ໃນວັນທີ 14 ມິຖຸນາ 2017 ອົງການກາແດງລາວ, ສູນເລືອດແຫ່ງຊາດ ແລະ ພາກສ່ວນກ່ຽວຂອງໄດ້ຮ່ວມກັນຈັດ ພິທີສະເຫຼີມສະຫຼອງວັນ ບໍລິຈາກເລືອດໂລກ ທີ່ ສູນການຄ້າລາວໄອເຕັກ, ພາຍໃຕ້ຄໍາຂັວນ "ໃຫ້ເລືອດ ໃຫ້ປະຈໍາທຸກ 3 - 4 ເດືອນ ທ່ານສາມາດເຮັດໄດ້ " ໂດຍການເປັນປະທານ ແລະ ກ່າວເປີດພິທີໂດຍ ທ່ານ ດຣ ຄໍາຮຸ່ງ ເຮືອງວົງສີ ປະທານອົງການການແດງລາວ ເຂົ້າຮ່ວມພາຍໃນພິທີມີ ທ່ານ ດຣ ຈູຣຽດ ໄຟຣເຊີ ຜູ້ຕາງຫນ້າອົງການອານາໄມໂລກປະຈໍາ ສປປລາວ. ມີບັນດາແຂກ ທັງພາຍໃນ ແລະ ຕ່າງປະເທດ ພ້ອມດ້ວຍ ພໍ່-ແມ່ ປະຊົນຊົນລາວ, ທະຫານ - ຕໍາຫຼວດ, ພະນັກງານລັດຖະກອນ, ອົງການຈັດຕັ້ງ ທັງພາກລັດ ແລະ ເອກກະຊົນ, ພໍ່ຄ້າຊາວຂາຍ, ພະສົງ, ນັກຮຽນ - ນັກສຶກສາ ເຂົ້າຮ່ວມ ແລະ ບໍລິຈາກເລືອດ ໂດຍບໍ່ຫວັງສິຕອບແທນ ພາຍໃນງານ ຫຼາຍກ່ວາ 1000 ຄົນ.
ດັ່ງທີ່ຮູ້ກັນແລ້ວວ່າ ວັນທີ 14 ມິຖຸນາ ຂອງທຸກໆປີ ແມ່ນວັນ ບໍລິຈາກເລືອດໂລກ ແລະ ເປັນວັນທີ່ມີຄວາມໝາຍຄວາມສໍາຄັນທີ່ສຸດ ຂອງຜູ້ບໍລິຈາກເລືອດທັງຫຼາຍ ຢູ່ທົ່ວທຸກມຸມໂລກເວົ້າລວມ - ເວົ້າສະເພາະ ກໍຄື ບັນດາຜູ້ບໍລິຈາກເລືອດ ທີ່ ໃຈບຸນ ຢູ່ໃນ ສປປລາວ. ສະນັ້ນເພື່ອເປັນການສົ່ງເສີມຄວາມຮັບຮູ້ໃນທົ່ວສັງຄົມ ເພື່ອໃຫ້ເຫັນເຖິງ ຄວາມສໍາຄັນຂອງການສະໜອງເລືອດ ແລະ ພະລິດຕະພັນຂອງເລືອດ ໂດຍສະເພາະແມ່ນການເຂົ້າເຖິງ ການບໍລິຈາກເລືອດ ທີ່ພຽງພໍ, ປອດໄພ ແລະ ທັນເວລາ ບໍ່ວ່າຈະຢູ່ແຫ່ງຫົນໃດໃນໂລກ ແມ່ນຖືວ່າເປັນສິ່ງສໍາຄັນທີ່ສຸດ ສໍາລັບປ້ອງກັນການຕາຍຂອງຄົນເຈັບ, ເພາະຂະບວນບໍລິຈາກເລືອດ ແມ່ນໄດ້ຊ່ວຍຊີວິດຄົນເປັນຈໍານວນຫຼາຍໃນແຕ່ລະປີ.
ຂະບວນການ ບໍລິຈາກເລືອດຢູ່ ສປປລາວ ໄດ້ຖືກຈັດຕັ້ງຜັນຂະຫຍາຍມາຕ່ປີ 1995 ມາຮອດຮອດປະຈຸບັນ ຄົບຮອບ 22 ປີ, ວຽກງງານດັ່ງ ໄດ້ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ມາຮອດປະຈຸບັນ ມີສູນຮັບບໍລິຈາກເລືອດທັງໝົດ 17 ແຫ່ງ, ໜ່ວຍເກັບຮັກສາເລືອດ 22 ແຫ່ງ ແລະ ໂຮງໝໍກອງທັບ 6 ແຫ່ງ ຊຶ່ງກວມເອົາທຸກໆແຂວງ ໃນທົ່ວປະເທດ, ໃນແຕ່ລະປີ ຈໍານວນຜູ້ບໍລິຈາກເລືອດແບບສະໝັກໃຈ ໂດຍບໍ່ຮຽກຮ້ອງສິງຕອບແທນໄດ້ເພີ່ມຂື້ນ ແລະ ໃນປີ 2016 ຜ່ານມາ ມີຜູ້ບໍລິຈາກເລືອດແບບສະໝັກໃຈເຖິງ 90 ສ່ວນຮ້ອຍ ຂອງຜູ້ບໍລິຈາກເລືອດທັງໝົດ.
ສໍາລັບ ທ່ານໃດທີ່ຕິດພາລະກິດ ແລະ ພາດໂອກາດ ໃນຄັ້ງນີ້ ກໍ່ຍັງສາມາດ ຮ່ວມບໍລິຈາກເລືອດໄດ້ ທີ່ ສູນຮັບບໍລິຈາກເລືອດ, ໂຮງໝໍ ແລະ ໜ່ວຍງານຮັບຜິດຊອບໄດ້.
Editor: ສິງຫາ ເລືອງວັນ
