ງານວາງສະແດງ ອາຊີໃຕ້-ອາຊີຕາເວັນອອກສ່ຽງໃຕ້ ແລະ ປະຊຸມສົ່ງເສີມການລົງທຶນ 2017 ໄດ້ເປີດຂື້ນຢ່າງເປັນທາງການ ໃນຕອນເຊົ້າຂອງວັນທີ 12 ມິຖຸນາ 2017 ໂດຍມີບັນດາປະເທດໃນຂົງເຂດອາຊີໃຕ້-ອາຊີຕາເວັນອອກສ່ຽງໃຕ້ ລວມທັງ ສປປ ລາວ ເຂົ້າຮ່ວມ. ຂະນະທີ່ ຮ້ານວາງສະແດງສິນຄ້າຂອງລາວ ມີ 22 ບໍລິສັດ ເທົ່າກັບ 56 ຮ້ານເຂົ້າຮ່ວມງານ. ດ້ານຮອງລັດ ຖະມົນຕີກະຊວງ ແຜນການ ແລະ ການລົງທຶນ ທ່ານ ຄຳລຽນ ພົນເສນາ ເປີດເຜີຍວ່າ: ປີຜ່ານມາ ມູນຄ່າການຄ້າ ສປປ ລາວ ກັບ ແຂວງ ຢຸນນານ ບັນລຸເຖິງ 1.37 ຕື້ໂດລາສະຫະລັດ ກວມເອົາ 40 ສ່ວນຮ້ອຍ ຂອງການຄ້າ ລາວ-ຈີນ. ໃນນີ້ ມີບໍລິສັດຈາກແຂວງ ຢຸນນານ ມາລົງທຶນຂະແໜງການຕ່າງໆຢູ່ລາວ 219 ບໍລິສັດ, ລວມມູນຄ່າ 1.98 ຕື້ໂດລາສະຫະລັດ. ງານວາງສະແດງອາຊີໃຕ້-ອາຊີຕາເວັນອອກສ່ຽງໃຕ້ ແລະ ປະຊຸມສົ່ງເສີມການລົງທຶນ ປະຈຳປີ 2017 ຈັດຂຶ້ນທີ່ສູນວາງສະແດງສິນຄ້າສາກົນ ຕຽນຊີ, ນະຄອນຄຸນໝິງ ໂດຍມີທັງໝົດ ຫ້ອງວາງສະແດງທັງໝົດ 8,000 ຫ້ອງ ໃນພື້ນທີ່ 180,000 ຕາແມັດ ເຊິ່ງໝວດສິນຄ້າທີ່ນໍາ ມາວາງສະແດງປະກອບມີ: ຫັດຖະກຳແຜ່ນແພ ແລະ ເຄື່ອງນຸ່ງຫົ່ມ, ແຮ່ທາດ, ການຢາ ແລະ ອຸປະກອນການແພດ, ເຄື່ອງກໍ່ສ້າງ, ອຸປະກອນຕົບແຕ່ງ, ກົນຈັກ ແລະ ອາໄຫຼ່, ຊັອຟແວຣ໌, ເຄື່ອງປະດັບ, ເຄື່ອງຫັດຖະກຳ ແລະ ໂຄສະນາການທ່ອງທ່ຽວ. ສໍາລັບ ສປປ ລາວ ແມ່ນໄດ້ຮັບກຽດເຂົ້າຮ່ວມເປັນປະເທດແຂກກິດຕິມະສັກ ແລະ ປະທານໜູນວຽນກອງປະຊຸມ ໃນງານວາງສະແດງອາຊີໃຕ້ ແລະ ອາຊີຕາເວັນອອກສ່ຽງໃຕ້ໃນຄັ້ງນີ້, ເຊິ່ງຖືເປັນນິມິດໝາຍອັນສໍາຄັນ ແລະ ເປັນກາລະໂອກາດທີ່ເໝາະສົມ ໃຫ້ແກ່ປະເທດລາວຈະໄດ້ໝຸນໃຊ້ເວທີນີ້ຢ່າງເຕັມທີ ເຂົ້າໃນການສ້າງສາຍພົວພັນອັນດີ ລະຫວ່າງ ປະຊາຊົນສອງຊາດ ລາວ-ຈີນ ເພື່ອເສີມຂ ຫຍາຍການຄ້າ-ການລົງທຶນ ແລະ ຂະແໜງການອື່ນໆ. ໂອກາດດຽວກັນ, ຄະນະຜູ້ແທນຂັ້ນສູງຍັງໄດ້ເປີດຫ້ອງວາງສະແດງການຄ້າຂອງລາວ ເຊິ່ງໃຫ້ກຽດ ຕັດແຖບຜ້າຂອງ ທ່ານ ຄໍາລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ສົມສະຫວາດ ເລັ່ງສະຫວັດ, ອະດີດຮອງນາຍົກລັດຖະມົນຕີ, ທ່ານ ສົມຫວັງ ນິນທະວົງ, ຫົວໜ້າກົມສົ່ງເສີມການຄ້າ, ຜູ້ຕາງໜ້າຈາກກະຊວງການຕ່າງປະເທດ, ສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ຫົວໜ່ວຍທຸລະກິດລາວເຂົ້າຮ່ວມ.ງານວາງສະແດງດັ່ງກ່າວ ຈະດໍາເນີນໄປເປັນເວລາ 07 ວັນ ເລີ່ມແຕ່ວັນທີ 12-18 ມິຖຸນາ 2017.
ຂອບໃຈຂໍ້ມູນຈາກ: ຫນັງສືພິມເສດຖະກິດ-ການຄ້າ.
Editor: ຕະວັນ ແສງສະຫວັນ
