ພິທີເປີດໂຄງການກໍ່ສ້າງອາຄານສານປະຊາຊົນ ແຂວງຫົວພັນ ຫຼັງໃໝ່ໄດ້ຈັດຂື້ນໃນວັນທີ ທ້າຍເດືອນພຶດສະພາ 2017 ຜ່ານນີ້ ຢູ່ສະຖານທີ່ການກໍ່ສ້າງ ທີ່ກົງກັນຂ້າມໂຮງຮຽນ ມສ ພັນລາ, ໂດຍການເຂົ້າຮ່ວມຂອງ ທ່ານ ຄຳວອນ ບຸນທະວົງ ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນ, ມີບັນດາທ່ານໃນຄະນະຄຸ້ມຄອງໂຄງການຂັ້ນແຂວງ, ບັນດາເຈົ້າຂອງໂຄງການ, ຜູ້ອຳນວຍການບໍລິສັດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມນຳ.ໃນພິທີ ທ່ານ ພອນສຸກ ທອງສົມບັດ ປະທານສານປະຊາຊົນແຂວງ ໃນນາມເຈົ້າຂອງໂຄງການ ໄດ້ມີຄຳເຫັນວ່າ: ໂຄງການກໍ່ສ້າງອາຄານສານປະຊາຊົນ ແມ່ນທືນງົບປະມານຂອງລັດ100 ສ່ວນຮ້ອຍ, ໃນມູນຄ່າການກໍ່ສ້າງທັງໝົດ ( 8 ຕື້ 324 ລ້ານກວ່າກີບ) ໂດຍແມ່ນສານປະຊາຊົນແຂວງຫົວພັນ ເປັນເຈົ້າຂອງໂຄງການ ແລະ ບໍລິສັດ ໄຊຈະເລີນຊັບກໍ່ສ້າງເຄຫາສະຖານ-ຂົວທາງ ແລະ ຊົນລະປະທານ ຈຳກັດ, ເປັນຜູ້ຮັບເໝົາກໍ່ສ້າງ ໂດຍຈະໃຊ້ເວລາກໍ່ສ້າງທັງມົດ 24 ເດືອນ, ເຊີ່ງເລີ່ມແຕ່ວັນທີ 31 ພືດສະພາ 2017 ຫາ 31 ພືດສະພາ 2019 ໃຫ້ສຳເລັດສົມບູນ. ໂຄງການນີ້ ເປັນອາຄານສາມຊັ້ນ ໂຄງສ້າງເບຕົງເສີມເຫຼັກ ໂຄງຫຼັງຄາ ມຸງດ້ວຍຊີແຟັກ, ປຸກສ້າງໃສ່ເນື້ອທີ່ 2.250 ຕາແມັດ, ປະກອບເຟີນິເຈີ-ລະບົບໄຟຟ້າ-ນໍ້າປະປາ ຄົບຊຸດ ພ້ອມກໍ່ສ້າງກຳແພງອ້ອມຮອບ. ພາຍຫຼັງກໍ່ສ້າງສຳເລັດແລ້ວ ຈະສ້າງສິ່ງອຳນວຍຄວາມສະດວກໃຫ້ແກ່ການປະຕິບັດໜ້າທີ່ການເມືອງຂອງພັກ-ລັດ ໃຫ້ມີປະສິດທິຜົນ ເວົ້າສະເພາະສານປະຊາຊົນແຂວງຫົວພັນ ໄດ້ມີຫ້ອງການເຮັດວຽກເປັນເອກະລາດ ເພີ່ມຄວາມສະດວກສະບາຍໃຫ້ແກ່ຄະນະພັກ-ຄະນະສານ ແລະ ພະນັກງານດີຂື້ນ. ໂອກາດອັນເປັນສີລິມຸງຄຸນນີ້ ບັນດາຄະນະປະທານ ແລະ ທ່ານແຂກທີ່ເຂົ້າຮ່ວມ ຍັງໄດ້ພ້ອມກັນຕັດແຖບຜ້າເປີດການກໍ່ສ້າງຢ່າງເປັນທາງການ ແລະ ພ້ອມກັນ ໂສກຊີມັງລົງໃສ່ເສົາຕົ້ນຕື່ມອີກ.
Editer: ກຳປານາດ ລັດຖະເຮົ້າ
