ກອງປະຊຸມ ສຳມະນາ ການຈົດທະບຽນຕະຫຼາດຫຼັກຊັບ ພາຍໃຕ້ຫົວຂໍ້ " ການກະກຽມຄວາມພອ້ມ ເພື່ອລະດົມທືນຜ່ານຕະຫຼາດທຶນ ແລະ ຈົດທະບຽນໃນຕະຫຼາດຫຼັກຊັບ " ຢູ່ແຂວງເຊກອງ ພິທີດັ່ງກ່າວໄດ້ຈັດຂື້ນໃນວັນທີ່ 13 ມີຖຸນາ 2017 ນີ້ ຢູ່ທີ່ສະໂມສອນໃຫ່ຍຂອງ ແຂວງ ເຊກອງ ໂດຍການເປັນກຽດເຂົ້າຮວ່ມຂອງ ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ຜູ້ຊີ້ນຳຂົງເຂດວຽກງານ ເສດຖະກິດຂັ້ນແຂວງ, ມີທ່ານ ວັນຄຳ ວໍລະວົງ ຜູ້ອຳນວຍການໃຫ່ຍຕະຫຼາດຫຼັກຊັບລາວ, ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ ອອ້ມຂ້າງແຂວງເຊກອງ ເຂົ້າຮວ່ມ.
ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ຜູ້ຊີ້ນຳວຽກງານເສດຖະກິດ ແຂວງເຊກອງ ກ່າວວ່າ: ໃນໄລຍະຜ່ານມາ ພັກ ແລະ ລັດຖະບານໄດ້ເອົາໃຈໃສ່ ຊີ້ນຳພາກສວ່ນກ່ຽວຂອ້ງ ເພື່ອຈັດຕັ້ງ ແລະ ພັດທະນາຕະຫຼາດທຶນ ໃຫ້ມີການຂະຫຍາຍຕົວຢ່າງຕັ້ງໜ້າ ແລະ ຕໍ່ເນື່ອງ ເຊີ່ງປະຈຸບັນໄດ້ສຳເລັດການສ້າງຕັ້ງຕະຫຼາດຫຼັກຊັບລາວ ຂື້ນໃນປີ 2010, ແລະ ອະນຸຍາດໃຫ້ມີການສ້າງຕັ້ງ ບໍລິສັດຫຼັກຊັບທັງໝົດ 4 ແຫ່ງ ນັບແຕ່ຕະຫຼາດຫຼັກຊັບໄດ້ຮັບການສ້າງຕັ້ງຂື້ນ ເປັນຕົ້ນມາ ໄດ້ຊວ່ຍໃຫ້ວິສາຫາກິດ ສາມາດລະດົມທືນໃນໄລຍະຍາວ ຈາກພາຍໃນ ແລະ ຕ່າງປະເທດ ໂດຍຜ່ານຊອ່ງທາງ ການອອກຈຳໜ່າຍຮຸ້ນ ໃຫ້ແກ່ມວນຊົນ ຄຽງຄູ່ກັນນີ້ເຫັນວ່າຍັງມີອີກຫຼາຍວິສາຫາກິດ ທີ່ ມີຄວາມຕອ້ງການເຂົ້າຫາແຫຼ່ງທຶນ ແຕ່ຍັງບໍ່ທັນເຂົ້າໃຈເລິກເຊີ່ງ ກ່ຽວກັບ ພາບລວມຂອງຕະຫຼາດທືນ ລວມທັງການກະກຽມຕົນເອງໃນດ້ານຕ່າງໆ ເພື່ອອອກຈຳໜ່າຍຮຸ້ນ ແລະ ຈົດຖະບຽນໃນຕະຫຼາດຫຼັກຊັບລາວ.
ຊຸດສຳມະນາ ການຈົດທະບຽນຕະຫຼາດຫຼັກຊັບ ຢູ່ແຂວງເຊກອງໃນຄັ້ງນີ້ ຜູ້ເຂົ້າຮວ່ມໄດ້ພອ້ມກັນຮຽນຮູ້ ພາບລວມຕະຫຼາດທືນ ໃນ ສປປ ລາວ, ຕະຫຼາດຫຼັດຊັບລາວ ທາງເລືອກໃຫ່ມຂອງການລະດົມທືນ ແລະ ການລົງທືນ, ຜົນປະໂຫຍດ ແລະ ຂັ້ນຕອນການລົງທືນ ໃນຕະຫຼາດຫຼັກຊັບ ແລະ ຮຽນຮູ້ກ່ຽວກັບການກະກຽມເຂົ້າຕະຫຼາດຫຼັກຊັບ ທັງນີ້ເພື່ອແນໃສ່ໃຫ້ຄວາມຮູ້, ຄວາມເຂົ້າໃຈກ່ຽວກັບຕະຫຼາດທຶນ ແກ່ທຸກພາກສວ່ນ ໃນສັງຄົມ ເຊີ່ງຈະກາຍເປັນປະໂຫຍດ ແລະ ພື້ນຖານ ທີ່ສຳຄັນ ໃນການແລກປ່ຽນຊື້ - ຂາຍຮຸ້ນ ໃນຕະຫຼາດຫຼັກຊັບລາວ, ເຊີ່ງການຈັດຊຸດສຳມະນາ ຈົດທະບຽນຕະຫຼາດຫຼັກຊັບໃນຄັ້ງນີ້ ແມ່ນເປັນທາງເລືອກທີ່ສໍາຄັນ ໃຫ້ແກ່ບັນດານັກທຸລະກິດທັງພາກລັດ ແລະ ເອກະຊົນ ໂດຍສະເພາະແມ່ນ ຜູ້ທີ່ມີຄວາມສົນໃຈ ໃນດ້ານການລົງທຶນ, ເພື່ອໃຫ້ເຂົ້າເຖິງຕະຫຼາດທຶນຫຼາຍຂື້ນ.
Editor: ສິງຫາ ເລືອງວັນ
