ຫລ້າສຸດ, ເມື່ອບໍ່ດົນມານີ້ທ່ານ ແສງອາລຸນ ແສງອາພອນ, ຫົວໜ້າພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ ບອກວ່າ: ເພື່ອເປັນການຜັນຂະຫຍາຍມະຕິຂອງລັດຖະບານກໍຄືຄຳສັ່ງເລກທີ 15/ນຍ ໂດຍແນ່ໃສ່ສ້າງມູນຄ່າເພີ່ມເປັນສິນຄ້າຈຳໜ່າຍພາຍໃນ ແລະ ສົ່ງອອກຕ່າງປະເທດ ໃຫ້ໄດ້ທາງດ້ານປະລິມານ ແລະ ຄຸນນະພາບ ໃນຜ່ານມາອຳນາດການປົກຄອງແຂວງບໍລິຄຳໄຊ ໂດຍສະເພາະແມ່ນພະແນກອຸດສາຫະກຳ ແລະ ການຄ້າແຂວງ ກໍຄືຄະນະກຳມະການດັດສົມໂຮງງານປຸງແຕ່ງໄມ້ແຂວງ ໄດ້ມີຄວາມເອົາໃຈໃສ່ຢ່າງຈິງຈັງລົງຕິດຕາມກວດກາບັນດາໂຮງງານປຸງໄມ້ ທີ່ໄດ້ຮັບອະນຸຍາດຢູ່ໃນແຂວງຈຳນວນ 84 ໂຮງງານ ເພື່ອໃຫ້ແທດເໝາະກັບສະພາບຄວາມເປັນຈິງໃນປະຈຸບັນ. ຜ່ານການລົງເຮັດວຽກ ທາງແຂວງ ໄດ້ເຫັນດີໃຫ້ 35 ໂຮງງານສືບຕໍ່ປັບປຸງມາດຕະຖານຂອງໂຮງງານການປຸງແຕ່ງໄມ້ໃຫ້ໄດ້ຕາມຂໍ້ຕົກລົງເລກທີ 0719/ອຄລົງວັນທີ 3 ເມສາ 2019 ພ້ອມທັງສືບຕໍ່ທຳການຜະລິດໄປພ້ອມໃນກຳນົດເວລາ 6 ເດືອນ ຂະນະດຽວກັນນັ້ນທາງແຂວງຍັງໄດ້ອອກຂໍ້ຕົກລົງຍຸບເລີກການດຳເນີນກິດຈະການ ແລະ ລຶບຊື່ອອກຈາກບັນຊີໂຮງງານອຸດສະຫະກຳປຸງແຕ່ງໄມ້ພາຍໃນແຂວງອີກຈຳນວນ 17 ໂຮງງານ. ໃນນັ້ນ ທຳອິດແມ່ນໂຮງງານ ອາສາ ອຸດສາຫະກຳໄມ້, ປຸງແຕ່ງໄມ້ພູດອຍ-ເລືອງຟັດຮົງ, ເຟີນິເຈີ້ບຸນຍູ້, ປຸງແຕ່ງໄມ້ KL, ປຸງແຕ່ງໄມ້ແສງດາວກຣຸບ, ປຸງແຕ່ງໄມ້ດວງຈະເລີນ2, ປຸງແຕ່ງໄມ້ບົວລີ, ປຸງງແຕ່ງໄມ້ດວງຈະເລີນ3, ປຸງແຕ່ງໄມ້ມິ່ງຂວັນ, ປຸງແຕ່ງໄມ້ດວງລາສີ, ປຸງແຕ່ງໄມ້ສຳເລັດຮູບຜາວຽງທອງ, ປຸງແຕ່ງໄມ້ ແລະ ເຟີນິເຈີພູດອຍ, ປຸງແຕ່ງທວາຍ-ທູນ ແລະ ເຟີນິເຈີ, ປຸງແຕ່ງໄມ້ສຳເລັດຮູບມະນິດາ, ປຸງແຕ່ງໄມ້ອິນທະລັງສີ, ປຸງແຕ່ງໄມ້ມະນີວົງ ແລະໂຮງງານປຸງແຕ່ງໄມ້ສຳເລັດຮູບ SLP. ສາເຫດຂອງການຍຸບ ແລະ ລຶບຊື່ບັນດາໂຮງງານນັ້ນ ແມ່ນຍ້ອນມາຈາກບາງໂຮງງານໄດ້ຮັບອະນຸຍາດຈາກຂັ້ນເທິງໃຫ້ສ້າງຕັ້ງແຕ່ດົນ ແຕ່ບໍ່ມີການເລີ່ມລົງມືສ້າງຕັ້ງ, ໂຮງງານບໍ່ທຳການຜະລິດໄດ້ຫຼາຍປີ, ອາຄານ ເຄື່ອງຈັກເປ່ເພ, ເປັນໂຮງງານຮ້າງ, ປະສານຫາຜູ້ອຳນວຍການໂຮງງານກໍບໍ່ເຂົ້າພົບ, ຜິດລະບຽບໃນການນຳວັດຖຸດິບເຂົ້າໂຮງງານ, ເປັນໂຮງງານທີ່ນອນໃນ 3 ປະເພດ ປ່າ ແລະ ບໍ່ປະຕິບັດຕາມການແນະນຳຂອງຄະນະກຳມະການ.ປະຈຸບັນໂຮງງານອຸດສາຫະກຳປຸງແຕ່ງໄມ້ທີ່ໄດ້ຮັບອະນຸຍາດຖືກຕ້ອງຢູ່ແຂວງບໍລິຄຳໄຊ ແມ່ນມີຈຳນວນທັງໝົດ 67 ໂຮງງານ ຂະນະທີ່ທາງພະແນກສືບຕໍ່ສະເໜີແຂວງອອກຂໍ້ຕົກລົງຍຸບເລີກອີກ 3 ໂຮງງານ ແລະ ຍົກຍ້າຍ 7 ໂຮງງານທີ່ນອນໃນ 3 ປະເພດປ່າຫວງຫ້າມ ຕາມທີ່ລັດຖະບານກຳນົດ. ຂອບໃຈຂໍ້ມູນຈາກ: ຫນັງສືພິມເສດຖະກິດ-ສັງຄົມ
Editor: ຕະວັນ ແສງສະຫວັນ
