ບົນພື້ນຖານການຈັດຕັ້ງຜັນຂະຫຍາຍຮ່ວມມື ລະຫວ່າງ ທະນາຄານ ແຫ່ງ ສປປລາວ ແລະ ທະນາຄານພັດທະນາອາຊີ ( ADB ) , ກົມຄຸ້ມຄອທະນາຄານທຸລະກິດ ແລະ ກົມຄຸ້ມຄອສະຖາບັນການເງີນ ໄດ້ຮ່ວມກັນຈັດກອງປະຊຸມ ສໍາມະນາແລກປ່ຽນຄວາມຮູ້ ໃນຫົວຂໍ້: ການບໍລິຫານຄວາມສ່ຽງ ໃນການສະໜອງທຶນ ໃຫ້ແກ່ພາກທຸລະກິດຂະໜາດນ້ອຍ ແລະ ຂະໜາດກາງ, ໃຫ້ແກ່ພະນັກງານທະນາຄານແຫ່ງ ສປປລາວ, ທະນາຄານທຸລະກິດ, ສະຖາບັນການເງີນ, ກົມສົ່ງເສີມວິສາຫະກິດ ຂະໜາດນ້ອຍ ແລະ ຂະໜາດກາງ ກະຊວງອຸສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະກໍາແຫ່ງຊາດລາວ.
ໂດຍກອງປະຊຸມສໍາມະນາຄັ້ງດັ່ງກ່າວ ໄດ້ຈັດຂື້ນເປັນເວລາ 4 ວັນ ໃນລະຫວ່າງວັນທີ 13 - 16 ມິຖຸນາ 2017 ທີ່ ໂຮງແຮມຄຣາວພຣາຊາ ນະຄອນຫຼວງວຽງຈັນ, ໂດຍການໃຫ້ກຽດເປັນປະທານຮ່ວມຂອງ ທ່ານ ນ. ວັດທະນາ ດາລາລອຍ ຮອງຜູ້ວ່າການ ທະນາຄານແຫ່ງ ສປປລາວ ແລະ ທ່ານ ນາງ. Ingrid van wees ຮອງປະທານ ທະນາຄານພັດທະນາອາຊີ, ຄະນະຮັບຜິດຊອບຂອງທະນາຄານແຫ່ງ ສປປລາວ ແລະ ADB, ພ້ອມດ້ວຍ ນັກສໍາມະນາກອນເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ຈະກວມເອົາຫຼາຍບົດຮຽນ ທີ່ຕິດພັນກັບການບໍລິຫານຄວາມສ່ຽງກ່ຽວກັບການປ່ອຍສີນເຊື່ອ ໃຫ້ວິສາຫະກິດ ຂະໜາດນ້ອຍ ແລະ ກາງ, ເປັນຕົ້ນ ຫຼັກການລວມກ່ຽວກັບການບໍລິຫານຄວາມສ່ຽງ, ການປະເມີນຄູ່ຮ່ວມງານຂອງ ທະນາຄານ ກ່ຽວກັບ ຂະບວນການປ່ອຍສີນເຊື່ອ ໃຫ້ວິສາຫະກິດຂະໜາດນ້ອຍ ແລະ ຂະໜາດກາງ, ການຈັດວາງຄວາມສ່ຽງ, ການຕິດຕາມ ກະແສເງີນສົດ ແລະ ບົດຮຽນອື່ນໆ ທີ່ ສໍາຄັນຕໍ່ກັບ ທະນາຄານ ແລະ ສະຖານບັນການເງີນ ທີ່ຈະຕ້ອງໄດ້ນໍາມາແລກປ່ຽນ ໃນການສໍາມະນາຄັ້ງນີ້, ນອກນີ້ ໃນການສໍາມະນາຍັງໄດ້ມີການນໍາສະເໜີ ບາງບົດຮຽນຕົວຈິງ ທີ່ຕິດພັນກັບ ແຕ່ລະຫົວຂໍ້ຂອງ ການສໍາມະນາ ເພື່ອເຮັດໃຫ້ ນັກສໍາມະນາກອນ ສາມາດເຂົ້າໃຈ ເລິກເຊິ່ງກ່ຽວກັບເນື້ອໃນບົດຮຽນຂອງການສໍາມະນາຄັ້ງນີ້ ແລະ ນໍາເອົາບົດຮຽນ ທີ່ ຖອດຖອນໄດ້ໄປຄົ້ນຄົ້ວ ຜັນຂະຫຍາຍ ແລະ ປັບໃຊ້ເຂົ້າໃນວຽກງານຕົວຈິງ ໃຫ້ເກີດດອກອອກຜົນ.
Editor: ສິງຫາ ເລືອງວັນ
