ເພື່ອສືບຕໍ່ປະຕິບັດ ແຜນພັດທະນາແມ່ຍິງລາວ 8 ແຜນງານ 34 ໂຄງການ ໂດຍສະເພາະແມ່ນແຜນງານທີ 1 ແຜນພັດທະນາຊັບພະຍາກອນເພດຍິງ ແລະ ແຜນງານທີ 3 ກ່ຽວກັບການປະກອບອາຊີບ ແລະ ດໍາເນີນທຸລະກິດຂອງເພດຍິງ ດັ່ງນັ້ນ ອາທິດທີ່ຜ່ານມາ ສູນອົບຮົມແມ່ນຍິງລາວ ສູນກາງສະຫະພັນແມ່ນຍິງລາວ ໄດ້ເປີດຊຸດຝຶກອົບຮົມ ວິຊາຊີບ ສໍາລັບແມ່ຍິງທີ່ດ້ອຍໂອກາດ ໄລຍະ 2 ພາຍໃຕ້ ການຮ່ວມມືລະຫວ່າງ ສູນກາງສະຫະພັນແມ່ຍິງລາວ ແລະ ກະຊວງສະເໝີພາບບົດບາດຍິງ-ຊາຍ ແລະ ຄອບຄົວ ສ. ເກົາຫລີ, ກ່າວເປີດພິທີໂດຍ ທ່ານ ນ. ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ເຂົ້າຮ່ວມໂດຍ ທ່ານ ຢອງ ຊີ ຈອຍ ຫົວຫນ້າກົມຮ່ວມມືພົວພັນຕ່າງປະເທດ ກະຊວງ ສະເໝີພາບບົດບາດຍິງ-ຊາຍ ແລະ ຄອບຄົວ ສ. ເກົາຫລີ ພ້ອມດ້ວຍຄະນະ, ແຂກທີ່ຖືກເຊີນ ແລະ ເອື້ອຍນ້ອງແມ່ຍິງ ທີ່ ມາຈາກ 18 ແຂວງເຂົ້າຮ່ວມ ຈໍານວນ 80 ກວ່າຄົນ. ການຝຶກອົບຮົມໃນຄັ້ງນີ້ຈະໄດ້ດໍາເນີນເປັນເວລາ 3 ເດືອນ ເລີ່ມຕັ້ງແຕ່ຕົ້ນເດືອນ ມິຖຸນາ ເປັນຕົ້ນໄປ ທີ່ ສູນອົບຮົມແມ່ຍິງລາວ, ຜູ້ເຂົ້າຮ່ວມ ຈະໄດ້ຮຽນຮູ້ທັງພາກ ທິດສະດີ ແລະ ປະຕິບັດຕົວຈິງ ເຊິງປະກອບມີ 3 ຂະແໜງວິຊາຊີບເຊັ່ນ: ຂະແໜງປຸງແຕ່ງ, ຂະແໜງຕັດຫຍິບ ແລະ ຂະແໜງເສີມສວຍ ເພື່ອເຮັດໃຫ້ເອື້ອຍນ້ອງແມ່ຍິງມີວິຊາຊີບ ທີ່ ໝັ້ນຄົງ, ສາມາດສ້າງລາຍຮັບໃຫ້ແກ່ຕົນເອງ ແລະ ຄອບຄົວ ທັງເປັນການ ປະກອບສ່ວນ ແລະ ສ້າງສາພັດທະນາປະເທດຊາດ ອີກດ້ວຍ.
Editor: ສິງຫາ ເລືອງວັນ
