ປະທານສະມາຄົມເຟີນີເຈີລາວ ພ້ອມຄະນະ ເປີດເຜີຍ 3 ປີຂ້າງໜ້າຈະປັບປຸງຖານະທາງດ້ານການເງິນໃຫ້ເຂັ້ມແຂງ ໝັ້ນຄົງ ເພື່ອຄວາມອາດສາມາດໃນການເຂົ້າເຖິງແຫຼ່ງວັດຖຸດິບ ພ້ອມດຽວກັນກໍ່ຍົກລະດັບສີມືແຮງງານຂອງໂຮງງານສະມາຊິກ, ປັບປຸງເຄື່ອງຈັກ ເພື່ອສ້າງຜະລິດຕະພັນ ທີ່ນຳໃຊ້ໄມ້ໄດ້ໜ້ອຍ ແລະ ເພີ່ມມູ່ນຄ່າຜະລິດຕະພັນຂຶ້ນເທົ່າໂຕ. ທ່ານ ຄຳໄພ ສົມຊະນະ, ປະທານສະມາຄົມເຟີນີເຈີລາວ ໄດ້ກ່າວວ່າ: ກອງປະຊຸມຫຼວງຄັ້ງທີ 3 ຂອງສະມາຄົມເຟີນີເຈີລາວ ທີ່ຈັດຂຶ້ນໃນຄັ້ງວັນທີ 31 ພຶດສະພາຜ່ານມາ ສຸດທີ່ມີຄວາມໝາຍ ເຊິ່ງທີ່ປະຊຸມໄດ້ເຫັນດີ ເລືອກເອົາທ່ານ ຮັບໜ້າທີ່ເປັນປະທານສະມາຄົມເຟີນີເຈີລາວອີກສະໄໝ ເຊິ່ງນັ້ນກໍ່ສະແດງໃຫ້ເຫັນຜົນງານ ຍັງເປັນທີ່ເພີ່ງພໍໃຈຕໍ່ໝູ່ຄະນະ, ຕໍ່ສັງຄົມ ແລະ ຕໍ່ປະເທດຊາດບ້ານ ເພື່ອຈະຜັນຂະຫຍາຍວຽກງານ ຂອງສະມາຄົມເຟີນີເຈີລາວ ຕະຫຼອດ 6 ປີທີ່ຜ່ານມາ ຂ້າພະເຈົ້າຈະນຳພາ ສະມາຄົມເຟີນີເຈີລາວ ໄດ້ມີອັນສະດວກສະບາຍຫຼາຍຢ່າງ ຈາກ ພັກ-ລັດຖະບານ ຈາກສັງຄົມ. ຂ້າພະເຈົ້າພ້ອມຮອງປະທານ ແລະ ຄະນະບໍລິຫານງານ ສະມາຄົມເຟີນີເຈີລາວ ແມ່ນມີຄວາມສາມັກຄີພ້ອມພຽງກັນ ເຖິງແມ່ນສະມາຄົມ ຍັງບໍ່ທັນເຂັ້ມແຂງຫຼາຍດ້ານ ເປັນຕົ້ນ: ແມ່ນວຽກງານການເງິນ ແຕ່ຄະນະສະມາຄົມເຟີນີເຈີລາວ ມີຄວາມເສຍສະຫຼະທີສຸດຕະຫຼອດ 6 ປີ ບໍ່ວ່າຈະເປັນວຽກງານການວາງສະແດງ, ການໄປເຄື່ອນໄຫວ ກັບສະມາຄົມເຟີນີເຈີອາຊຽນຢູ່ຕ່າງປະເທດ ແລະ ການຕ້ອນຮັບ ຄະນະສະມາຄົມເຟີນີເຈີບັນດາປະເທດອາຊຽນ ທີ່ໄດ້ມາຢຽມພວກເຮົາຢ່າງສົມກຽດໃນປີຜ່ານມາ. ສ່ວນທິດທາງວຽກງານສະມາຄົມເຟີນີເຈີໃນຕໍ່ໜ້າ ໄດ້ວາງຄາດໝາຍ ຂະຫຍາຍສະມາຊິກ ສະມາຄົມເຟີນີເຈີລາວ ຢູ່ບັນດາແຂວງໃຫ້ເພີ່ມຂຶ້ນ, ປັບປຸງສີມືແຮງງານ, ນຳໃຊ້ເຄື່ອງມືທີ່ທັນສະໄໝ, ເພື່ອເຮັດການຜະລິດທີ່ໃຊ້ວັດຖຸດິບໃຫ້ໜ້ອຍທີ່ສຸດ ແລະ ສ້າງມູນຄ່າເພີ່ມສູງຂຶ້ນໄດ້. ສ່ວນໄມ້ທີ່ຕົກຄ້າງທີ່ລັດຖະບານ ຢຶດໄດ້ເປົ້າໝາຍກໍ່ເພື່ອປະມູນໃຫ້ ຜູ້ປະກອບການພາຍໃນ ເວົ້າລວມ. ເວົ້າສະເພາະ ສະມາຄົມເຟີນີເຈີລາວ ພວກເຮົານີ້ ກໍ່ໄດ້ມີໂອກາດ ເຂົ້າຮ່ວມປະມູນ. ຜ່ານມາລັດຖະບານ ໄດ້ຊອກທຸກວິທີທາງຊ່ວຍພວກເຮົາ ແຕ່ພວກເຮົາເດ ເຈົ້າຂອງໂຮງງານຈະປັບປຸງຕົນເອງຄືແນວໃດ ເອົາມາດຕະຖານຄືແນວໃດ ໃຫ້ຖືກກັບຈິດໃຈຜູ້ຊື້ ບໍ່ແມ່ນອອກແບບ ເຮັດຕາມໃຈຜູ້ຂາຍ. ສຳລັບ ຄະນະບໍລິຫານງານສະມາຄົມເຟີນີເຈີລາວ ຊຸດໃໝ່ນີ້ ລ້ວນແລ້ວແຕ່ແມ່ນຜູ້ທີ່ມີຄວາມຮູ້ ຄວາມສາມາດ ແລະ ມີປະສົບການມາກ່ອນແລ້ວທັງນັ້ນ.. ສະນັ້ນ, ສປປ ລາວ ຈະໄດ້ເປັນເຈົ້າພາບຈັດກອງປະຊຸມສະມາຄົມເຟີນີເຈີອາຊຽນໃນທ້າຍປີນີ້. ທ່ານໄດ້ຮຽກຮ້ອງ ທຸກພາກສ່ວນຕ້ອງເປັນເຈົ້າການ ໂດຍສະເພາະ ລັດຖະບານຕ້ອງໄດ້ຊ່ວຍສະມາຄົມເຟີນີເຈີລາວ ເພື່ອຈັດຕັ້ງວຽກງານການເປັນເຈົ້າພາບໃຫ້ມີປະສິດທິຜົນ. ເຊິ່ງຜົນປະໂຫຍດທາງກົງ ຫຼື ທາງອ້ອມ ບໍ່ວ່າຈະເປັນ ການປັບປຸງວຽກງານເຟີນີເຈີລາວ, ການເຂົ້າເຖິງຕະຫຼາດ, ການພັດທະນາສີມືແຮງງານ ແລະ ວຽກງານການທ່ອງທ່ຽວ ກໍ່ຈະໄປພ້ອມໆກັນ.
Editor: ຕະວັນ ແສງສະຫວັນ
