ທ້າວ ສີອຳພັນ ຈັນທະວິຈິດ ແລະ ນາງ ມະນີທິບ ວົງພະຈັນ ໄດ້ເປັນຕົວແທນຂອງ ສປປ ລາວ ທີ່ຊະນະເລີດການແຂ່ງຂັນອອກແບບຊຸດແຟຊັ່ນໃນໂຄງການ “ຄົ້ນຫາສຸດຍອດນັກອອກແບບແຫ່ງອາຊຽນ” ເຊິ່ງຈັດໂດຍສາຍການບິນແອເອເຊຍ ຫຼື AirAsia Runway Ready Designer Search 2017 ເພື່ອຮ່ວມຊິງຊະນະເລີດໃນການແຂ່ງຂັນດັ່ງກ່າວ ທີ່ນະຄອນຫຼວງ ກົວລາລຳເປີ ປະເທດມາເລເຊຍ ໃນເດືອນສິງຫາທີ່ຈະມາເຖິງນີ້.ໂຄງການຄົ້ນຫາສຸດຍອດ ນັກອອກແບບແຫ່ງອາຊຽນ ຂອງສາຍການບິນແອເອເຊຍປີ 2017 ເຊິ່ງປະເທດລາວໄດ້ຮັບສິດເຂົ້າຮ່ວມຄັດເລືອກເປັນຄັ້ງທຳອິດ. ສຳລັບການແຂ່ງຂັນຢູ່ລາວໄດ້ເລີ່ມໃນອາທິດຜ່ານມາ ໂດຍມີຜູ້ສະໝັກທັງໝົດ 20 ຄົນ ມີອາຍຸລະຫວ່າງ 18-30 ປີ ແລະ ຄັດໄດ້ 5 ຄົນ ສຸດທ້າຍ ຈາກນັ້ນ ກໍ່ຄັດເອົາຜູ້ດີທີ່ສຸດພຽງແຕ່ 2 ຄົນ ເພື່ອເປັນຕົວແທນຂອງລາວເຮົາເຂົ້າຮ່ວມແຂ່ງຂັນ ທີ່ນະຄອນ ຫຼວງກົວລາລຳເປີ ປະເທດມາເລເຊຍ ໃນເດືອນສິງຫາທີ່ຈະມາເຖິງນີ້ ເຊິ່ງຖືວ່າໄດ້ຮັບຄວາມສົນໃຈຈາກມວນຊົນຢ່າງກວ້າງຂວາງ. ສ່ວນໂອກາດຕໍ່ໄປຍັງຈະຈັດສຳມະນາກ່ຽວກັບການອອກແບບຊຸດແຟຊັນ ເພື່ອໃຫ້ໄວໜຸ່ມ-ຍິງໜຸ່ມລາວ ໄດ້ສະແດງຜົນງານ ແລະ ພັດທະນາສີມືຂອງຕົນໃຫ້ໂດດເດັ່ນໃນເວທີພາກພື້ນຕໍ່ໄປ.ໂຄງການດັ່ງກ່າວແມ່ນໄດ້ລວມເອົານັກອອກແບບທັງ 10 ປະເທດອາຊຽນ ເພື່ອມາແຂ່ງຂັນກັນໃນຮອບຊິງຊະນະເລີດ, ແຕ່ວ່າໃນແຕ່ລະປະເທດນັ້ນໆ ກໍ່ໄດ້ມີການເຟັ້ນຫາສຸດຍອດນັກອອກແບບ ປະເທດລະ 2 ຄົນ ທີ່ເກັ່ງທີ່ສຸດ ມາຮ່ວມແຂ່ງຂັນ ແລະ ແນວຄວາມຄິດໃນການອອກແບບແມ່ນນຳສະເໜີແຟຊັນທີ່ບົ່ງບອກເຖິງເອກກະລັກໃດ ໜຶ່ງ ຂອງປະເທດນັ້ນ ແລ້ວຜົນງານດັ່ງກ່າວໃຫ້ສາມາດນຳໃຊ້ໄດ້ແທ້ໆ ຈຶ່ງຖືວ່າຜ່ານການຄັດເລືອກຈາກກຳມະການ. ທ່ານ ບັນດິດ ລາດຊະວົງ ຜູ້ອອກແບບແຟຊັນ ຂອງ Men Folder ໜຶ່ງໃນຄະນະກຳມະການຜູ້ໃຫ້ຄະແນນຍັງເປີດເຜີຍຕໍ່ທິມຂ່າວເຮົາອີກ ວ່າ: ເຫດຜົນທີ່ເລືອກເອົາ 2 ຄົນນີ້ ແມ່ນເຂົາເຈົ້າມີຄວາມສາມາດໃນການອອກແບບພ້ອມທັງຜະລິດ ເພື່ອນຳໃຊ້ໄດ້ແທ້ ແລະ ເປັນຊຸດແຟຊັນທີ່ປະຍຸກຄວາມເປັນລາວໆອອກມາຢ່າງລົງຕົວ. ພິເສດ ນັກອອກແບບ 2 ຄົນ ທີ່ເປັນຕົວແທນຂອງປະເທດລາວ ຈະໄດ້ຮັບລາງວັນເປັນເງິນມູນຄ່າ 48 ລ້ານກີບ ເພື່ອຜະລິດຊຸດແຟຊັນ, ໄດ້ລົງວາລະສານຂອງສາຍການບິນແອເອເຊຍ ຈຳນວນ 6 ໜ້າ ແລະ ໄດ້ນໍາຜົນງານຮ່ວມວາງສະແດງໃນງານ KL Fashion Week ໃນປີ 2018 ນໍາອີກ. ໂຄງການ “ຄົ້ນຫາສຸດຍອດນັກອອກແບບແຫ່ງອາຊຽນ” ຫຼື AirAsia Runway Ready Designer Search ຈັດຂຶ້ນນັບແຕ່ປີ 2015 ເປັນຕົ້ນມາ. ສໍາລັບປີນີ້ ລາວເຮົາໄດ້ເຂົ້າຮ່ວມເປັນຄັ້ງທໍາອິດ ແລະ ກໍ່ໄດ້ນັກອອກແບບໄວໜຸ່ມ 2 ຄົນ ທີ່ເປັນຕົວແທນໄປຮ່ວມແຂ່ງຂັນໃນເດືອນສິງຫາທີ່ຈະມາເຖິງນີ້. ພິທີຖະແຫຼງຂ່າວຈັດຂຶ້ນໃນວັນທີ 10 ມິຖຸນາຜ່ານມາ ທີ່ໂຮງແຮມ ລາວພລາຊາ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ນາງ ປານີ ໄຊຍະວົງສ໌, ທ່ານ ແອນດຣິວ ທັນ, ທ່ານ ບັນດິດ ລາດຊະວົງ ແລະ ທ່ານ ເທບ ນີຣະນາພູຣີ ຜູ້ຈັດການອາວຸໂສຝ່າຍຜະລິດຕະພັນຂົງເຂດອິນດູຈີນ ສາຍກາຍບິນແອເອເຊຍ ເຂົ້າຮ່ວມ.
Editor: ຕະວັນ ແສງສະຫວັນ
