ໃນເວທີສຳມະນາເຊື່ອມຕໍ່ການຄ້າ ລາວ-ໄທ ກ້າວສູ່ຄວາມສຳເລັດ ຈັດຂື້ນໃນວັນທີ່ 8 ມິຖຸນາ ຜ່ານມາທີ່ສູນການຄ້າລາວໄອເຕັກ ນະຄອນຫຼວງວຽງຈັນ. ທ່ານ ມະຍູຣິ ພາດລຳຈຽກ, ທີ່ປຶກສາສະມາຄົມການຫຸ້ມຫໍ່ໄທ ໄດ້ຂື້ນກ່າວໃຫ້ ຄວາມຮູ້ກ່ຽວກັບການຫຸ້ມຫໍ່ຖືເປັນປັດໄຈຫຼັກ ທີ່ຈະເຮັດໃຫ້ສີນຄ້າບໍ່ມີການເນົ່າເສຍໄວ, ເຮັດໃຫ້ເກັບຮັກສາໄດ້ດົນ ແລະ ທັງເປັນການເພີ່ມມູນຄ້າລາຄາສິນຄ້າດັ່ງກ່າວອີກດ້ວຍ ເພື່ອເຮັດໃຫ້ຄົງສະພາບຂອງສິນຄ້າ ໃນລະຫວ່າງການຂົນສົ່ງ ຖືວ່າມີຄວາມສຳຄັນເປັນອັນດັບຕົ້ນໆ ທີ່ຜູ້ປະກອບການທຸລະກິດຂະໜາດນ້ອຍ ແລະ ຂະໜາດກາງ ຫຼື SME ຕ້ອງຄຳນຶງເຖິງ ແລະ ຫ້າມເບິ່ງຂ້າມໃນການຂົນສົ່ງອາຫານສົດທຸກໆປະເພດ. ນອກຈາກການຮັກສາອຸດຫະພູມແລ້ວ, ຄຸນສົມບັດຂອງຖົງ ຫຼື ກ່ອງທີ່ໃຊ້ໃນການບັນຈຸອາຫານສົດ ປະເພດຕ່າງໆ ຈະຕ້ອງເປັນວັດສະດຸທີ່ສະອາດ ປາສະຈາກສິ່ງເຈືອປົນ ແລະ ສາມາດປ້ອງກັນການກະທົບທີ່ອາດຈະກໍ່ໃຫ້ເກີດ ຄວາມເສຍຫາຍກັບສິນຄ້າຂະນະທີ່ກຳລັງຂົນສົ່ງ; ການບັນຈຸສິນຄ້າບໍ່ຄວນເກີນ 30 ກິໂລຕໍ່ 1 ຖົງ ຫຼື 1 ກ່ອງ, ຖ້າເປັນອາຫານປະເພດໜາກໄມ້ ຫຼື ຜັກສົດ ສິ່ງບັນຈຸໃສ່ ຄວນຈະເປັນຫີບຫໍ່ ທີ່ເຮັດມາຈາກວັດສະດຸ ທີ່ສາມາດຍ່ອຍໄດ້, ໃຫ້ອາກາດເຂົ້າ-ອອກງ່າຍພໍສົມຄວນ ເພາະໜາກໄມ້ ແລະ ຜັກສົດ ເປັນສິ່ງທີ່ຍັງຕ້ອງການອາກາດຢູ່ຕະຫຼວດເວລາ ເຊິ່ງຖ້າຫີບຫໍ່ ບໍ່ສາມາດລະບາຍອາກາດໄດ້ ກໍ່ຈະເກີດການກາທົບຂອງແກ໊ສກາກບອນ ພາຍໃນສິ່ງບັນຈຸໄດ້ ເຮັດໃຫ້ໜາກໄມ້ ແລະ ຜັກສົດເຊື່ອມຄຸນນະພາບໄດ້ໄວກ່ອນ ເຖິງມືຂອງຜູ້ບໍລິໂພກ, ກ່ອງທີ່ໃຊ້ບັນຈຸຕ້ອງມີຄວາມທົນທານຕໍ່ຄວາມເຢັນ ເມື່ອໄດ້ຮັບຄວາມເຢັນກ່ອງບັນຈຸບໍ່ ຂົດ ຫຼື ແຕກຫັກໄດ້ງ່າຍ ແລະ ຍັງຕ້ອງທົນຕໍ່ແຮງກົດທັບໄດ້ ເນື່ອງຈາກອາຫານສົດມີສ່ວນປະກອບຂອງນ້ຳເປັນຫຼັກ ມີຄວາມບອບບາງ ສິ່ງບັນຈຸຈຶ່ງຄວນຮັບແຮງກົດທັບ ເມື່ອມີການວາງຊ້ອນໆກັນ.
Editor: ຕະວັນ ແສງສະຫວັນ
