ໃນວັນທີ 1 ມິຖຸນາ 2017 ທີ່ສຳນັກງານນາຍົກລັດຖະມົນຕີ ໄດ້ຈັດງານປູກຕົ້ນໄມ້ ແລະ ສະເຫລີມສະຫລອງວັນເດັກນ້ອຍສາກົນ, ໃຫ້ກຽດເຂົ້າຮ່ວມໂດຍທ່ານ ທອງລຸນ ສີສຸລິດ, ນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີລັດຖະມົນຕີ, ຮອງລັດຖະມົນຕີ, ພ້ອມດ້ວຍພະນັກງານລັດຖະກອນ ແລະ ຫລານນ້ອຍເຍົາວະຊົນ ເຂົ້າຮ່ວມຢ່າງຟົດຟື້ນ.ໃນໂອກາດດັ່ງກ່າວ ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກ ລັດຖະມົນຕີ ກ່າວວ່າ: ການປູກຕົ້ນໄມ້ໃນຄັ້ງນີ້, ເປັນການສ້າງຂະບວນການ ແລະ ບັນຍາກາດ ໃຫ້ແກ່ວັນເດັກນ້ອຍສາກົນ, ທັງເປັນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2017 ໃຫ້ມີຄວາມໝາຍ ແລະ ມີບັນຍາກາດມ່ວນຊື່ນ. ສິ່ງສຳຄັນເພື່ອຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ ຄັ້ງທີ X ຂອງພັກ ທີ່ວ່າ ສ້າງປະເທດລາວ ໃຫ້ເປັນພື້ນທີ່ສີຂຽວ, ໂດຍຕັ້ງເປົ້າໝາຍປູກຕົ້ນໄມ້ໃຫ້ໄດ້ 37 ພັນເຮັກຕາ ໃນປີ 2020, ທັງເປັນການສ້າງສຳນັກງານນາຍົກລັດຖະມົນຕີ ໃຫ້ກາຍເປັນສີຂຽວ, ມີສະເໜ່ ແລະ ສີວິໄລ. ໃນຂະນະດຽວກັນ ກໍເພື່ອເປັນການຮັກສາ ແລະ ອະນຸລັກ ພັນໄມ້ພື້ນບ້ານທີ່ມີຄຸນຄ່າ ໄວ້ໃຫ້ຄົນລຸ້ນຫລັງ, ແຂກພາຍໃນ ແລະ ຕ່າງປະເທດ ທີ່ມາຢ້ຽມຢາມສຳນັກງານນາຍົກລັດຖະມົນຕີ ໄດ້ທ່ຽວຊົມ ແລະ ສຶກສາ, ທັງເປັນການປັບປຸງທັດສະນີຍະພາບ, ສ້າງສະພາບແວດລ້ອມໃຫ້ມີຄວາມສວຍງາມ, ຮົ່ມເຢັນ, ສະຫງ່າຜ່າເຜີຍ ແລະ ມີສະເໜ່ ສົມກັບເປັນສະຖານທີ່ເຮັດວຽກ ຂອງການນຳຂັ້ນສູງ ຂອງປະເທດ.ພ້ອມນີ້, ບັນດາຫລານນ້ອຍເຍົາວະຊົນ ຍັງໄດ້ທ່ຽວຊົມ ສຳນັກງານນາຍົກລັດຖະມົນຕີ, ສ້າງໂອກາດໃຫ້ຫລານນ້ອຍເຍົາວະຊົນ, ລູກຫລານ ຜູ້ທີ່ຈະເປັນອະນາຄົດຂອງຊາດ ໄດ້ມີໂອກາດຮູ້ຈັກ, ຄຸ້ນເຄີຍ ແລະ ໃກ້ຊິດດັບ ທ່ານ ນາຍົກລັດຖະມົນຕີ, ຮອງນາຍົກລັດຖະມົນຕີ, ບັນດາລັດຖະມົນຕີ ແລະ ການນຳຄົນອື່ນໆ ແລະ ເຮັດໃຫ້ງານດັ່ງກ່າວເຕັມໄປດ້ວຍບັນຍາກາດຟົດຟື້ນມ່ວນຊື່ນ.
Editor: ຕະວັນ ແສງສະຫວັນ
