ທ່ານ ບົວວຽງ ຈຳປາພັນ, ຫົວຫນ້າໂຄງການກໍ່ສ້າງຂົວຂ້າມນ້ຳຂອງ ປາກລາຍ-ຊະນະຄາມ ເປີດເຜີຍວ່າ: ໂຄງການກໍ່ສ້າງຂົວຂ້າມນ້ຳຂອງຈຸດ ບ້ານນາສັກ, ເມືອງປາກລາຍ, ແຂວງໄຊຍະບູລີ ຫາ ບ້ານຄົກເຂົ້າດໍ, ເມືອງຊະນະຄາມ, ແຂວງວຽງຈັນ. ປະຈຸບັນ ການກໍ່ສ້າງແມ່ນສຳເລັດເກືອບຮ້ອຍສ່ວນຮ້ອຍແລ້ວ ເຊິ່ງຫນ້າວຽກແມ່ນສຳເລັດ ການເທເບຕົງຫນ້າຂົວຮຽບຮ້ອຍແລ້ວ ແຕ່ວັນທີ 31 ມີນາ ແລະ ໄດ້ເປີດໃຫ້ປະຊາຊົນໄດ້ນຳໃຊ້ຊົ່ວຄາວ ໃນໄລຍະຂອງບຸນປີໃຫມ່ລາວທີ່ຜ່ານມາ ເພື່ອອຳນວຍຄວາມສະດວກໃຫ້ແກ່ການຄົມມະນາຄົມ ແລະ ການໄປມາຫາສູ່ຂອງປະຊາຊົນ ໂດຍໃຫ້ລົດເບົາສັນຈອນໄປມາໄດ້. ປະຈຸບັນ ທາງໂຄງການພວມຂຸ້ນຂ້ຽວວຽກທີ່ຍັງຄ້າງ ຄື: ອານາໄມ, ທາສີ ແລະ ປູຢາງອັດສະຟານທັບຫນ້າທາງ ຊຶ່ງຈະສຸມໃສຈັດຕັ້ງປະຕິບັດໃຫ້ສຳເລັດໃນກາງເດືອນມີຖຸນານີ້ ແລ້ວຈະສະເຫນີ ພາກສ່ວນທີ່ກ່ຽວຂ້ອງ ເພື່ອເປີດນຳໃຊ້ຂົວຢ່າງເປັນທາງການ ແລະ ຖ້າຫາກໄດ້ຮັບການເຫັນດີ ຄາດວ່າໃນທ້າຍເດືອນມີຖຸນາ ຂົວດັ່ງກ່າວຈະເປີດນຳໃຊ້ຢ່າງເປັນທາງການ. ຂົວຂ້າມນ້ຳຂອງ ປາກລາຍ-ຊະນະຄາມ, ເປັນໂຄງການຫນຶ່ງທີ່ນອນຢູ່ໃນບູລິມະສິດຂອງລັດຖະບານ ເພື່ອພັດທະນາເສດຖະກິດ-ສັງຄົມ ກໍ່ຄືການພັດທະນາພື້ນຖານໂຄງລ່າງ, ອຳນວຍຄວາມສະດວກໃນການຄົມມະນາຄົມການຂົນສົ່ງ, ການຄ້າ ແລະ ການສັນຈອນໄປມາຫາສູ່ຂອງປະຊາຊົນທັງສອງແຂວງ ໄປສູ່ແຂວງພາກເຫນືອ ແລະ ປະເທດເພື່ອນບ້ານ. ໂຄງການກໍ່ສ້າງຂົວຂ້າມນ້ຳຂອງ ປາກລາຍ-ຊະນະຄາມ ມີມູນຄ່າການກໍ່ສ້າງທັງຫມົດ 189,14 ຕື້ກວ່າກີບ ໃນນັ້ນ ເປັນທຶນຊ່ວຍເຫລືອຈາກລັດຖະບານໂຮນລັງ 28,12 ຕື້ກວ່າກີບ ແລະ ເປັນທຶນຂອງລັດຖະບານລາວ 161,01 ຕື້ກວ່າກີບ, ຂົວຄວາມຍາວທັງຫມົດ 365 ແມັດ ມີຄວາມກ້ວາງ 11,40 ແມັດ, ມີສອງຊ່ອງຈາລະຈອນ, ມີທາງຄົນຍ່າງສອງຂ້າງ ເບື້ອງລະ 1,50 ແມັດ ແລະ ໄດ້ເລີ່ມລົງມືການກໍ່ສ້າງມາຕັ້ງແຕ່ປີ 2012 ເປັນຕົ້ນມາ.
Editor: ຕະວັນ ແສງສະຫວັນ
