ເຈົ້າໜ້າທີ່ກອງວິຊາການ ກ່ຽວກັບການປ້ອງກັນ ແລະ ຄວບຄຸມ ການລະບາດຂອງຕັກແຕນຝຸງໄມ້ປ່ອງ ຂອງພະແນກກະສິກຳ ແລະ ປ່າໄມ້ແຂວງຫົວພັນ ໄດ້ສົມທົບກັບ ຫ້ອງການກະສິກຳ ແລະ ປ່າໄມ້ ເມືອງວຽງໄຊ ໄດ້ເປີດຂະບວນການສີດພົ່ນຢາກຳຈັດຕັກແຕນຝຸງໄມ້ປ່ອງຂື້ນ. ອີງໃສ່ສະພາບທີ່ຕັ້ງພູມສັນຖານ ແລະ ການປ່ຽນແປງຂອງດິນຟ້າອາກາດ, ຜ່ານການຈັດຕັ້ງປະຕິບັດຕົວຈິງ ປະຈຳປີ 2017 ສຳຫຼວດເຫັນຢູ່ໃນຈຳນວນ 24 ເມືອງ 5 ແຂວງພາກເໜືອຂອງລາວ ຄື: ແຂວງຫົວພັນ, ຊຽງຂວາງ,ຫຼວງພະບາງ, ອຸດົມໄຊ ແລະ ຜົ້ງສາລີ ມີຈຳນວນ 640 ຈຸດ ເຮັດໃຫ້ມີການລະບາດຕັກແຕນຝຸງໄມ້ປ່ອງ, ສຳລັບແຂວງຫົວພັນ ມີຢູ່ໃນ 8 ເມືອງ ຄື: ເມືອງວຽງໄຊ, ເມືອງຊຳເໜືອ, ເມືອງຊຽງຄໍ້, ເມືອງສົບເບົາ, ເມືອງແອດ, ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ, ມີ 73 ບ້ານ, 178 ຈຸດ ໃນເນື້ອທີ່ 200 ກວ່າເຮັກຕ່າ ປັດຈຸບັນນີ້ຄວບຄຸມໄດ້ແລ້ວ 80 ຈຸດ. ຕໍ່ກັບສະພາບການດັ່ງກ່າວ ທາງເຈົ້າໜ້າທີ່ ພະແນກກະສິກໍາ ແລະ ປ່າໄມ້ແຂວງ, ຫ້ອງການກະສິກຳ ແລະ ປ່າໄມ້ເມືອງ ສົມທົບກັບບ້ານ, ກຸ່ມບ້ານ ປ້ອງກັນຕ້ານ ແລະ ທຳລາຍເພື່ອບໍ່ໃຫ້ແຜ່ລາມ ຂະຫຍາຍພັນໄປໃນພື້ນທີ່ບ້ານ, ເມືອງອື່ນໆທີ່ໃກ້ຄຽງ ເນື່ອງຈາກລະບົບນິເວດວິທະຍາເໜາະສົມເຊັ່ນ: ພື້ນທີ່ປ່າໄມ້ປ່ອງ, ເຂົ້າໄຮ່, ສາລີ ແລະ ອື່ນໆ ທີ່ເປັນແຫຼ່ງອາຫານ ແລະ ເປັນເງື່ອນໄຂເອື້ອອຳນວຍແກ່ການຂະຫຍາຍປະຊາກອນຂອງຕັກແຕນຝຸງໄມ້ປ່ອງ ການລະບາດຂອງຕັກແຕນຝຸງໄມ້ປ່ອງນີ້ ມັນເປັນຜົນກະທົບອັນຮ້າຍແຮງ ຕໍ່ການພັດທະນາເສດຖະກິດ - ສັງຄົມແຫ່ງຊາດ ຕໍ່ຄວາມໝັ້ນຄົງທາງດ້ານສະບຽງອາຫານ, ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ. ຂະແໜງປູກຝັງ, ກະສິກຳ ແລະ ປ່າໄມ້ ແຂວງຫົວພັນ ໃຫ້ຮູ້ໃນຕົ້ນເດືອນພຶດສະພາຜ່ານມາວ່າ: ນັບແຕ່ເດືອນມີນາເປັນຕົ້ນມາ, ໄດ້ມີຕັກແຕນຝູງໄມ້ປ່ອງລະບາດຂຶ້ນຢ່າງຫລວງຫລາຍຢູ່ 8 ເມືອງຄື: ເມືອງຊ່ອນ, ເມືອງຮ້ຽມ, ຫົວເມືອງ, ເມືອງແອດ, ວຽງໄຊ, ສົບເບົາ, ຊຽງຄໍ້ ແລະ ເມືອງຊຳເໜືອ. ລວມມີ 63 ບ້ານ, ກວມເອົາ 162 ຈຸດໃນພື້ນທີ່ 310 ເຮັກຕາ, ໃນນັ້ນ ເມືອງ ວຽງໄຊ ພົບຫລາຍກວ່າໝູ່ມີ 40 ຈຸດ, ກວມເອົາ 16 ບ້ານ. ມາຮອດປັດຈຸບັນ ສາມາດພົ່ນສີດຢາໄປແລ້ວຈຳນວນໜຶ່ງ.
Editor: ຕະວັນ ແສງສະຫວັນ
