ຖືວ່າເປັນການຮ່ວມມືທີ່ດີ ສຳລັບງານວາງສະແດງສິນຄ້າ ທ໊ອບໄທແບຣນ ປະຈຳປີ 2017 ຊຶ່ງເປັນການຮ່ວມມືກັນ ລະຫວ່າງ ສຳນັກງານສົ່ງເສີມການຄ້າລະຫວ່າງປະເທດ, ກະຊວງພານິດແຫ່ງປະເທດໄທ ແລະ ກົມສົ່ງເສີມການສິນຄ້າ, ກະຊວງອຸດສາຫະກຳ ແລະ ການຄ້າແຫ່ງ ສປປ ລາວ ໄດ້ເຮັດໃຫ້ງານວາງສະແດງສິນຄ້າ ທ໊ອບໄທແບຣນ 2017 (Top thai Brands)ເກີດຂື້ນມາ ຊຶ່ງງານຈະຈັດໃນລະຫວ່າງ ວັນທີ 7 ຫາ 11 ມິຖຸນາ ນີ້ ຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ,ທາງດ້ານທ່ານ ນາງ ຢານີ ສີມີໄຊ ອັກຄະລາຊະທູດ ທີ່ປຶກສາຝ່າຍການຄ້າ ແຫ່ງຣາຊະອານາຈັກໄທ ປະຈຳ ສປປ ລາວ ເປີດເຜີຍເຖິງຈຸດປະສົງຂອງການຈັດງານວ່າ: ການຈັດງານໃນຄັ້ງນີ້, ແນໃສ່ສົ່ງເສີມດ້ານການຄ້າ-ການລົງທຶນ ແລະ ເພີ່ມມູນຄ່າການຄ້າ ລະຫວ່າງ ສອງປະເທດ ໄທ-ລາວ, ເສີມສ້າງພາບພົດຂອງສິນຄ້າ ທີ່ມີຄຸນນະພາບ, ມີມາດຕະຖານ ແລະ ມີເຄື່ອງ ໝາຍການຄ້າຂອງທັງສອງປະເທດ ໃຫ້ເປັນທີ່ນິຍົມ ແລະ ຍອມຮັບຂອງຜູ້ບໍລິໂພກ ແລະ ກະຕຸ້ນໃຫ້ນັກທຸລະກິດ ທັງສອງປະເທດຮ່ວມມືເຊິ່ງກັນ ແລະ ກັນ ເພື່ອກ້າວໄປສູ່ຄວາມສຳເລັດ ໃນຕະຫລາດສາກົນ. ງານວາງສະແດງສິນຄ້າໃນຄັ້ງນີ້, ໄດ້ຈັດຂຶ້ນເປັນເວລາ 5 ວັນ ຊຶ່ງບັນດານັກທຸລະກິດ ແລະ ຜູ້ປະກອບການ ໄດ້ນຳເອົາສິນຄ້າເຄື່ອງອຸປະໂພກບໍລິໂພກ, ເຄື່ອງໃຊ້ໄຟຟ້າ, ເຄື່ອງໃຊ້ອີເລັກໂຕຣນິກ, ເຄື່ອງໃຊ້ສອຍຕ່າງໆ ທີ່ມີຄຸນນະພາບ, ມີມາດຕະຖານ ມາວາງຈຳໜ່າຍ, ເຊິ່ງມີທັງໝົດຫລາຍກວ່າ 190 ຮ້ານ.ພ້ອມດຽວກັນ,ໃນງານຍັງຈັດມີກິດຈະກໍາພິເສດ ເຊັ່ນ: ວາງສະແດງຜົນງານໂຄງການສູນພັດທະນາ ແລະ ບໍລິການ ດ້ານການກະເສດຫ້ວຍຊອນ-ຫ້ອຍຊົ້ວ, ຊຶ່ງເປັນໂຄງການພະຣາສະດຳຣິ ໃນ ສປປ ລາວ, ວາງສະແດງ Thailand Trust Mask, ວາງສະແດງ Top Thai Brands, ການສຳມະນາຈາກວິທະຍາກອນ ຜູ້ຊົງຄຸນນະວຸດຈາກປະເທດໄທ ແລະ ຍັງຈະໄດ້ມີການຮ່ວມສົນທະນາ ກັບບັນດາຜູ້ປະກອບການ, ນັກທຸລະກິດ ລາວ-ໄທ ແລະ ອື່ນໆ.
Editor: ຕະວັນ ແສງສະຫວັນ
