ກອງປະຊຸມພາກທຸລະກິດຈີນ-ອາຊຽນ ຄັ້ງທີ 1 ຈັດຂຶ້ນຢ່າງເປັນທາງການໃນຕອນເຊົ້າຂອງວັນທີ 13 ມິຖຸນາ 2017 ທີ່ຄຸນໝິງ ສປ.ຈີນ ເຊິ່ງມີບັນດາພາກລັດ ແລະ ຜູ້ປະກອບການຈາກ 10 ປະເທດສະມາຊິກອາຊຽນ ລວມທັງພາກທຸລະກິດຈີນເຂົ້າຮ່ວມ.
ກອງປະຊຸມຄັ້ງນີ້ ໄດ້ເນັ້ນໃສ່ການປຶກສາຫາລືຮ່ວມກັນ ໃນຂົງເຂດການຄ້າ ແລະ ການລົງທຶນເປັນຕົ້ນຕໍ ເພື່ອສ້າງໃຫ້ອາຊຽນ-ຈີນ ໃຫ້ມີຄວາມເຂັ້ມແຂງທາງດ້ານ ແລະ ອຸດສາຫະກຳຕ່າງໆ ໃນຍຸກແຫ່ງການເຊື່ອມໂຍງ. ຂະນະທີ່ ສປປລາວ ໄດ້ຮັບກຽດເປັນປະທານ ກອງປະຊຸມໝູນວຽນ ແລະ ໄດ້ເຊີນຊວນໃຫ້ພາກທຸລະກິດຈີນ - ອາຊຽນ ມາຮ່ວມລົງທຶນໃນລາວ ແລະ ພ້ອມໃຫ້ການຮ່ວມມືໃນທຸກດ້ານ ແລະ ໄດ້ຮັບຟັງການລາຍງານ ຈາກບັນດາຜູ້ຕາງໜ້າຂອງແຕ່ລະປະເທດ ແລະ ມີປຶກສາຫາລືຮ່ວມກັນ ເພື່ອສ້າງຄວາມເຂັ້ມແຂງທາງດ້ານ ການຄ້າ - ການລົງທຶນ ຂອງຈີນ - ອາຊຽນ ໃຫ້ມີຄວາມໜັກແໜ້ນ, ແນໃສ່ເຮັດໃຫ້ເສດຖະກິດຂອງ ບັນດາປະເທດອາຊຽນ ເຕີບໃຫຍ່ຂະຫຍາຍຕົວຍິ່ງຂຶ້ນ. ສຳລັບ ຫົວຂໍ້ ທີ່ປຶກສາຫາລືກັນໃນຄັ້ງນີ້ ປະກອບມີ: ການຮ່ວມມືທາງດ້ານພະລັງງານ, ການເປັນຄູ່ຄ້າຮ່ວມກັນ, ການລົງທຶນໃນຂົງເຂດອຸດສາຫະກຳ, ການຮ່ວມມື ລະຫວ່າງ ພາກທຸລະກິດດ້ວຍກັນ, ການແລກປ່ຽນ ແລະ ການສະໜອງຂໍ້ມູນ - ຂ່າວສານ ເພື່ອເຮັດໃຫ້ພາກທຸລະກິດໄດ້ມີທາງເລືອກ ໃນການລົງທຶນ ໃນຂະແໜງການຕ່າງໆ ໃນຍຸກຂອງການເຊື່ອມໂຍງ.
Editor: ສິງຫາ ເລືອງວັນ
