ເນື່ອງໃນໂອກາດວັນປູກຕົ້ນແຫ່ງຊາດ ສະນັ້ນ ຢູ່ທີ່ບ້ານສີສະຫວາດ, ເມືອງນາຊາຍທອງ, ນະຄອນຫລວງວຽງຈັນ ອຳນາດການປົກຄອງເມືອງນາຊາຍທອງ, ການນໍາກະຊວງປ້ອງກັນປະເທດ, ແລະ ບໍລິສັດ ປີໂຕລ້ຽມເທດດິ້ງລາວ ມະຫາຊົນ ພ້ອມດ້ວຍ ພໍ່ແມ່ປະຊາຊົນ ນ້ອງນັກຮຽນ ໄດ້ຮ່ວມກັນປູກຕົ້ນໄມ້ໃນພື້ນທີ່ 5 ເຮັກຕາ ແລະ ໄມ້ທີ່ນຳມາປູກມີຈຳນວນ 5 ພັນເບ້ຍ. ເຂົ້າຮ່ວມໃນພິທີມີ ທ່ານ ວິລະສັກ ນາມມົນຕີ, ເຈົ້າເມືອງນາຊາຍທອງ, ນະຄອນຫລວງວຽງຈັນ, ທ່ານພົນຈັດຕະວາ ວັນທອງ ກອງມະນີ, ຮອງຫົວຫນ້າກົມໃຫຍ່ການເມືອງກອງທັບ ພ້ອມນັ້ນຍັງມີ ຫົວຫນ້າກອງບັນຊາການ, ຮອງກົມ, ຕ່າງຫນ້າອົງການທີ່ກ່ຽວຂ້ອງເຂົ້າຮ່ວມພິທີຢ່າງພ້ອມພຽງ.ສຳລັບ, ໄມ້ທີ່ນຳມາປູກໃນຄັ້ງນີ້ມີທັງຫມົດ 5 ພັນເບ້ຍ ຊຶ່ງເປັນໄມ້ພື້ນເມືອງ ແລະ ປູກໃນພື້ນທີ່ 5 ເຮັກຕ່າ ຊຶ່ງທີ່ຜ່ານມາ ເມືອງນາຊາຍທອງ ແມ່ນໄດ້ເອົາໃຈໃສ່ຊຸກຍູ້, ສົ່ງເສີມ ການປູກໄມ້ມາຕະຫລອດ ໃນນັ້ນ ນັບແຕ່ປີ 1987-2016 ທົ່ວເມືອງມີເນື້ອທີ່ ໃນການປູກໄມ້ປະມານ 4 ແສນກວ່າເຮັກຕ່າ ໃນນັ້ນ ມີປ່າປູກເພື່ອຟື້ນຟູ ໃນເຂດປ່າສະຫງວນແຫ່ງຊາດພູພະນັ່ງ 310 ເຮັກຕ່າ, ປ່າປູກໃນເນື້ອທີ່ປະຊາຊົນຄຸ້ມຄອງ 3 ແສນກວ່າເຮັກຕ່າ ແລະໃນປີ 2017 ເມືອງນາຊາຍທອງ ແມ່ນມີແຜນປູກໄມ້ໃຫ້ໄດ້ 8 ແສນເບ້ຍ ປະເພດໄມ້ອຸດສາຫະກຳ, ໄມ້ປະດັບ ແລະ ໄມ້ໃຫ້ຫມາກ ແລະ ປູກໄມ້ໃຫ້ໄດ້ 45 ເຮັກຕ່າໃນທົ່ວເມືອງ.
Editor: ຕະວັນ ແສງສະຫວັນ
