ພາຍຫລັງສຳເລັດ ການເກັບກູ້ ຜົນຜະລິດລະດູແລ້ງ, ໂດຍສະເພາະແມ່ນ ເຂົ້ານາແຊງ ສຳເລັດໃນເດືອນ ພຶດສະພາຜ່ານມານີ້, ຊາວກະສິກອນ ກໍ່ໄດ້ສືບຕໍ່ລົງມື ຜະລິດລະດູຝົນ ຢ່າງເປັນຂະບວນ ເປັນຕົ້ນແມ່ນເຂົ້ານາປີ ເຊິ່ງມາຮອດປັດຈຸບັນນີ້ ທົ່ວປະເທດ ສຳເລັດ ການຕົກກ້າ ແລະ ກະກຽມດິນສຳເລັດແລ້ວ 39%. ຂະນະທີ່ການປັກດຳນາທົ່ວໄປ, ນາຫວ່ານ ແລະ ນາຢອດສໍາເລັດແລ້ວກວ່າ 69.600 ເຮັກຕາ ຫລື ເທົ່າກັບ 9% ຂອງເນື້ອທີ່ແຜນການ 817.700 ກວ່າເຮັກຕາ. ຕາມຕົວເລກຕິດຕາມ ຄວາມຄືບໜ້າ ການຜະລິດເຂົ້ານາປີ ໃນທົ່ວປະເທດປີ 2017 ຈາກກົມປູກຝັງ ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ປີນີ້ລັດຖະບານ ໄດ້ວາດແຜນການ ສູ້ຊົນຜະລິດ ເຂົ້ານາປີໃຫ້ໄດ້ ຫລາຍກວ່າ 817.700 ເຮັກຕາ, ແນວພັນເກືອບ 50.000 ໂຕນ, ຄາດຄະເນ ຜົນຜະລິດລວມ ໃຫ້ໄດ້ຫລາຍກວ່າ 3,5 ລ້ານໂຕນ. ແນວໃດກໍ່ຕາມ ມາຮອດປັດຈຸບັນນີ້ ພາກສ່ວນກ່ຽວຂ້ອງ ທັງສູນກາງ ແລະ ທ້ອງຖິ່ນກໍ່ໄດ້ ເອົາໃຈໃສ່ຊີ້ນຳ-ນຳພາ ຊາວກະສິກອນ ສຸມໃສ່ຜະລິດ ເຂົ້ານາປີຢ່າງ ຈູດຈ້າວຫ້າວຫັນ ເພື່ອໃຫ້ສາມາດ ບັນລຸ ຕາມແຜນ ການວາງໄວ້ ແລະ ມາຮອດດຽວນີ້ ຊາວກະສິກອນ ໃນທົ່ວປະເທດ ກໍ່ໄດ້ຕົກກ້າສຳເລັດ ແລ້ວກວ່າ 26.500 ໂຕນເທົ່າກັບ 54%, ກະກຽມດິນ ໄດ້ຫລາຍກວ່າ 314.900 ເຮັກຕາ ເທົ່າກັບ 39%. ນອກຈາກນີ້ ການປັກດຳນາ ທົ່ວໄປສຳເລັດ 21.100 ກວ່າເຮັກຕາ, ນາຫວ່ານກວ່າ34.500 ເຮັກຕາ ແລະ ນາຢອດກວ່າ 13.800 ເຮັກຕາ ລວມທັງໝົດ 69.600 ກວ່າເຮັກຕາ ເທົ່າກັບ 9% ຂອງເນື້ອທີ່ປູກເຂົ້າ ນາປີທັງໝົດ. ນອກຈາກການ ຜະລິດເຂົ້າແລ້ວ ຊາວກະສິກອນ ຍັງໄດ້ສຸມໃສ່ ຜະລິດພືດລະດູ ຝົນຕ່າງໆຕື່ມອີກ. ສໍາລັບຜົນການຜະລິດເຂົ້ານາແຊງສົກປີ 2016-2017 ນີ້, ທົ່ວປະເທດ ມີເນື້ອທີ່ທັງໝົດ 95.000 ເຮັກຕາ, ໃນນີ້ສາມາດ ປັກດຳຕົວ ຈິງໄດ້ 90.050 ເຮັກຕາເທົ່າກັບ 95%. ໃນນັ້ນຜົນຜະລິດ ສະເລ່ຍໄດ້ 5,26 ໂຕນ/ເຮັກຕາ, ຜົນຜະລິດລວມ ບັນລຸ 473.700 ໂຕນ. ສໍາລັບການຜະລິດ ພືດລະດູແລ້ງ ມີເນື້ອທີ່ທັງໝົດ176.700 ກວ່າເຮັກຕາ, ໄດ້ຜົນຜະລິດ ທັງໝົດ 1,4 ລ້ານໂຕນ. ປີຜ່ານມາທົ່ວປະເທດ ສາມາດຜະລິດເຂົ້ານາປີ ໄດ້ 787.500 ເຮັກຕາ, ຜົນຜະລິດສະເລ່ຍ 4,35 ໂຕນ/ເຮັກຕາ, ຜົນຜະລິດລວມ 3,4 ລ້ານ. ຂອບໃຈຂໍ້ມູນຈາກ: ສໍານັກຂ່າວສານປະເທດລາວ
Editor: ຕະວັນ ແສງສະຫວັນ
