ກອງປະຊຸມສະຫຼຸບຕີລາຄາຄືນ ການສ້າງຄວາມເຂັ້ມແຂງ ໃນການຄູ້ມຄອງຊັບ ພະຍາກອນປ່າໄມ້ ທົ່ວແຂວງບໍລິຄຳໄຊ ປະຈຳປີ 2017 ໄດ້ຈັດຂື້ນໃນວັນທີ 02 ມິຖຸນາ 2017 ຢູ່ທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ. ໂດຍການເປັນປະທານຂອງທ່ານ ບຸນເສັງ  ປະທຳມະວົງ  ຮອງເຈົ້າແຂວງ ແຂວງບໍລິຄຳໄຊ, ເຂົ້າຮ່ວມມີ ທ່ານ ຄຳຜິວ ພິມມະທັດ  ຫົວໜ້າພະແນກກະສິກຳ ແລະ ປ່າໄມ້ແຂວງບໍລິຄຳໄຊ, ທ່ານ ບຸນໄອ ໜູນອນນະວີ ຮອງຫົວໜ້າຫ້ອງການ ກະຊວງກະສິກຳ ແລະ ປ່າໄມ້, ສະພາປະຊາຊົນແຂວງ, ຫົວໜ້າຫ້ອງການກະສິກຳ ແລະ ປ່າໄມ້ 7 ເມືອງ, ພ້ອມດ້ວຍພາກສ່ວນທີ່ກຽ່ວຂ້ອງເຂົ້າຮ່ວມຢ່າງພ້ອມພຽງ. ທ່ານ ພັນລອນ ແກ້ວວິເສດ ຫົວໜ້າຂະແໜງປ່າໄມ້,  ພະແນກກະສິກຳ ແລະ ປ່າໄມ້ແຂວງບໍລິຄຳໄຊ  ຜ່ານບົດສະຫຼຸບໃນການຈັດຕັ້ງປະຕິບັດວຽກງານໃນໄລຍະ 6 ເດືອນ  ທ້າຍປີ 2016 ເຊີ່ງມີຜົນສຳເລັດຫຼາຍດ້ານ ເປັນຕົ້ນແມ່ນວຽກງານ ສະກັດກັ້ນໄຟໄໝ້ລາມປ່າ,ການຄູ້ມຄອງຖາງປ່າເຮັດໄຮ່, ການຂື້ນບັນຊີລົດຊີ້ງ, ອາວຸດລ່າເນື້ອ ແລະ ເຄື່ງມືຫາປາແບບດັບສູນ,ໄດ້ເອົາພະນັກງານວິຊາການ ໄປປະຈຳຢູ່ແຕ່ລະກູ່ມບ້ານ ໂດຍສະເພາະເຂດທີ່ມີໂຄງການຄູ້ມຄອງປ່າໄມ້, ສົມທົບກັບອຳນາດການປົກຄອງບ້ານ ປກຊ, ປກສ ເຂດເຜີຍແຜ່ລະບຽບ-ກົດໝາຍ ການຄູ້ມຄອງປ່າໄມ້,ປຸກລະດົມໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ     ມີສ່ວນຮ່ວມໃນການຄູ້ມຄອງຊັບພະຍາກອນປ່າໄມ້ ໄດ້ຫັນເຂົ້າສູ່ລະບຽບການ ແລະ ກົດໝາຍຢ່າງເຂັ້ມງວດ. ສຳລັບການຈັດຕັ້ງປະຕິບັດກົດໝາຍ ວ່າດ້ວຍປ່າໄມ້ ສະບັບເລກທີ 06/ສພຊ ກໍ່ຄືຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ວ່າດ້ວຍ ການຈັດຕັ້ງປະຕິບັດວຽກງານປິດປ່າ ທົ່ວປະເທດ,ແຂວງບໍລິຄໍາໄຊ ໄດ້ກຳນົດ 6 ມາດຕະຖານປິ່ນອ້ອມ ເປັນເຄື່ອງມືໃນການຈັດຕັ້ງປະຕິບັດວຽກງານຄູ້ມຄອງຊັບພະຍາກອນປ່າໄມ້ໃນທົ່ວແຂວງ ເຊີ່ງມາຮອດປະຈຸບັນທຸກໆພາກສ່ວນ ແລະ ປະຊາຊົນບັນດາເຜົ່າພາຍໃນແຂວງ ກໍ່ໄດ້ເຂົ້າໃຈ ເຖິງຈຸດປະສົງ ເປົ້າໝາຍດັ່ງກ່າວ, ການປົກປັກຮັກສາຊັບພະຍາກອນປ່າໄມ້ຈະຕອບສະໜອງ   ຕໍ່ການພັດທະນາປະເທດຊາດໂດຍກົງ, ເປັນການປົກປັກຮັກສາສິ່ງແວດລ້ອມ ທີ່ຈຳເປັນ, ຮັກສາໄດ້ຄວາມສົມສ່ວນ ແລະ ຍັງໄປຕາມທິດຍືນຍົງ, ຟື້ນຟູສິ່ງແວດລ້ອມ ແລະ ຊີວະນາໆພັນ, ບັນລຸຍຸດທະສາດຄວາມປົກຫູ້ມຂອງປ່າໄມ້ໃຫ້ໄດ້ 70% ໃນປີ 2020. ເພື່ອບັນລຸຄາດໝາຍຕ່າງໆ ໃນການຈັດຕັ້ງປະຕິບັດວຽກງານແຕ່ລະດ້ານ ໃນສະເພາະໜ້າ ກອງປະຊຸມຍັງໄດ້ຮັບຟັງການປະກອບຄຳຄິດ, ຄຳເຫັນ ໃສ່ບົດລາຍງານຢ່າງກົງໄປກົງມາ ທັ້ງນີ້ກໍ່ເພື່ອເປັນບ່ອນອິງ ຈະໄດ້ນຳໄປຈັດຕັ້ງປະຕິບັດ ບັນດາໜ້າວຽກດັ່ງກ່າວໃຫ້ມີປະສິດທິພາບ, ປະສິດທິຜົນດີຂື້ນກວ່າເກົ່າ.

Editor: ກຳປານາດ ລັດຖະເຮົ້າ

{gallery}News/sbd/2017/06/17/sbd-2{/gallery}