ວັນທີ 13 ມິຖຸນາ ທີ່ຜ່ານມານີ້ ທີ່ຫ້ອງວ່າການເມືອງຫີນເຫີບ ໂຄງການເຂື່ອນໄຟຟ້ານ້ຳລີກ 1 ໄດ້ນຳເອົາເງິນຈຳນວນ 4 ຕື້ກວ່າກີບ ໄປມອບໃຫ້ແກ່ປະຊາຊົນທີ່ຖືກຜົນກະທົບຈາກ ໂຄງການກໍ່ສ້າງເຂື່ອນໄຟຟ້າ ນ້ຳລີກ 1 ຈຳນວນ 112 ຄອບຄົວ ໂດຍຜ່ານອົງການປົກຄອງເມືອງເຊິ່ງແມ່ນ ທ່ານ ອຸດົງ ວົງສະຫວາດ ເຈົ້າເມືອງໆຫີນເຫີບ ເປັນຜູ້ມອບໂດຍຊ່ອງໜ້າ ທ່ານ ນ.ຈັນແພງ ວິພາວັນ ຄະນະປະຈຳພັກແຂວງຕາງໜ້າໃຫ້ແກ່ເຈົ້າແຂວງໆວຽງຈັນ, ມີບັນດາພະນັກງານຂັ້ນສູງຂອງ ໂຄງການເຂື່ອນໄຟຟ້ານ້ຳລີກ1ເຂົ້າຮ່ວມ.
ທ່ານ ພິພັດພົງ ຈັນດີ ຜູ້ອຳນວຍການບໍລິຫານບໍລິສັດໄຟຟ້ານ້ຳລີກ 1 ຈຳກັດ ກ່າວວ່າ: ໂຄງການກໍ່ສ້າງເຂື່ອນນ້ຳລີກ 1 ມີຜູ້ຖືກຜົນກະທົບ ທັງໝົດ 489 ຄອບຄົວ ລວມເປັນມູນຄ່າຊົດເຊີຍທັງໝົດ 11,7 ລ້ານ ໂດລາສະຫະລັດ (ສິບເອັດຈຸດເຈັດລ້ານໂດລາສະຫະລັດ) ໃນນີ້ຖືກກະທົບເປັນສິ່ງປຸກສ້າງ ປະເພດ ທີ່ຢູ່ອາໄສຈຳນວນ 112 ຄອບຄົວ ແມ່ນໄດ້ຍົກຍ້າຍອອກໄປຢູ ບ້ານຫີນເຫີບເໜືອ, ບ້ານຫີນເຫີບໃຕ້ ແລະ ບ້ານ ໂພນທອງ ແລະ ປຸກສ້າງເຮືອນໃຫ້ແທນສຳເລັດ 100 ສ່ວນຮ້ອຍແລ້ວ, ການມອບເງິນຊົດເຊີຍຄັ້ງນີ້ແມ່ນເປັນປະເພດດິນທຳການຜະລິດ, ຕົ້ນໄມ້ໃຫ້ໝາກ ແລະ ຕົ້ນໄມ້ອຸດສາຫະກຳ, ສ່ວນຄອບຄົວທັງຍັງເຫຼືອ ຈະໄດ້ສືບຕໍ່ຊົດເຊີຍໃຫ້ສຳເລັດໃນທ້າຍປີນີ້.
ທ່ານຍັງກ່າວຕໍ່ອີກວ່າ: ໂຄງການກໍ່ສ້າງເຂື່ອນໄຟຟ້ານ້ຳລີກ 1 ໄດ້ເລີ່ມລົງມືກໍ່ສ້າງໃນປິ 2014 ແຕ່ໄດ້ລົງມືຕົວຈິງໃນປີ 2016 ຍ້ອນຖືກຜົນກະທົບຈາກພາຍຸ ຄືຜົນກະທົບຈາກທຳມະຊາດ ມາຮອດປັດຈຸບັນມີຄວາມຄືບນ້າໄປແລ້ວ 58 ສ່ວຍຮ້ອຍ ໂດຍມີມູນຄ່າການກໍ່ສ້າງ 153,7 ລ້ານໂດລາສະຫະລັດ (ໜຶ່ງຮ້ອຍຫ້າສິບສາມລ້ານໂດລາສະຫະລັດ), ໂຄງການດັ່ງກ່າວນີ້ແມ່ນການລົງທຶນແບບມີສ່ວນຮ່ວມຂອງບໍລິສັດ GPSC ຖືຮຸ້ນ 40 ສ່ວນຮ້ອຍ, ບໍລິສັດໄທໂດຖືຮຸ້ນ 40 ສ່ວນຮ້ອຍ, ເອກະຊົນຈາກ ສ.ເກົາຫຼີຖືຮຸ້ນ 10 ສ່ວນຮ້ອຍ ແລະ ບໍລິສັດໄຟຟ້າລາວຖືຮຸ້ນ10 ສ່ວນຮ້ອຍ, ຫາກສ້າງເຂືອນດັ່ງກ່າວນີ້ສຳເລັດ ຈະມີກຳລັງການຜະລິດໄຟຟ້າໄດ້ 65 ເມກາວັດ. ໃນໂອການີ້ ທ່ານ ເຕີມໄຊ ບຸນນາກ ປະທານເຈົ້າຫນ້າທີ່ບໍລິຫານ ແລະ ກຳມະການ ຜູ້ຈັດການໃຫຍ່ບໍລິສັດ GPSC ກ່າວວ່າ: ການທີ່ເຂົ້າມາມີສ່ວນຮ່ວມລົງທຶນ ໃນການກໍ່ສ້າງເຂື່ອນໄຟຟ້ານ້ຳລີກ 1 ນີ້ ກໍ່ຍ້ອນເບິ່ງເຫັນວ່າ ສປປ ລາວ ເປັນປະເທດທີ່ມີທ່າແຮງດ້ານການກໍ່ສ້າງເຂື່ອນໄຟຟ້ານ້ຳຕົກ ເຊິ່ງເປັນພະລັງງານສະອາດ ແລະ ການມອບເງິນຊົດເຊີຍຄັ້ງນີ້ແມ່ນເປັນການປະຕິບັດພັນທະຂອງບໍລິສັດ ໃນການ ພັດທະນາຊີວິດການເປັນຢູ່ຂອງປະຊາຊົນຜູ້ໄດ້ຮັບຜົນກະທົບ ແລະ ຜູ້ຢູ່ໄກ້ຄຽງໃຫ້ດີຂຶ້ນ, ຫາກເຂື່ອນແຫ່ງນີ້ ສຳເລັດ ນອກຈາກຈະຜະລິດກະແສໄຟຟ້າແລ້ວຍັງຈະກາຍເປັນແຫຼ່ງທອ່ງທ່ຽວ ທີ່ ສວຍງາມ ແລະ ມີທີ່ຕັ້ງຢູ່ລະຫວ່າງກາງເມືອງໃຫຍ່ຄືຈາກ ນະຄອນຫຼວງວຽງຈັນໄປ ວັງວຽງ ແລະ ຫຼວງພະບາງອີກດ້ວຍ.
Editor: ສິງຫາ ເລືອງວັນ
