ສະພາການຄ້າ ແລະ ອຸດສາຫະກຳແຂວງວຽງຈັນ ຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດ ໄດ້ປະຊຸມຮ່ວມ ແລະ ປຶກສາຫາລືພາຍໃຕ້ຫົວຂໍ້: ສ້າງຄວາມເຂັ້ມແຂງໃຫ້ພາກທຸລະກິດຂັ້ນແຂວງ ໃນວັນທີ 6 ມິຖຸນາ 2017 ຜ່ານມາຢູ່ທີ່ຫ້ອງວ່າການປົກຄອງແຂວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ນ. ວາລີ ເວດສະພົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ, ທ່ານ ພູວົງ ສີຫອມວົງ ຫົວໜ້າພະແນກອຸດສາຫະກຳແລະການຄ້າແຂວງວຽງຈັນ, ທ່ານ ບຸນທັນ ປັນຍາທິລາດ ປະທານສະພາການຄ້າ ແລະ ອຸດສາຫະກຳແຂວງວຽງວຽງຈັນ ພ້ອມດ້ວຍສະມາຊິກພາຍໃນແຂວງເຂົ້າຮ່ວມ.
ທ່ານ ນ.ວາລີ ເວດສະພົງ ກ່າວວ່າ :ໃນການປຶກສາຫາລືໃນເທື່ອນີ້ ມີຫຼາຍຫົວຂໍ້ທີ່ຖືກຍົກຂຶ້ນມາ ສົນທະນານຳກັນເປັນຕົ້ນແມ່ນການສ້າງສາຍພົວພັນແຮງງານ ທີ່ດີ ໃນນາມຕາງໜ້າອົງການຈັດຕັ້ງພາກທຸລະກິດ, ຕາງໜ້າຜູ້ໃຊ້ແຮງງານ,ແລະ ການພັດທະນາສະພາບແວດລ້ອມທຸລະກິດ ເພື່ອປະກອບສ່ວນດ້ວຍການມີຄຳເຫັນ ເຂົ້າໃນການປັບປຸງນິຕິກຳຕ່າງໆໃນເວທີປຶກສາຫາລືຂອງພາກທຸລະກິດລາວ, ການສ້າງຄວາມເຂັ້ມແຂງໃຫ້ແກ່ພາກທຸລະກິດຂະໜາດໜ້ອຍ ແລະ ຂະໜາດກາງ ພ້ອມທັງການຂະຫຍາຍທຸລະກິດທີ່ຖືກຕ້ອງໃຫ້ຫຼາຍຂຶ້ນກວ່າເກົ່າ, ການສ້າງຖານຂໍ້ມູນທຸລະກິດ ເພື່ອລະດົມໃຫ້ນັກທຸລະກິດເຂົ້າເປັນສະມາຊິກຫຼາຍຂຶ້ນ ລວມເຖິງ ການຈັດງານວາງສະແດງສິນຄ້າ, ການພົບປະທຸລະກິດທັງພາຍໃນ ແລະ ຕ່າງປະເທດ ແລະ ຫົວຂໍ້ສຳຄັນອື່ນໆອີກ.
ຈຸດປະສົງຂອງການຈັດກອງປະຊຸມປຶກສາຫາລືກັນເທື່ອນີ້ ກໍເພື່ອວິເຄາະປຽບທຽບສະພາບແວດລ້ອມ ຂອງການດຳເນີນທຸລະກິດຂອງ ຜູ້ປະກອບການ ທີ່ຕິດພັນກັບການຈັດຕັ້ງປະຕິບັດ ແລະ ການບັງຄັບໃຊ້ນະໂຍບາຍກົດໝາຍ ແລະ ກົດລະບຽບຕ່າງໆຂອງ ພາກລັດ, ເປັນການຍົກໃຫ້ເຫັນຄວາມສຳຄັນຂອງການໂຮມກຸ່ມ ຂອງພາກທຸລະກິດ ເພື່ອ ເພີ່ມຄວາມອາດສາມາດ ໃນການຕໍ່ລອງ, ຫຼຸດຜ່ອນຄວາມເສຍປຽບໃນຍຸກຕະຫຼາດເປີດກວ້າງ ເປັນຕົ້ນແມ່ນໃນຍຸກຂອງAEC.
ໃນອີກດ້ານໜຶ່ງການຈັດເວທີປຶກສາຫາລືໃນເທື່ອນີ້ ຍັງເປັນການສ້າງແບບແຜນວິທີເຮັດວຽກຂອງ ພາກທຸລະກິດຢູ່ສູນກາງ ແລະ ຂັ້ນແຂວງໃຫ້ໄປລວງດຽວກັນອີກດ້ວຍ.
Editor: ສິງຫາ ເລືອງວັນ
