ກອງປະຊຸມຫຼວງ ສະມາຄົມເຟີນິເຈີລາວ ສຟລ ຄັ້ງທີ 3 ຈັດຂຶ້ນ ວັນທີ 31 ພຶດສະພາ 2017 ທີ່ ສະພາຫານຄ້າ ແລະ ອຸດສາຫະກຳ ແຫ່ງຊາດ (ສຄອ) ໂດຍການເປັນປະທານຂອງທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳ ສຄອ, ທ່ານ ຄຳໄພ ສົມຊະນະ ປະທານ ສະມາຄົມເຟີນິເຈີລາວ ສຟລ, ມີຮອງປະທານ ສຟລ, ຄະນະບໍລິການງານ ແລະ ສະມາຊິກ ສຟລ ພ້ອມດ້ວຍແຂກຈາກພາກລັດ - ທຸລະກິດເຂົ້າຮ່ວມ. ກອງປະຊຸມເລີ່ມຕົ້ນດ້ວຍ ການລາຍງານສະພາບຂອງການບໍລິຫານງານຂອງ ສະມາຄົມເຟີນິເຈີລາວ ສຟລ ໃນໄລຍະ 6 ປີຜ່ານມາ ຄືນັບແຕ່ປີ 2011–2017 ເຊິ່ງໃນນັ້ນມີທັງຜົນງານທີ່ຕັ້ງນ້າ, ຂໍ້ຄົງຄ້າງ ແລະ ສິງທ້າທາຍທີ່ຈະຕ້ອງພັດທະນາຮ່ວມກັນໃນໄລຍະແຕ່ປີ 2017–2020. ກອງປະຊຸມໄດ້ມີການປ່ອນບັດຄັດເລືອກປະທານສະມາຄົມເຟີນິເຈີລາວ ສຟລ, ຮອງປະທານ ສຟລ ເຊິ່ງທ່ານ ຄຳໄພ ສົມຊະນະ ຍັງໄດ້ຮັບຄະແນນສຽງສ່ວນຫຼາຍ ແລະ ຜ່ານກອງປະຊຸມຄົບຄະນະບລິຫານງານເອກະພາບ ເລືອກເອົາ ທ່ານຄຳໄພ ສົມຊະນະ ເປັນປະທານ ສະມາຄົມເຟີນິເຈີລາວ ສຟລ ອີກຄັ້ງ, ທ່ານ ກອງມາລາ ພົມມາໄລ, ທ່ານ ຄຳປຸ່ນ ເຈົ້າພຣະສີຮົມຂາວ, ທ່ານ ພຸ່ງພະຈັນ ແສງມີໄຊ, ທ່ານ ນາງ ສຸໄພວັນ ທ່ຽງຈັນໄຊ, ທ່ານ ທອງດຳ ສີຫາມາຍາ ແລະ ທ່ານ ນາງ ຈັນໄຕ ທຳມະວົງສາ ເປັນຮອງປະທານ ສະມາຄົມເຟີນິເຈີລາວ ສຟລ. ທ່ານ ຄຳໄພ ສົມຊະນະ ໄດ້ກ່າວວ່າ: ໂອກາດທີ່ໄດ້ຮັບເລືອກເປັນປະທານ ສະມາຄົມເຟີນິເຈີລາວ ອີກຄັ້ງ ຕົນເອງກໍ່ຈະພະຍາຍາມສຸດຄວາມສາມາດ ໃນການນຳເອົາບົດຮຽນ ແລະ ປະສົບການທີ່ຊີ້ນຳໆພາ ໄລຍະ 6 ປີຜ່ານມາ ເພື່ອມານຳພາ ສຟລ ໃຫ້ມີຄວາມເຂັ້ມແຂງຍິ່ງຂຶ້ນ, ລວມທັງການຮ່ວມມືກັບບັນດາສະມາຊິກສະມາຄົມເຟີນີເຈີ ອາຊຽນ. ພ້ອມດຽວກັນນັ້ນ ທ່ານ ຍັງຮຽກຮ້ອງໃຫ້ສະມາຊິກຕ້ອງໄດ້ມີການປັບປຸງຕົນເອງ ເພື່ອຮອງຮັບໂອກາດ ເຊິ່ງຜ່ານມາລັດຖະບານປະກາດປິດປ່າ ພ້ອມທັງດັດສົມໂຮງງານປຸງແຕ່ງໄມ້ໃນປະເທດ ເຊິ່ງໜຶ່ງໃນນັ້ນ ສຟລ ເຮົາເອງກໍ່ໄດ້ມີການຍົກລະດັບຕົນເອງ ໂດຍສະເພາະ ຂອດການປຸງແຕ່ງ, ການຍົກລະດັບສີມືແຮງງານ, ຄຸນນະພາບຜະລິດຕະພັນ ເພື່ອໃຫ້ຖືກກັບຄວາມຕ້ອງການຂອງຕະຫຼາດ. ໃນກາງເດືອນ ພະຈີກທີ່ ຈະມາເຖິງນີ້ ສະມາຄົມເຟີນິເຈີລາວ ສຟລ ຈະໄດ້ເປັນເຈົ້າພາບຈັດກອງປະຊຸມ ສະມາຄົມເຟີນີເຈີອາຊຽນ ຄັ້ງທີ 35 ທີ່ນະຄອນຫຼວງວຽງຈັນ ເຊິ່ງນັ້ນ ຈະນຳມາເຊິ່ງກາລະໂອກາດໃນການພັດທະນາຂະແນງເຟີນີເຈີ ແລະ ຂະແນງກການທ່ອງທ່ຽວຂອງລາວເຮົາ. ທ່ານ ອຸເດດ ສຸວັນນະວົງ ໄດ້ກ່າວວ່າ: ຜ່ານການຮັບຟັງ ບົດລາຍງານຈາກຄະນະບໍລິຫານງານ ສະມາຄົມເຟີນິເຈີລາວ ສຟລ ເຫັນວ່າມີຫຼາຍຢ່າງທີ່ພົ້ນເດັ່ນ ແລະ ປະສົບຜົນສຳເລັດຫຼາຍດ້ານ. ຄຽງຄູ່ກັບຜົນງານທີ່ຈັດຕັ້ງປະຕິບັດໄດ້ ຍັງມີສິ່ງທ້າທາຍຈຳນວນໜຶ່ງທີ່ ສຟລ ຕ້ອງໄດ້ປັບປຸງ ເປັນຕົ້ນແມ່ນ ຂອດການຜະລິດ, ການນຳໃຊ້ເຄື່ອງຈັກທີ່ທັນສະໄໝ, ການນຳໃຊ້ວັດຖຸດິບໃຫ້ຄຸ້ມຄ່າ, ເຊິ່ງສະມາຊິກສະມາຄົມເຟີນີເຈີຕ້ອງໄດ້ມີການຮ່ວມມືກັນຢ່າງແຂງແຮງ ເພື່ອຊອກແຫຼ່ງທຶນມາພັດທະນາຜະລິດຕະພັນທີ່ຕະຫຼາດສາກົນຍອມຮັບ ເຊິ່ງນັ້ນກໍ່ໝາຍວ່າ ສິນຄ້າກໍ່ຕ້ອງໄດ້ມາດຖານ ຖືກຕາມລາຍການບັນຊີທີ່ລັດອະນຸຍາດ. ພ້ອມດຽວກັນນັ້ນ ຕ້ອງໄດ້ມີການຂຶ້ນບັນຊີຜະລິດຕະພັນເຟີນີເຈີ (ຂໍ້ມູນສິນຄ້າ) ເພື່ອສ້າງທ່າແຮງໃນການຄ້າຢູ່ຕ່າງປະເທດ. ສຳລັບ ສະພາການຄ້າ ແລະ ອຸດສາຫະກຳ ແຫ່ງຊາດ ກໍ່ຈະມີການຊ່ວຍເຫຼືອ ສະມາຄົມທີ່ເປັນສະມາຊິກ ແລະ ປັບປຸງ ຂອດບໍລິຫານງານ ຂອງສະພາການຄ້າ ແລະ ອຸດສາຫະກຳ ຢູ່ບັນດາແຂວງ ທັງນີ້ ເພື່ອສ້າງກົນໄກ ແລະ ອຳນວຍຄວາມສະດວກໃຫ້ບັນດາສະມາຄົມຕ່າງໆ ເວົ້າລວມ ເວົ້າສະເພາະກໍ່ແມ່ນສະມາຄົມເຟີນີເຈີລາວໃຫ້ສາມາດຂັບເຄື່ອນ ແລະ ນຳໃຊ້ໄມ້ ຍຶດທີ່ລັດຖະບານ ປະມູນໃຫ້ໄດ້ນຳໃຊ້ໃຫ້ເປັນຜະລິດຕະພັນ ຍົກມູນຄ່າສິນຄ້າໃຫ້ສູງຂຶ້ນ. ສຳລັບ ການສົ່ງເສີມການຄ້າກັບຕ່າງປະເທດ ເຊິ່ງກໍ່ມີແຜນການ ພາຍຫຼັງ ສ້າງບັນຊີສິນຄ້າເຟີນີເຈີແລ້ວ ກໍ່ຈະສະເຫນີໃຫ້ໄປວາງຢູ່ບັນດາສະຖານທູດຕ່າງໆ ທັງນີ້ ເພື່ອເປັນການສົ່ງເສີມ ແລະ ໂຄສະນາສິນຄ້າລາວໄປໃນຕົວ.

Editor: ດາວໄຊ ສີວິໄລ