຍາໄລແຫ່ງຊາດ ( ວິທະຍາເຂດດົງໂດກ) ໄດ້ຈັດງານເທດສະການອາຫານ ເພື່ອສະຫນອງ ຂື້ນ ເປັນປີທີ 2 ທີ່ສະໂມສອນໃຫຍ່ ມະຫາວິທະຍາໄລ ແຫ່ງຊາດ. ດັ່ງທີ່ຮູ້ນຳກັນ ແລ້ວວ່າ: ການອ່ານຊ່ວຍເຮັດໃຫ້ເປັນຄົນດີ ເພີ່ມປັນຍາຄວາມຮູ້ ແລະ ເພີ່ມຄວາມມ່ວນຊື່ນໃນໂຕ ແລະ ບໍ່ມີຄວາມມ່ວນຊື່ນໃດໆ ທີ່ມີລາຄາຖືກເທົ່າກັບການອ່ານ ພ້ອມກັນນັ້ນ ກ່ອນຈະເປັນນັກຂຽນທີ່ດີ ກໍ່ເລີ່ມມາຈາກການເປັນນັກອ່ານທີ່ດີ. ດັ່ງທີ່ຮູ້ນຳກັນແລ້ວວ່າ ບັນດາຜູ້ນຳທີ່ມີຊື່ສຽງລະດັບໂລກ, ລະດັບຊາດ, ນັກຄົ້ນຄວ້າ, ນັກປະພັນ, ນັກປາດ, ຄູອາຈານ ແລະ ນັກບໍລິຫານທີ່ດີເດັ່ນ ລ້ວນແຕ່ເປັນຜູ້ທີ່ມີຄວາມສະຫງວນທາງດ້ານການອ່ານ. ເພາະການອ່ານຊ່ວຍເພີ່ມພູນປັນຍາ, ຄວາມສະຫລາດ, ເພີ່ມແຫລ່ງຄວາມຮູ້ ແລະ ການຄົ້ນຄິດທີ່ແຕກສານ ແຕ່ການອ່ານໃນບາງສິ່ງກໍ່ຕ້ອງໄດ້ຄົ້ນຄິດ ແລະ ຄັດເລືອກໃນສິ່ງທີ່ບໍ່ມີຄ່າອອກໄປ.  ສຳລັບງານເທດສະການອາຫານເພື່ອສະຫມອງ ( ເພື່ອປັນຍາ) ຄັງນີ້ ແມ່ນເປັນປີທີ 2 ທີ່ທາງຄະນະອັກສອນສາດ ມະຫາວິທະຍາໄລແຫ່ງຊາດ ໄດ້ຈັດຂື້ນມາ ໂດຍໄດ້ຮັບການຮ່ວມມື ແລະ ສະຫນັບສະຫນູນຈາກຫລາຍພາກສ່ວນ ເປັນຕົ້ນແມ່ນ ອະນຸກຳມະການ ຈາກມະຫາວິທະຍາໄລແຫ່ງຊາດ, ຈາກສະມາຄົມນັກປະພັນລາວ, ບັນດາອົງການຈັດຕັ້ງທັງພາກລັດ ແລະ ເອກກະຊົນ, ທຸລະກິດ, ຫ້າງຮ້ານ, ສຳນັກພີມປື້ມ ແລະ ພາກສ່ວນອື່ນໆ. ແລະ ຕະຫລອດໄລຍະ 2 ວັນຂອງການຈັດກິດຈະກຳ ແມ່ນມີນັກສຶກສາເຂົ້່ຮ່ວມງານ ບໍ່ຫນ້ອຍກວ່າ 5 ພັນຄົນ. ນອກຈາກນັ້ນ ໃນແຕ່ລະວັນ ຍັງໄດ້ປະກອບດ້ວຍກິດຈະກຳທີ່ດີດີ ກ່ຽວກັບການສົ່ງເສີມການອ່ານ, ເຊັ່ນ: -ການສຳມະນາໃນຫົວຂໍ້: ການນຳໃຊ້ພາສາລາວ ເຂົ້າໃນການຂຽນບົດ ສຳລັບຄົນຮຸ້ນໃຫມ່. - ການສຳພາດສົນທະນາພິເສດ ໃນຫົວຂໍ້: ບົດຍາດຂອງການອ່ານ ຕໍ່ການຂິດຂຽນ ແລະ ການໄດ້ຮັບລາງວັນໃນການໂຕ້ວາທີ. - ສຳມະນາ ໃນຫົວຂໍ້: ຄົນຮຸ້ນໃຫມ່ ກັບການອ່ານ.-ການສຳມະນາໃນຫົວຂໍ້: ອ່ານສ້າງພູມປັນຍາ ເພີ່ມຄຸນຄ່າໃຫ້ຊີວິດ ກ້າວສູ່ຄວາມສຳເລັດ.- ການບັນລະຍາຍ : ກ່ອນຈະເປັນນັກຂຽນ ຕ້ອງຜ່ານການອ່ານ.- ການບັນລະຍາຍຈາກການອ່ານກ້າວສູ່ການເປັນນັກປະພັນ ແລະ ຫົວຂໍ້ອື່ນໆ ທີ່ຫນ້າສົນໃຈ. ເຊິ່ງງານ ຄັ້ງນີ້ ແມ່ນຈະເພີ່ມທັກສະດີດີຫລາຍຢ່າງ ແລະ ກວ້າງຂວາງ ແກ່ນັກສຶກສາລາວ ໄດ້ເຂົ້່ໃຈຮຽນຮູ້ ແລະ ສຳຜັດຕົວຈິ່ງກັບປະສົບການຕົວຈິງ ຂອງຜູ້ທີ່ໄດ້ຮັບຜົນສຳເລັດທາງດ້ານການເປັນນັກອ່ານ, ນັກຂຽນ. ນອກຈາກນັ້ນ ພາຍໃນງານ ຍັງໄດ້ນຳເອົາຜົນງານຂອງນັກຂຽນ ທັງລຸ້ອາວຸໂສ ແລະ ລຸ້ນໃຫມ່ ມາວາງສະແດງ, ລວມທັງປື່ມອ່ານ ທີ່ມີສາລະ ຕໍ່ການພັດທະນາມັນສະຫມອງ ຄົນລຸ້ນໃຫມ່ ມາວາງສະແດງ ໄດ້ສຳຜັດ ແລະ ໄດ້ອ່ານ.

Editor: ກຳປານາດ ລັດຖະເຮົ້າ