ພິທີປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ໄດ້ຈັດຂື້ນໃນຕອນເຊົ້າວັນທີ 1 ມີຖຸນາ 2017 ຜ່ານມານີ້, ຢູ່ທີ່ສວນອຸທິຍານຫົວພັນ-ກວາງນິງ ເທດສະບານຕົວເມືອງຊຳເໜືອ, ແຂວງຫົວພັນ. ໂດຍການເຂົ້າຮ່ວມຂອງ ທ່ານ ວັນໄຊ ແພງຊຸມມາ ເລຂາພັກແຂວງ-ເຈົ້າແຂວງໆຫົວພັນ,ມີບັນດາທ່ານການນຳຂັ້ນແຂວງ, ການນຳເມືອງຊຳເໜືອ, ພະແນກການ-ກົມກອງ, ພະນັກງານ-ລັດຖະກອນ ແລະ ມວນຊົນເຂົ້າຮ່ວມຢ່າງພ້ອມພຽງ. ໃນພິທີ ທ່ານ ບຸນຄຳ ສີດາວົງ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ມີຄຳເຫັນວ່າ: ການຈັດງານໃນຄັ້ງນີ້ ເປັນການປູກຈິດສໍານຶກໃຫ້ອະນຸຊົນ, ເຍົາວະຊົນ ແລະ ຊາວໝຸ່ມລຸ້ນໃໝ່ເຂົ້າໃຈ ແລະ ເຫັນໄດ້ຄວາມໝາຍຄວາມສຳຄັນຂອງປ່າໄມ້, ເປັນການສ້າງພື້ນທີ່ສີຂຽວ ເພື່ອອາກາດ ແລະ ສິງແວດລ້ອມທີ່ຊົດຊື່ນ ຕາມທິດທາງນະໂຍບາຍຂອງພັກ-ລັດໄດ້ກໍານົດໃຫ້ພື້ນທີ່ປ່າໄມ້ທົ່ວປະເທດກວມ 70% ຂື້ນໄປ. ຕົ້ນໄມ້ທີ່ນໍາມາປູກໃນຄັ້ງນີ້ມີຈໍານວນ 1,500 ກວ່າຕົ້ນ, ໃນນີ້ມີຕົ້ນໄມ້ພື້ນເມືອງ, ຕົ້ນໄມ້ເສດຖະກິດ, ໄມ້ໃຫ້ໝາກ ແລະ ຕົ້ນໄມ້ປະດັບ, ໂດຍປູກຢູ່ 4 ຈຸດຄື: ສວນອຸທິຍານຫົວພັນ-ກວາງນິງ, ສະໂມສອນແຂວງ, ວັດອົງຕື້ສີບຸນເຮືອງໄຊຍາຣາມ ແລະ ເຂດປ່າຟື້ນຟູປ່າ ຫຼັກ12. ສະເພາະປີ 2017 ນີ້, ທົ່ວແຂວງຫົວພັນ ຈະປູກຕົ້ນໄມ້ໃຫ້ໄດ້ ຈຳນວນ 1 ລ້ານ 5 ແສນຕົ້ນ, ປູກໃນເນື້ອທີ່ 2,000 ເຮັກຕາ, ໂດຍມອບໃຫ້ພະແນກກະສິກຳ ແລະ ປ່າໄມ້ແຂວງຫົວພັນ ສົມທົບກັບຫ້ອງການກະສິກຳ ແລະ ປ່າໄມ້ ໃນແຕ່ລະເມືອງ, ພະແນກການ-ກົມກອງ ແລະ ກຸ່ມບ້ານໃນການເປັນຜູ້ຈັດຕັ້ງປະຕິບັດ. ແລະ ໂອກາດນີ້ການນໍາແຂວງ, ການນຳເມືອງຊຳເໜືອ ພ້ອມດ້ວຍມວນຊົນທີ່ເຂົ້າຮ່ວມກໍ່ໄດ້ຮ່ວມກັນຕັດແຖບຜ້າເປີດພິທີປູກຕົ້ນໄມ້ ຢ່າງເປັນທາງການ ແລະ ໄດ້ພ້ອມກັນປູກຕົ້ນໄມ້ຢູ່ຕາມຈຸດທີ່ຕົ້ນເອງຮັບຜິດຊອບດ້ວຍຄວາມຟົດຟື້ນ.ຈຸດປະສົງ ກໍ່ເພື່ອຄືນສີຂຽວສູ່ທຳມະຊາດ ການປູກຕົ້ນໄມ້ໃນວັນນີ້ກໍ່ເພື່ອຄວາມຊົດຊື່ນໃນວັນໜ້າ, ທັງເປັນການປົກປັກຮັກສາສິ່ງແວດສ້ອມ, ເປັນການຟື້ນພູປ່າ ແລະ ຮັກສາຊັບພະຍາກອນປ່າໄມ້ ໃຫ້ຍືນຍົງຢູ່ຄຽງຄູ່ຄົນເຮົາຕະຫຼອດໄປ.
Editer: ກຳປານາດ ລັດຖະເຮົ້າ
